AEMAWIRISAS 1 - AY ATAYI

¹ Teofilus. E bapnak tulis aeapomof buku, Yesus e aemawiriasam, e amememtamawiriasam, atakam ara.

² E Yesus aemawirias atakam, bare e Allaj, Yesus, onam op atowotometef jofay ajiwaras ara. Bap ara nat, e Yesus e Roh Kudus fakas aomomefen. Inimas Yesus jirmec e aereremtawef ow ajirimefen. Aram e ow atakam botaw atewosomefen.

³ Bapnak ara, Yesus ajurusemef, wunam e ow bipu tetakay aoememefen. Aram junum bweas arke e ow umutonnakut aporomtamefen. Inimas e ow e aramat ipic aojaworsitef atakam, atakamnak aporfesen. Bar empat puluh ajiwar ar e ow bipu ajisema aeef, wunam ar Allah Pemerintah atakam aotawefen.

⁴ Yesusam e ow aaramsimef, wunam jirmec ajirimefen. “Car Yerusalem bakan baji arapok. E doricipic atayi aeefas bwenaw, manmok mamtiwapey. Doram e atakam car emeotawfin.

⁵ Yohanes, ow bwi abwimef. Bar arke opok nat, Roh Kudus, e cajak aman afiwaptotorceman.” Yesus inim aeefen.

Allah, Yesus onam op atowotometef

⁶ E ajarewsiemfes ow masirin, jonow atowporfes. “Tuhan. Or, a Israel pemerintah botewem sarim open?” Inim aefesen.

⁷ Yesus masirin, “E pokin pokin doricipic ban ton ara. Inimas aramat ipic e pokin pokin jofay, atakam arma asakamtiwef. Eram camsomas opok.

⁸ Roh Kudus e cajak aman aneyfiwaptotorcan, caram atemen bwe fakas aomomtotorcomokom. Car masirin, doratakam e Yerusalem owam, e Yudea capinmi ow takasam, e Samaria owam, e wun samatin samatin takasam, acacapiomcomokom.” Yesus inim aeefen.

⁹ Aramat ipic inim atakam aotawef cowok masirin, Allah, aramat ipic onam op atowotometefen. E owam manmok atiwfesen. Bare, e onam op jak Yesus apwirimtopomefen. Inimas e ow Yesus manmok botiw opoken.

¹⁰ Yesus ajisosef ara, e ow manmok op aoromsimomfesen. Bare, jipic jamnuk picin fwesak epcom e ow dampu asarimememfesen.

¹¹ E ipic jamnukam atakam aotawfesen. “Awamcokom Galilea ow. Car manmok ucim op atiwmokom? Allah a Yesus e cawowoc onam op atowotometma. E Yesus nat, aofasineycema. Car e apormokomas cimin cowok arew.” Inim aefesen.

Yudas juw buwem ipic

¹² Bare. E atakam botaw batewosom ow sikon asan juwas “Saitun Os Asan” ewjisosfes, wunam Yerusalem aofasifesen. E sikon Yerusalem sotop ara. Er kilometer cowoknakap, inim sotop ara.

¹³ E ow e kota ajiwfes masirin, op kamar atometfiwfesen. E kamar ajaki kamar arawen. E ajarewsiapfes ow Petrusam, Yohanesam, Yakobusam, Andreasam, Filipusam, Tomasam, Bartolomeusam, Matiusam, Yakobusam, Selot ow mamkawi ipic juwas Simonam, Yudasam, inim ow arawen. (E asep Yakobus, Alpius atiw arawen. E Yudas masirin, wun ipic juwas Yakobus atiw arawen).

¹⁴ Bare. E ow takas, bi binip cowok, janim Allah aanima aefesen. Aram, cepesam, Yesus arosowoc juwas Mariaam, Yesus arewcewesam, janim Allah akac aanima aefesen.

^15-16 Jofay ara, Petrus e Yesus mamkawi ow wasec asitefen. E ajarewsiapfes ow, seratus dua puluh ajiwar arawen. Petrus masirin, atakam aotawefen. “Dojowow akatonokom. Bapnak ara, Roh Kudus e Yudas aemcowas, atakam Daud aotawefen. Daud masirin, e atakam, Alkitab aman tulis aeapomefen. Bare, Yudas e Alkitab atakam jipu aemef. E Yudas e Yesus ban akimomfes ow, bap ajaromef ipic ara.

¹⁷ Yesusam e Yudas, kerja dar cowkon bwem aeremtewef. Inimas e Yudas dar cowkon aememawirum.” Petrus inim aeefen.

¹⁸ Yudasam e jokmen aemefas, uang ajititefen. Ar masirin, e uang, capinmi aojititefen. Erasan ara, aramat ipic cenes aneyjuamesefen. E jakam apuef, wunam e jak com acofejisefen.

¹⁹ Yerusalem ow takasam e atakam jen ajifesen. Inimas ar e capinmi juwas “Hakel Dama” aamtiwfesen. E juwas aratakam juwas arawen. E juwas “Es Capinmi” inim awcawor arawen.

²⁰ Petrusam atakam e ow aootawefen. “E Kitab Masmur atakam ara: ‘Acem, ow opok cowok baemamescow. Ow e cem aman bemap arapok.’ Wunam, ‘Wun ipic akerja juw bauwuemerec.’ E Kitab Masmur inim atakam ara.

^21-22 Inimas ara, wun ipic, Yesus aojaworsitefas, atemen dar akac baatamerec. Tuhan Yesus dar cowkon aememawirum, e ipicam dar cowkon aememawirum ipica. E Yohanes, Yesus bwi abwimef jofayam, e Allah, Yesus onam op atowotometef jofay ajiwaram, e jipic dar cowkon aememawirum ipica.” Petrus inim aeefen.

²³ Inimas ara, e ow jipic jamnuk aeremfesen. E wun ipic juwas Yusuf arawen. (E ipic wun juwas Barsabas. Aram wun juwas Yustus.) E wun ipic masirin, juwas Matias arawen.

^24-25 Ar masirin, janim aanimfesen. “Tuhan. Or ow takas ajak amanas omsom. Yudas e kerjaas bakan den ajiwitiwef, wunam arop bajurusap asan ajisosef. Bare, jipic jamnuk awamces ara. Or e aeremtewmem ipic cowok baporomtamcarowey.” Inim aefesen.

²⁶ Bare, e ow, ek kanim aneyjiwitiwfesen. Er e ay atakam botaw batewosom ipic bweremtewas arawen. Bare, Matias aeremtewfesen. Aram Matias, e wun atakam botas batewosom ow sebelas ajiwar, cowkon atewemfesen.