Firimooni 1 - Iimuuma Iinyaaya

Obhukeesha

¹ Iinyarubha inu eniyikaama anye Pawuro. Anye nibhoyerwe ku-nsonga ya okuraasha Amangʼana Amajomu aga Kiriisitu Yeesu. Enikukaamira awe Firimooni, omwendwa weeswe na omujuuma weejaasu. Anye na Omukiriisitu weejaasu Timoteeyo, ekikukeesha.

² Ekikeesha na omusubhaati weeswe Afiya, omurwani weejaasu Arikipo, na riikanisa rinu erisangira ewaawo.

³ Iinema na omurembe okusooka ku-Raata Nyamuwanga, na ku-Raatabhugenyi Yeesu Kiriisitu, bhibhe amwi na emwe.

Obhwendi na obhwikirisha bhwa Firimooni

⁴ Akabhaga koone kanu enikusabhiraga, enikumya Nyamuwanga waani,

⁵ kwa okubha enuungwa ati owugenderera okwikirisha Raatabhugenyi Yeesu na okwenda Abhakiriisitu bhoone kutyo.

⁶ Enikusabhira ku-Nyamuwanga ati obhwikirisha bhunu wuyimbeene amwi na eswe, bhukore uture okumenya kujomu giinonkwe ginu kiri nagyo ku-bhugwatani bhweswe na Kiriisitu.

⁷ Mukiriisitu weejaasu, obhwendi bhwawo bhunjomisiishe na okunsimbiisha muno, kwa okubha usaasamuuye emitima gya Abhakiriisitu.

Pawuro kaasabha Firimooni aabhire Wonesimo

⁸ Woori ku-nsonga iyo, okuriingʼaana na obhuturo bhunu niyaaywe na Kiriisitu Yeesu, nikaturire okukusiiga ukore kinu weenderwe okukora. Nawe anye nitakukora kutyo.

⁹ Enirora ati ni kujomu muno nikusabhe, kwa okubha nimenyere ati unyendere, na Abhakiriisitu bheejaasu bhoone ubheendere. Anye Pawuro omukaruka, na woori kutya nibhoyerwe ku-nsonga ya Kiriisitu Yeesu.

¹⁰ Enikusabha waabhire Wonesimo. Wonesimo ari rwa omwana waani, akabhaga kanu nibhoyerwe mu-jeera, ꞉naamubhwiriiye Amangʼana Amajomu aga Yeesu, ˆneekirisha.

¹¹ Kara eyo, gintungwa gyaye ꞉gitaakujomeraga. Tari woori gintungwa gyaye ni njomu awe woone egiija okukujomera.

¹² Woori enimusubhya ku-awe eyo, nawe anye omwene mu-mutima gwani nimwendere muno.

¹³ Anye omwene naaneendere niikare nawe anu, insonga aansakirega ganu awe ukansakiiye, mu-kabhaga kanu nikyabhoyerwe mu-jeera ku-nsonga ya okuraasha Amangʼana Amajomu.

¹⁴ Nawe woori naanitendere okukora ryoneryone ukyari okwimbwira nikore. Nitakwenda nikusingʼiirishe okukora amajomu, tari eneenda ugakore kwa okubha awe omwene wendere okugakora.

¹⁵ Amwi, Wonesimo ꞉aasookere ku-awe ku-kabhaga akatooto kayo era, insonga okusookerera ayo mubhe nawe kajaanende.

¹⁶ Okwambira woori, omwene atari mugaya era ku-awe, tari woori ni mujomu okukira okubha omugaya. Woori Wonesimo ni Mukiriisitu weejaasu, omwende. Anye nimwendere muno, awe woone owuuja okumwenda kukira anye. Omwene ni mugaya ewaawo, nawe ni Mukiriisitu weejaasu ku-Raatabhugenyi Yeesu.

¹⁷ Woori mmbe, raabhe umenyere ati niri amwi na awe, uramire Wonesimo rwa kutyo ukandamiiye anye.

¹⁸ Na raabhe ꞉aakukayiiye engʼana ryoneryone, amwi ati owumutonga kiinu, ekiinu kiyo untonge anye.

¹⁹ Ni anye omwene Pawuro, enikaama na okubhoko kwani, nirikuriya. Nitakwenda okukuyiitya ati enikutonga, nawe waasiga okurabhirwa ati awe woone ꞉woonguuywe Amangʼana Amajomu okuturira mu-kuraasha kwani.

²⁰ Woori, Mukiriisitu weejaasu, nunkorere riingʼana riyo ku-nsonga ya riisiina rya Raatabhugenyi. Nunkorere kutyo, usambaarushe omutima gwani.

²¹ Enikukaamira ganu, kwa okubha nimenyere obhuungwani bhwawo, owuuja okukora okukira ganu enikusabha.

²² Ukamara gayo, untuurirega-wo owa okusikirira, kwa okubha eniisiga ati okuturira ku-bhusabhi bhwemwe, Nyamuwanga kaaja okunsakira bhaantatire nisubhe kw-imwe eyo.

Amangʼana ga okuragana

²³ Epafura, unu abhoyerwe amwi na anye ku-nsonga ya Kiriisitu Yeesu, kaakukeesha.

²⁴ Na abhakosi bheejaasu abha emirimu, bhaaMaariko, Arisitariko, Dema na Ruuka, bhoone abhakukeesha.

²⁵ Iinema ya Raatabhugenyi Yeesu Kiriisitu ibhe amwi na emwe mwone kutyo.