Abhafiripi 1 - Iimuuma Iinyaaya

Obhukeesha

¹ Iinyarubha inu eniyikaama anye Pawuro, niri amwi na Timoteeyo. Eswe kiri bhajuuma bha Kiriisitu Yeesu. Ekibhakaamira emwe abhaangarisi, abhashemaasi bha riikanisa, na kw-imwe abhataakatiifu bha Nyamuwanga bhanu mwikirisiishe Yeesu Kiriisitu, Firipi eyo.

² Iinema na omurembe okusooka ku-Raata Nyamuwanga, na ku-Raatabhugenyi Yeesu Kiriisitu bhibhe amwi na emwe.

Pawuro kaasabhira Abhafiripi

³ Ebhaga ryone kutyo rinu enibhayiita, enikumya Nyamuwanga waani.

⁴ Na riibhaga ryone kutyo rinu enibhasabhiraga ku-Nyamuwanga, enibhasabhira nijomeeywe,

⁵ kwa okubha emwe muyimbeene na anye ku-mirimu gya okuraasha Amangʼana Amajomu okwambira orusuku runu ꞉mwoonguuywe, mwikirisha, na reero.

⁶ Kinu anye noone nimenyere ni ati, Nyamuwanga niwe ꞉aambisiishe emirimu emijomu mu-mitima gyemwe, na niwe kaaja okugigenderesha okuyikira orusuku runu Kiriisitu Yeesu arisubha.

⁷ Ni mirimu gyani okwiganiirisha ganu kw-imwe mwone kutyo, kwa okubha muri mu-mutima gwani. Muyimbeene na anye ku-nema ya Nyamuwanga, mu-kabhaga kanu nibhoyerwe mu-jeera, na bhunu ꞉naariga niri na emirimu gya okubhwira abhaanu Amangʼana Amajomu.

⁸ Kutyo enikomeeresha ati eniranga okurorana na emwe kweki, Nyamuwanga woone amenyere ati enaaika ekimari. Nibheendere muno rwa kutyo Kiriisitu Yeesu abheendere.

⁹ Enibhasabhira ku-Nyamuwanga ati obhwendi bhwemwe bhugenderere okubha bhwafu muno, mubhe na obhwenge, na obhumenyi bhwa amangʼana,

¹⁰ insonga mumenye na amangʼana amajomu aga okukora. Ayo niwe omubha mwimire emitima, mutari na engʼana rya kujuujuumirwa okuyikira orusuku runu Kiriisitu arisubha.

¹¹ Obhurame bhwemwe obhuuja okwijura amangʼana ga obhurengeresi ganu Yeesu Kiriisitu ambisiishe, insonga amangʼana gayo, gakore abhaanu bhagungye Nyamuwanga na okumukumangya.

Kutyo okubhoywa kwa Pawuro ꞉kwasakiiye Obhukiriisitu

¹² Mmbe woori Bhakiriisitu bheejaasu, eneenda mumenye kujomu ati amangʼana goone kutyo ganu ꞉gaanyoorere, gaasakiiye muno okuraasha Amangʼana Amajomu.

¹³ Abhariisi bhoone kutyo abha iinyumba ya ekikama anu, amwi na abhandi bhoone kutyo, bhamenyere ati nibhoyerwe ku-nsonga ya okukorera Kiriisitu Yeesu emirimu.

¹⁴ Gatari gayo era, okubhoywa kwani enu, kukomeesiishe emitima gya Abhakiriisitu bheejaasu bhaafu, na woori bhatakyoobhaya, bhakomeeye muno okuraasisha abhaanu Riingʼana rya Nyamuwanga.

¹⁵ Ni kimari ati, bhariwo abhaanu abhandi abharaasha amangʼana ga Kiriisitu bhari na orwango, na ni bharwani. Nawe bhariwo abhandi abharaasha emitima gyebhwe gyerere.

¹⁶ Bhanu bheerere emitima abhakora kutyo kwa okubha bhaanyendere, bhamenyere kujomu ati nituuywe ku-mirimu ginu insonga nirwanirire Amangʼana Amajomu.

¹⁷ Nawe abhandi bhayo, abharaasha amangʼana ga Kiriisitu bhari na orwango, bhateerere emitima gyebhwe wuri. Abhatoga ati abhatura okunyongesisha ebhinyansho bhinu eninyoora mu-jeera munu.

¹⁸ Nawe anye gayo gatakunsaasa, kimaka amangʼana ga Kiriisitu ngaraasibhwa, ibhe ati abharaasha bhakenere mabhiibhi, amwi ati bhakenere majomu. Kinu anye enijomererwa ni ati, abhaanu abharaasha Amangʼana Amajomu. Na ku-riyo enigenderera okujomerwa.

¹⁹ Nimenyere ati eniija okwerusibhwa ku-goone kutyo ganu ꞉gaanyoorere, kwa okubha omunsabhira ku-Nyamuwanga, na Mwoyo Omutaakatiifu wa Yeesu Kiriisitu kaansakira.

²⁰ Enirindirira nirangire muno na okwisiga ati, nitakuuja kuswasibhwa ku-ryoneryone. Rwa kutyo ꞉naariga ninkorera Kiriisitu emirimu ku-nsiku, nikwo kutyo enigenderera okwikomeesha mu-mutima gwani insonga Kiriisitu agungibhwe ku-goone ganu enikora, nibhe muworu amwi ati nibhe nifuuye.

²¹ Ku-anye okurama enirama ku-nsonga ya okukorera Kiriisitu emirimu, na raabhé nikafwa ni kujomu, kwa okubha nimenyere kinu nirinyoora.

²² Nawe raabhe nikagenderera okurama mu-kyaro, enigenderera okurora emirimu ginu enikora. Woori nitakumenya ni riiya erya okusora ku-mangʼana agabhiri gayo!

²³ Agabhiri gayo goone kutyo nigeendere muno, niigendere niikare amwi na Kiriisitu mu-rwire, kwa okubha kuyo nikwo okujomu ku-anye.

²⁴ Nawe, ku-nsonga yeemwe neendere nigenderere okubha-wo mu-kyaro anu.

²⁵ Ku-nsonga iyo, nimenyere ati eniija okwikara muno na emwe mwone kutyo, insonga mugenderere okujomerwa mu-bhwikirisha.

²⁶ Riibhaga rinu niribhasubha-ko kweki, muriirigirira muno Kiriisitu Yeesu okunsakira okusubha kw-imwe.

²⁷ Riingʼana rinu omwendwa mukore ni ati, gintungwa gyemwe gibhe rwa kutyo Amangʼana Amajomu aga Kiriisitu agaaika. Mukore kutyo insonga nikabha niijire eyo amwi ati nitaamiibhwe okuuja, nuungwe ati omugenderera kujomu, musimbiirire na mugwateene muri bhamwi mu-mitima, okurwanirira obhwikirisha bhunu ekinyoora okuturira ku-Mangʼana Amajomu.

²⁸ Na mwasiga kuubhaya abhasoko bheemwe, kw-ingʼana ryoneryone. Riyo niryo eriija okubheeresha ati abheene abhagya okusika, nawe emwe Nyamuwanga kaaja okubheerusha.

²⁹ Mubhe mumenyerega ati, Nyamuwanga ꞉ataabhayaaye kwikirisha Kiriisitu era, tari abhayaaye na okunyanka ku-nsonga yaaye.

³⁰ Riiremo rinu muri naryo woori, niryo ꞉mwaroraga noone nindirwana, na woori nikyagenderera naryo rwa kutyo omuungwa.