Luka 1 - Iesu Keriso imo pai-dubi naiba kitouti dubu nou pai mea 1941

¹ Nouri nana imoo naibaha niraromo‐diodumo, nana nouri oubi amidao titi gamooiha iatimoi, oroa aibo, neiio tau emahebaumo.

² Naiba opuito kiauri oubio wia wade kiatomuai oubio oroa nouri imoido naibaha nimowaduutiumo.

³ Ina nouri, Tiopiro e, ro mea dubu, mainararomo nou meaha oroa nouri mo roido titi modoboha iati, mabu nouri nana auwoha moro ainimohouti opuito kowahorowa wia dooudo.

⁴ Ina nou aibo nouri nana oubio roido tau ematomudioumo, ro naiheha umo aiwaiti.

⁵ Nou tauwa Heroda nou Iudea pai‐duburi, na’u kohena‐dubu, paina Sakario naibaha emidio, nouvia Abia gu mereri. Nou himia o’bo Arona gu beheri, nou paina Elisabeta.

⁶ Wia neiti meahari Iehova hohowa, Iehova bubui wia kiao wade’i neitio meamea idodiaiwatutiudo.

⁷ Wia neiti himia mere tatori, nouri Elisabeta teriri ina doihabuo neiti amakera aberera tau oitiudo.

⁸ Ina nou ta’uwa Sakario kohena kowaati nouro Iehova hohowa naibaha idodiai nou himia oubii nei ta’uwa.

⁹ Kemapoi na’i nouido ko’uri, nibo mea nana ipihamutimoi, ina nouro Iehova Tana‐moto naibaha odoruti, kohena‐oubi kidia aibo.

¹⁰ Wia oubi gemao, nibo mea nana kipihamuti ta’uwa, wade kirodumeaito naiba iaowaumo wegewa.

¹¹ Wia Iehova gururu‐mere na’u nouido omowaetai, nibo mea nana kipihamuti dodoo, nou tuiha hapuoudo naibaha otoa.

¹² Ina nou ta’uwa Sakario nou naibaha eauri nou imini godo‐godoha iraromodiowa wia nou tore emahebidiowa.

¹³ Wia gururu‐mere nouido naiba iaowa, Sakario tore moa nouri ro katoduti wade’i nouro airovidiotutiro ina ro o’boaro Elisabeta, roido mere aiwaroto wia nou paina Ioane roro aiwai‐dodoi.

¹⁴ Wia rovia pai‐paiha wia geiigeiiha wamahebidioi wia nou koroto hiwio’i oubi godogodo geii aiwai‐moiti.

¹⁵ Nouri nou auwoitiwa Iehova hohowa wia vine obo naiba karakara obo nouro idio raihe wia Tana‐urio nou goho aiwapee, nou koroto hiwio’i nouowa.

¹⁶ Wia Isaraela oubi godogodo, Iehova nei Urio‐abeaido nouro nei aiwai‐waorai.

¹⁷ Wia nou hohowa nouro opuito aiwau‐ro’ui, Elia iminii wia pupuo’i nou ramu; Abea giopu nei mereido nouro aiwai‐waorai naiba tumutumu‐oubi naiheha‐oubi meamea iminito nouro aiwai‐waorai naiba oubi nouro nei gamooiha aiwaiwai wia Iehovaido nouro nei meaha aiwai‐dodiai.

¹⁸ Wia Sakario gururu‐mereido naiba iaowa, Teiri mo naibaha umoiti, nouri mo amake duburi wia mo o’boa nou konobo godogodori.

¹⁹ Wia gururu‐merero omowameai, nouido naibaha iaowa, Movia Gaberielari, Iehova mabuwa ainotoi wia nouro mo tau notiodoiro roido iao’i wia nouri pai mea roido oworuoi.

²⁰ Ta’auri, roro mubaruo aiwaveai wia ro wade iao raihe hiwio’i nouowa nouri nana auwoha aiwaimo‐o’ui, mabu nouri mo karo wade’i roro irovidio biahai, nouri wadenei himia ta’uwa naiheha aiwaimo‐idodiai.

²¹ Wia oubio Sakario omotoiwaumo ina nei aiemaeawaumo mabu nouri Tana‐motowa nou tutu emidio.

²² Ina nou tauwa nou naibaha ohuowa nou neido wade orowahuoi maataha abooatutiwa, nouri nei umori urio nana Tana‐motowa nou tau eauri, mabu nouri nouro neido tuito erematioutituti wia mubaha naibaha emidiotuti.

²³ Wia nou ta’uwa nou himia kiwaati hiwio’i oboiri nou himia motoito nou naibaha araiwairo.

²⁴ Wia nouri hiwio’i dooudo, nou o’boa Elisabeta naibaha aihiouti wia bara 5 nou himia piroha emidio. Nou naiba iaowa:

²⁵ Nou aibo Iehova moido tau ododiai nouri hiwiowa nou moido naibaha eauri mo hipo nana oubi mabudo iahihiti.

²⁶ Bara 6 ina oropoiiomo, na’u gururu mere, paina Gaberiela, Iehovaro naibaha otiodoiro, Galilaia hapuo’i noito, oopo paina Nasareta.

²⁷ Na’u beheido, nou uramo paina Iosepa, Davida gu mereri. Behe nou paina Maria.

²⁸ Wia gururu‐mere beheido naibaha odoro nou naiba iaowa; Niainiai ro. Rovia tiaha behe mea, Iehova ro mabuwa remidio.

²⁹ Ina nou ta’uwa nouro naibaha eauri, Maria tiaha tore emahebidio nou karo wadei wia nou iminiwa naibaha araromo touna wade raro nou.

³⁰ Ina gururu‐mere nouido naiba iaowa, Maria tore moa, Iehova tiaha niainiai roido.

³¹ Taauri, rovia niroro aiwahioti wia na’u ohio roro aiwarotoi wia nou paina roro aiwai‐dodoi, IESU.

³² Nouwia auwoitiwa, wia nou paina auwo waimo‐emahooi Pai Urio Mere wia nou agei dubu Davida nou himia pai‐kemidio‐batii Iehovaro nouido aiwamaai.

³³ Wia Iakabo gu mere’i nouro nei ohuwa pai aiwaiti kemidio kemidio tuturi wia nou himia bububati oropoiioumo raihe.

³⁴ Ina Maria gururu‐mereido naiba iaowa: Teiri wauro’ui mabu nouri dubu mo umo biahai?

³⁵ Gururu‐mere naibaha omowameaiwa wia nouido naiba iaowa: Tana‐urio roido aiwau‐ro’ui wia Pai‐urio pupuo’i ro aiwateemai mabu nouri Tana na roro aiwarotoi Iehova Mere nou aiwa‐idodoi.

³⁶ Wia ta’auri ro mabira Elisabeta, nouro na’u ohio nou niroro tau ahioti ina nou abereri wia nouri bara 6 nouowa nouri o’bo oubio terito ahootutiumo.

³⁷ Mabu nouri nana auwoha Iehovawia umori kidodiai.

³⁸ Wia Maria naiba iaowa; Ta’auri Iehova Hiwaa‐behe. Ro kiao wade moido naiba mo’umo. Wia gururu‐mere nou mabudo naibaha araiwai.

³⁹ Wia Maria naibaha oto’a wia nouri hiwio’i akabu batito hago‐hagoha naibaha o’uwa, Iuda oopo na’uito.

⁴⁰ Wia nouro Sakario motoito naibaha odoro, Elisabeta naiba omohoiio.

⁴¹ Ina nou ta’uwa Elisabetaro, Maria komohoiio wade naibaha orovidio, bamu nou mere daimowa naibaha imovio wia Elisabeta giopu aiapee Tana‐urioro.

⁴² Nouro wade niimoito naibaha omohoiio naiba iaowa; Rovia geiigeiihari ata upi aibo biahai ina nouri mere daimowa kemidio na’i nouvia geiigeiihari.

⁴³ Wia touna nidodiai mo, nouri mo pai‐dubu mamu moido nou o’uro?

⁴⁴ Nouri nou ta’uwa ro komohoiioi mo gareito norovidio, bamu mo mere daimowa naibaha imovio geii ramu.

⁴⁵ Wia nouri o’bo nouvia geiigeiihari mabu nouri nou naibaha iraromodio Iehova kiao wade nouido aiwauro‐idodiai.

⁴⁶ Ina Maria naiba iaowa: Mo urio Iehovaido ainemabitidio:

⁴⁷ Mo imini tiaha geii neremahebidio Iehovaido, mo kitoruti‐urio.

⁴⁸ Nou hiwaa‐behe hipohipoha nouro tau eauri: Wia ta’aurimo, nou ta’uwa wia ata ta’uwa oubi auwoha neiio mo geiigeiiha naimo emahooi.

⁴⁹ Ina nouri Urio’i nouvia auwoihari, nouro moido auwo mea nana tau idodiai. Wia nou paina tanari.

⁵⁰ Oubio nouido tore emahebidiomoi nou niainiai neimu emidio, Aramio amidamu wia aramio amidamu.

⁵¹ Tiaha pupuo na nou tuito nouro ododiaiwa. Kiparo‐oubi, nei imini ramu, nouro tau iatuuti.

⁵² Pai‐oubi, nei himia kemidio batiudo nouro iahouiuti Wia muni‐oubi nouro nei pai aiwaiwai.

⁵³ Oubi dou niroro naibaha iai nei niro nouro tau iapeuti mea nana ramu Wia oubi, nei nana horohorori nouro buru aibo tau itiodoi.

⁵⁴ Isaraela, nou hiwaa mere nouro tau owabai, Nouri nou himia niainiai nou dodo‐koiti biahai.

⁵⁵ (Nou aibo nou wade imo abeamioido nou tau aro), Aberahamoido wia nou himia aramioido idaa idaa.

⁵⁶ Wia Maria noumu emidio bara neewa na’u tariwai, ina nou himia motoito naibaha araiwai.

⁵⁷ Ina Elisabeta merero kaai hiwio’i naibaha owea wia ohio nouro naibaha oroto.

⁵⁸ Nou himia oopo oubi naiba nou gu oubi umo naibaha oitiumo Iehova nouido auwo niainiairi wia nei noumu geiigeiiha naibaha imahebidiowaumo.

⁵⁹ Ina hiwio 8 oropoiioumo nei naibaha o’umo nouri mere tama ahiaimoi wia nou paina Sakario neiio naibaha idodoumo nou abea painaito.

⁶⁰ Wia nou mamuro naibaha imowameai naiba iaowa: O’o, nou paina Ioane taiidodoumo.

⁶¹ Wia nei nouido naibaha iaowaumo: Ata dubu ro himia oubimu paina naiba iroro biahai.

⁶² Nou ta’uwa nei nou himia abeaido tuito naibaha atodoumo boti paina idodo niroi.

⁶³ Wia titi kiati nana nouro naibaha atodoi wia nou titi naibaha iatiwa naiba iaowa; Ioane nou painari; ina nei auwoha aiemaeawaumo.

⁶⁴ Ina nou ta’uwa nou maata naibaha araerai, nou mototobe naibaha omopiwo wia nou naibaha iaowa wia Iehova nouro naibaha emabitidiotuti.

⁶⁵ Wia nei mabuwa kemidio oubi auwoha neiio tore imahebidiowaumo wia nouri kiao wade auwoha neiio Iudea akabu batibati auwohawa naibaha iwaduutiwaumo.

⁶⁶ Wia nouri kirovidio oubii wade nouri nei giopuwa neiio naibaha idiamowaumo naiba iaowaumo, Tou aiboi mere’i nouro wauro’u’i, nouri Iehova tu noumu emidio.

⁶⁷ Nou abea Sakario, Tana‐urioro nou imini naibaha apee wia nou wade totomuito aro, nou naiba iaowa:

⁶⁸ Iehova, Isaraela Urio‐abeari, Geiigeiiha taitiro, nouri nou himia oubido nou naibaha o’uwaro wia nouro nei tau itouti.

⁶⁹ Wia pupuo Kiitouti‐dubu imoido nouro tau ahomai, Nou himia hiwaa‐mere Davida motowa.

⁷⁰ (Naiba tauo tauo nou wade naibaha owateai nou peroveta tana oubi nei maataito.)

⁷¹ Imo korowaematuti‐oubi nei mabudo itoutimoi wia imo oriha kiauri oubi auwoha imoo nei tuudo itoutimoi.

⁷² Niainiai nana’i imo abeaido idodiaimoi Wia nou himia tana‐kowateai wade iraromomoi.

⁷³ Nouri kowateai‐wade imo abea Aberahamo nouro nouido wade naibaha owateai.

⁷⁴ Imo tore kimaati nana nouro aiwai‐tateai, Wia imo korowai‐ematuti oubi nei tuudo imo nouro ainaitouti.

⁷⁵ Mabu nouri imo nouido ainaimo‐emabitidioi, tana kidia ramu wia meamea kidia ramu nou hohowa, imo kiiro hiwio’i auwoha.

⁷⁶ Wia rovia mo ohiori, peroveta dubu auwoauwo Pai‐dubuido oubio ro aiwaimo idodoi: Nouri Pai‐dubu hohowa roro aiwau‐ro’ui, nou himia nave meamea idodiaimoi.

⁷⁷ Kiitouti nana nou himia oubi umoitimoi Nouri neiri ubauba kidia’i kiaho’iuti.

⁷⁸ Kiheeai hiwio imoido toboroudo tau o’uro Mabu nouri imo Urio‐abea nou niainiairi.

⁷⁹ Duriiwa kemidio oubido wia koroihi gudibowa kemidio oubido Pida imaatimoi: Imo kono amea‐amea naveito iwaboiiatutimoi.

⁸⁰ Wia nouri mere nou noro aiwaiti, nou urio pupuo naibaha waiti wia nou buru batiwa naibaha wamidiotuti hiwio’i noito Isaraela oubido nouro nou himiaro naibaha obodoi.