Yal Tơlik 13 - Sră Goh 2018

Bàr nơm phan poan jơng

¹ Gen añ gŏ dô nơm phan poan jơng guh bơh dàlềng, gơ gơs jơt nơm ngke mơ poh nơm bồ, ală ngke ndau jơt nơm sơgơn bơtau, mơ di ală bồ gơs dô nơm sơnđan tràl sơrbil di Yàng Tom Trồ.

² Phan poan jơng añ gŏ hơ̆ gơlơh be klìu sơmañ, jơng be jơng jơgơu, bơr be bơr klìu triă. Nagrài ai phan poan jơng hơ̆ in gơnap gơnoar, sơbàn mơ gơnoar dờng gơ dê.

³ Añ kung gŏ tòm ală bồ hơ̆ gơs dô nơm bồ gơlơh be gơs sồt kơnjơ̆, mơya sồt pal chơt hơ̆ neh geh sơmbòi, mơ jơh dunnia ai lơh krơi mơ jat phan poan jơng hơ̆.

⁴ Bol khai duh khoai nagrài, tài bơh gơ neh ai phan poan jơng in gơnoar gơ dê; mơ bol khai kung duh khoai phan poan jơng hơ̆ sơl mơ đơs: “Ñcau ndròm be phan poan jơng taih? Ñcau rgơi tòmlơh mơ gơ taih?”

⁵ Neh ai phan poan jơng in dô nơm bơr đơs ală jơnau pơnhừ să mơ tràl sơrbil di Yàng Tom Trồ, mơ gơ kung geh ai gơnoar at bồ tòm poan jơt bàr kơnhai.

⁶ Gơ neh pò bơr đơs ală jơnau tràl sơrbil tòmdră mơ Yàng Tom Trồ, tràl sơrbil di sơnđan Kơnràñ, di tiah ơm Kơnràñ dê, hơ̆ la ală cau ơm hơđang trồ.

⁷ Gơ geh ai gơnoar tòmlơh mơ ală cau sàng goh mơ gơ geh pha lin rlau. Gơ kung geh ai gơnoar hơđang jơh ală jơi bơtiàn, làng bol, jơnau đơs mơ lơgar.

⁸ Jơh ală cau ơm tòm plai ù rơp duh khoai gơ, hơ̆ la ală cau lài mơ tŭ òhềt crơng gơs trồ tiah sơnđan mat bol khai ò geh cih tòm sră bơta kis Belàt Kòn dê neh kong chơt.

⁹ Cau lơi gơs tồr, iat tĕ!

¹⁰ Dilah neh lơh nền cau lơi pal kòl kup cèng, gen cau hơ̆ rơp kong kup cèng; dilah cau lơi pal kong chơt mơ đào, gen khai pal kong sreh chơt mơ đào sơl. Do la bơta kong ơt mơ bơta dòn ală cau sàng goh dê.

Phan poan jơng dơ̆ bàr

¹¹ Añ gŏ tai dô nơm phan poan jơng ndai guh bơh tòm ù, gơ gơs bàr nơm ngke kung be belàt kòn, mơ gơ đơs be nagrài.

¹² Gơ ngui jơh gơnoar phan poan jơng sơnròp dê, di đap phan poan jơng hơ̆. Gơlơh plai ù in mơ ală cau ơm tòm hơ̆ duh khoai phan poan jơng sơnròp, la phan poan jơng neh gơs sồt kơnjơ̆ mơ neh geh sơmbòi.

¹³ Gơlơh ală tềl krơi dờng, tian gơs sồr ồs bơh đang trồ mù tòm ù di đap kòn mơnus.

¹⁴ Gơ pơrlồm ală cau ơm tòm plai ù bơh ală tềl krơi gơ geh gơnoar lơh di đap phan poan jơng, mơ sồr bol khai mòn phan poan jơng in dô nơm rùp tòm toh be gơ, hơ̆ la phan poan jơng neh gơs sồt mơ đào mơ gam kis.

¹⁵ Gơ kung geh gơnoar ai nhơm kis rùp phan poan jơng hơ̆ in tian gơs rùp hơ̆ kung rgơi đơs sơl, mơ gơlơh ală cau lơi in ò duh khoai rùp phan poan jơng hơ̆ gen pal kong tơnchơt.

¹⁶ Mơ gơ kung lơh jơh tơl nă in cau dềt hala dờng, cau pas gơs hala rƀah lơòi, cau geh khat gơboh hala cau dĭ gơna, gen pal kong gơs dô nơm tềl di mpàng tê ma hala di bìng liang,

¹⁷ tồ ò gơs dô nă cau lơi rgơi rwat hala tac, mìng ală cau neh gơs tềl phan poan jơng dê, hơ̆ la sơnđan hala khà sơnđan gơ dê.

¹⁸ Behơ̆ pal gơs bơta jak chài: Cau lơi git wă gen kòp tĕ khà phan poan jơng dê, bơh hơ̆ la dô nơm khà kòn mơnus dê; khà la prau rhiang prau jơt prau.