Sră Pơyoa Pol Dê Pơyoa Tit In 3 - Sră Goh 2018

Broă lơh lòt cau dòn jat Yàng dê

¹ Tơngkah tĕ ală cau dòn jat Yàng pal dòn duh ală cau kwang mơ cau gơnoar at bồ, pal dòn bơr, rcang sir nàng lơh jơh ală broă niam,

² bañ bơrsèl tơnhial di cau lơi, bañ tòmpìt tòmhà, gơtòmsòr tĕ, bềng bơta niam lơnhơn gơwèt mơ jơh tơl nă cau.

³ Bơh lài òr bol he kung tùl gơla, ò dòn bơr, gơkòl cau pơrlồm, lơh gơs dĭ gơna ală bơta hàm kòñ is mơ ală bơta iơh bơsak mơ bơta tòmlah tòmring, kong cau gơjrañ kơuềng mơ kung gơjrañ kơuềng bal mơ gơp sơl.

⁴ Mơya tus di tŭ nùs kơ̆ dơn Yàng Tom Trồ dê la Yàng Dong Klàs bol he dê mơ bơta kòñ gơboh Kơnràñ dê gơwèt mơ kòn mơnus neh geh ràng tơlik rau, gen Kơnràñ dong klàs bol he,

⁵ ò di bơh broă song ring să tòm bol he neh lơh ò, mơya jat nùs kòñ nđàc Kơnràñ dê, kơnòm di bơta rào goh bơh bơta deh wơl pa mơ bơta tòmgơl pa tòm Yàng Hwềng Goh.

⁶ Yàng Tom Trồ neh tuh Yàng Hwềng Goh hơđang bol he dô bă bềng lìu bơh Yàng Jesu Krist la Yàng Dong Klàs bol he dê,

⁷ tồ bol he in kơnòm di bơta nđàc Kơnràñ dê mơ geh kòp la song ring, bol he gơlik gơs cau pơrdòn mơ gơn kơnòm bơta kis gam sùm sùm.

⁸ Jơnau hơ̆ la nền cê ngan, añ kòñ mê đơs nền ală bơta hơ̆ dô bă pràn kơldang tồ ală cau in neh dòn jat Yàng Tom Trồ gen jơh nùs tơryang tơryồng lơh ală broă niam, hơ̆ la ală bơta niam mơ gơs kwơ cau in.

⁹ Mơya pal pleh di ală bơta tòm pơndang tùl gơla, ală jơnau jòi yau jat jơi, ală bơta pơndang mơ tòm pơndang bal bơh bơta boh lam, bơh ală bơta hơ̆ la ò kwơ mơ roh lơm.

¹⁰ Tơnơ̆ mơ tŭ neh bơto kràñ cê bàr pe dơ̆ cau cah is mpồl in rau, gen pleh tĕ bơh di khai,

¹¹ bơh git lah cau behơ̆ la cau tul kră mơ kư̆ tìs glài, gen khai lơh nền is glài khai dê.

Ală jơnau nting sồr ndai

¹² Tòm tŭ añ sồr Atemas hala Ticikơ lòt tus hơ mê, gen jơh nùs lòt tus tĕ hơ añ tòm Nikôpôlis, bơh añ neh lơh nền ơm tềng hơ̆ tòm kơnhai noat.

¹³ Jơh nùs tĕ rcang Jenas in lòt gùng, la cau bơto bơta boh lam, mơ Apôlôs, nàng bol khai in ò siơ̆u phan lơi.

¹⁴ Ală cau bal mơ bol he kung pal bơtê lơh ală broă niam, nàng dong kòl tòm tŭ pal càng, tồ bañ kis dô rài kis ò gơlik cồng nha.

¹⁵ Jơh ală cau ơm mơ añ còp să mê. Dan còp să ală cau kòñ gơboh di bol he tòm bơta dòn. Dan bơta nđàc ơm bal mơ jơh tơl nă oh mi.