Rutơ 4 - Sră Goh 2018

Bôô bau mơ Rutơ

¹ Tŭ hơ̆ mo, Bôô guh hơ mpồng ƀòn dờng mơ nggui tềng hơ̆, cau gơp bơtiàn gơs gơnoar tơwài mơ Bôô neh đơs, kung lòt gan tềng hơ̆. Behơ̆ Bôô đơs lah: “Ơ cau bơyô, tus hơ do mơ nggui.” Gen cau hơ̆ tus mơ nggui.

² Bôô jà jơt nă cau tòm mpồl cau kwang kra ƀòn dờng dê mơ đơs lah: “Dan ală ồng nggui tềng do.” Gen bol khai nggui.

³ Gen Bôô đơs mơ cau gơp bơtiàn gơs gơnoar tơwài wơl lah: “Naômi rê bơh Môap kòñ tac dô pet ù gơrê mơ Elimelek bi bol he dê.

⁴ Añ kòñ yal tơnggit bi in mơ kơlôi lah bi pal blơi tĕ gơ di đap ală cau nggui tềng do mơ di đap ală cau kwang kra làng bol añ jê. Dilah bi kòñ tơwài gơ gen tơwài tĕ, mơya dilah bi ò bài gen yal tĕ añ in git, tài bơh ò gơs cau lơi ndai gơs gơnoar tơwài wơl gơ rlau mơ bi, mơ tơnơ̆ mơ bi gen gơnoar hơ̆ gơrê mơ añ.” Cau hơ̆ đơs lah: “Añ rơp tơwài wơl gơ.”

⁵ Gen Bôô đơs lah: “Tòm ngai mơ bi blơi sre bơh di Naômi mơ bơh di Rutơ cau Môap gen bi dòp cau ùr bơnrau cau chơt dê nàng tơrbŏ sơnđan cau chơt bal mơ sre brê khai dê.”

⁶ Kơno behơ̆ gen cau tòm gơp bơtiàn gơs gơnoar tơwài wơl đơs lah: “Behơ̆ añ ò rgơi tơwài wơl gơ, tài bơh digơlan añ rơp lơh roh gơcoh sre brê añ jê. Să tòm bi tơwài wơl tĕ, añ ò rgơi tơwài gơ ò.”

⁷ Tòm rài yau tòm Israel, tòm tŭ tơwài hala tac blơi ù tiah sre brê, dilah kòñ lơh nền bơta tòmho bal gen cau đah do hồ gơltau jă he dê mơ ai cau đah ne in. Hơ̆ la bơta pal lơh nàng lơh nền cê jat bơta boh lam tòm tŭ tòmgơl cau tòm ù tiah sre brê dê tòm Israel.

⁸ Behơ̆ cau gơp bơtiàn gơs gơnoar tơwài wơl đơs mơ Bôô lah: “Să tòm bi blơi tĕ gơ.” Gen khai hồ gơltau jă khai dê.

⁹ Gen Bôô yal tơnggit mơ ală cau kwang kra bal mơ jơh làng bol lah: “Ngai do ală ồng la cau lơh cơng lah añ neh blơi bơh di Naômi jơh sre brê Elimelek dê mơ jơh sre brê Kilaiôn mơ Mahlôn dê.

¹⁰ Mơ añ kung dòp Rutơ cau Môap, cau ùr bơnrau Mahlôn dê, lơh gơs bau añ, nàng tơrbŏ sơnđan cau chơt dê bal mơ sre brê khai dê, nàng sơnđan khai dê ò roh bơh digùl hìu nhă khai dê hala bơh dê sră cih sơnđan mat cau tòm ƀòn dờng dê. Ngai do ală ồng la cau lơh cơng.”

¹¹ Gen jơh ală cau kwang kra mơ jơh làng bol ơm di mpồng dờng đơs lah: “Bol hi la cau lơh cơng. Dan Yàng Jehôwa lơh cau ùr rơp mut tòm hìu mê gơlik gơs kung be Racel mơ Lea la bàr nă cau neh bơtào hìu Israel. Dan mê in geh jòng ro tòm Ephrata mơ geh tiơng pơnro tòm Betlehem.

¹² Kơnòm di kòn sau mơ Yàng Jehôwa rơp ai mê in bơh cau ùr do, dan hìu nhă mê in gơlik kung be hìu nhă Pheres mơ Thamar neh deh Juda in.”

Jơi bơtiàn Dabit dê

¹³ Behơ̆ Bôô bau mơ Rutơ, khai ơm bal mơ bau khai mơ Yàng Jehôwa ai Rutơ in bun mơ deh dô nă kòn klau.

¹⁴ Ală cau ùr đơs mơ Naômi lah: “Jòng ro Yàng Jehôwa, bơh ngai do Kơnràñ ò sang lòi mò bơh neh ai mò in dô nă cau gơp bơtiàn dong tơwài. Dan kòn klau do gơlik tiơng pơnro tòm Israel!

¹⁵ Khai rơp lơh pa wơl rài kis mò dê, mơ ròng siam mò tòm tŭ kra. Bơh ƀan mò dê la cau kòñ gơboh di mò, mơ la kwơ màng mò in rlau mơ poh nă kòn klau, neh deh mò in.”

¹⁶ Naômi kơnđu kòn dềt hơ̆ mơ tŭ khai dê bơnô he, mơ ròng siam khai.

¹⁷ Ală cau ùr gơp ƀòn đơs lah: “Naômi gơs dô nă kòn.” Mơ bol khai tơmoh sơnđan kòn dềt hơ̆ la Ôbet: Ôbet la bèp Jese, mơ la ồng Dabit dê.

¹⁸ Behơ̆ gen, do la hìu nhă Pheres di: Pheres la bèp Hesrôn,

¹⁹ Hesrôn la bèp Ram, Ram la bèp Aminadap:

²⁰ Aminadap la bèp Nasôn, Nasôn la bèp Salmôn,

²¹ Salmôn la bèp Bôô; Bôô la bèp Ôbet;

²² Ôbet la bèp Jese mơ Jese la bèp Dabit.