Rutơ 3 - Sră Goh 2018

Rutơ mơ Bôô ơm tòm làn kòi

¹ Naômi po me Rutơ đơs mơ khai lah: “Ơ kòn ùr añ jê, añ pal jòi tiah ring lơngai kòn in, nàng bơta hơ̆ rơp niam kòn in.

² Bôô la cau gơp bơtiàn bol he dê, bal mơ ală dĭ ùr khai dê mơ kòn neh lơh broă. Khai rơp tòmpơr kòi màc tòm làn mang do.

³ Tŭ do um tĕ mơ bong mơñà bơlhu tòm să kòn, mơ soh ồi ào niam rlau jơh mơ mù hơ làn jă kòi; mơya bañ lòi khai git gơs kòn tềng hơ̆ jơl tus di tŭ khai neh sir sa mơ hùc rau.

⁴ Tòm tŭ khai bic, sền tĕ tiah lơi khai bic, gen tus pò ồi tơ̆ bơh di jơng khai mơ bic tềng hơ̆. Khai rơp yal ai in ñchi bơta ai pal lơh.”

⁵ Rutơ ho lah: “Añ rơp lơh jat jơh ală bơta mè đơs.”

⁶ Behơ̆ khai mù tus hơ làn jă kòi mơ lơh jat ală bơta po me sồr khai lơh.

⁷ Tòm tŭ Bôô neh sir sa mơ hùc rau, mơ gơs nùs chò hòp, khai lòt bic di jơng ƀut kòi. Rutơ tus òm mơ pò ồi tơ̆ di jơng Bôô mơ bic tềng hơ̆.

⁸ Tòm gùl mơnang Bôô nrơt mơ pơrlơ̆ să: Khai gŏ gơs dô nă cau ùr bic di jơng khai dê.

⁹ Bôô lùp lah: “Ñcau hơ̆ taih?” Rutơ ho lah: “Añ la Rutơ, cau dĭ ồng dê. Dan ồng tơntơ̆ ào bơdìh ồng dê hơđang dĭ gơna ồng, bơh ồng la cau gơp bơtiàn rềp añ jê.”

¹⁰ Bôô ho lah: “Ơ kòn ùr añ jê, dan Yàng Jehôwa ai lơngai ai in; bơta dòn song ai lơh dơ̆ do la niam rlau mơ bơta neh lơh lài òr: ai ò lòt jat ală cau gam pơnu, bulah la cau pas gơs hala cau rƀah lơòi.

¹¹ Tŭ do, ơ kòn ùr añ jê, bañ rngòt. Añ rơp lơh ai in jat jơh ală bơta ai neh dan, bơh jơh mpồl làng bol añ jê git ai la dô nă cau ùr kwơ màng.

¹² Mơya tŭ do, bulah ngan añ la cau gơp bơtiàn rềp, gơs dô nă cau gơp bơtiàn rềp rlau mơ añ.

¹³ Ơm tĕ tềng do mang do, tus diàng drim hìng, dilah cau hơ̆ kòñ dong tơwài gen niam, lòi khai lơh bơta hơ̆, dilah khai ò bài lơh be dô nă cau tơwài wơl ai in, gen kung be Yàng Jehôwa gam kis sùm lah añ rơp lơh bơta hơ̆ be dô nă cau tơwài wơl ai in. Ơm bic tĕ jơl tus àng hìng.”

¹⁴ Behơ̆ khai ơm bic di jơng Bôô jơl tus àng drim, mơya khai guh gòñ lài mơ tŭ gơs cau lơi rgơi đal git. Bôô đơs lah: “Bañ lòi cau in git la gơs cau ùr mut tòm làn jă kòi.”

¹⁵ Khai kung đơs tai lah: “Cèng tĕ añ in ào jrùh ai soh, mơ đơng kơ̆.” Tòm tŭ Rutơ neh đơng gơ, gen Bôô tuh prau khiau kòi màc mơ ơn gơ hơđang ngkòi Rutơ. Gen Bôô rê mut tòm ƀòn dờng.

¹⁶ Khai rê tus hơ po me khai gen Naômi lùp lah: “Ơ kòn ùr añ jê, mbe gơlơh broă hơ̆ taih?” Gen Rutơ yal wơl jơh ală bơta Bôô neh lơh khai in,

¹⁷ mơ đơs tai lah: “Khai ai añ in prau khiau kòi màc do mơ khai đơs lah: ‘Bañ rê wơl tê gòi hơ po me ai dê.’”

¹⁸ Gen Naômi đơs lah: “Ơ kòn ùr añ jê, gơn tĕ jơl tus di tŭ ai git broă hơ̆ gơlik gơs mbe lơi, bơh cau klau hơ̆ rơp ò ơm rlô jơl tus di broă geh lơh sir tòm ngai do.”