Philip 4 - Sră Goh 2018

Jơnau bơto tơngkah

¹ Behơ̆ gen, ơ ală oh mi đềt mềr ngan, la bơta hòn chò mơ sơgơn bơtau añ jê, ơ cau kòñ gơboh ngan añ jê, ntào kơ̆ tĕ tòm Yàng.

² Añ bơto tơngkah Ebôdi mơ Sintikơ pal gơs dô nùs kơlôi bal tòm Yàng.

³ Ơ bi la cau dòn song tui yô bal mơ añ, añ kung dan bi dong bàr nă cau ùr hơ̆, bơh bol khai neh kong bòl glar lơh broă bal mơ añ tòm Jơnau Niam; kung be Kleman mơ ală oh mi ndai lơh broă bal mơ añ; sơnđan mat ală cau hơ̆ Yàng Tom Trồ neh cih tòm sră bơta kis rau.

⁴ Hòn chò tĕ tòm Yàng sùm sùm. Añ đơs wơl tai: Hòn chò tĕ!

⁵ Ai tĕ jơh ală cau in git bơta kong ơt oh mi dê. Yàng neh rềp rau.

⁶ Bañ kơlôi rcang bơh bơta lơi, mơya tòm jơh ală bơta ai tĕ jơnau hòi dan, rac dan, mơ bơta ưnngài mơ yal tơlik ală bơta kòñ dan he dê Yàng Tom Trồ in git.

⁷ Gen bơta lơngap lơngai Yàng Tom Trồ dê, la bơta jòng rlau jơh ală bơta git wă, rơp sền gàr nùs mơ bơta kơlôi sơnơng oh mi dê tòm Yàng Krist Jesu.

⁸ Lồi tơnơ̆, ơ oh mi, dilah bơta lơi song ngan, bơta lơi màng ryŭ; bơta lơi song ring, bơta lơi sàng goh, bơta lơi pal kòñ gơboh, bơta lơi gơs pơnro niam, dilah gơs bơta kơ̆ dơn lơi, dilah gơs bơta lơi pal jòng ro, gen oh mi pal kơlôi sơnơng tĕ di ală bơta hơ̆.

⁹ Dilah bơta lơi oh mi neh bơtê, neh dòp geh, neh kơno bơh añ mơ neh gŏ tòm añ, lơh jat tĕ, gen Yàng Tom Trồ la Bơtau ai bơta lơngap lơngai rơp ơm bal mơ oh mi.

Pol ưnngài bơh ală phan pà gòi

¹⁰ Añ gơs nùs hòn chò ngan tòm Yàng, tài bơh tus di tŭ do sồng oh mi yal tơlik nùs kơlôi rcang gơwèt mơ añ; ngan oh mi neh kơlôi rcang bơh bơta hơ̆, mơya oh mi òhềt gơs tŭ lơmpah.

¹¹ Ò di añ kòñ đơs bơh bơta siơ̆u siar añ jê, bơh añ neh bơtê bulah tìp bơta lơi kung hừh nùs ơm behơ̆.

¹² Añ git mbe lơh tòm tŭ rƀah lơòi, mơ kung git mbe lơh tòm tŭ geh tơngkah tơngkañ. Tòm jơh ală bơta mơ jơh ală tiah, bulah hòm lai hala jơgloh, bulah tơngkah hala siơ̆u, añ neh git mbe lơh tòm ală bơta hơ̆ rau.

¹³ Añ rgơi lơh jơh ală bơta la kơnòm di Bơtau ai bơtơl pràn añ in.

¹⁴ Bulah behơ̆ oh mi gơs pơnah tòm bơta bòl glar añ jê, hơ̆ la niam ngan.

¹⁵ Ơ cau Philip, să tòm oh mi kung git lah dơ̆ añ rơp sơntòm bơto Jơnau Niam, tòm tŭ añ sang lơgar Masedoan, gen rlau mơ oh mi ò gơs Hìu Jum Goh lơi ndai gơs pơnah bal mơ añ tòm bơta ai phan ngui sa añ jê;

¹⁶ bơh tòm Tesalônika oh mi neh bàr pe dơ̆ pơyoa phan ngui sa añ in.

¹⁷ Hơ̆ ò di la añ kòñ gơs phan ai gòi, mơya añ kòñ gŏ cồng nha gơbơtơl oh mi in tòm ală phan ai gòi.

¹⁸ Añ geh wil tơl mơ tơngkah tơngkañ; añ geh bềng lìu bơh neh dòp geh ală phan ai gòi bơh Epaphrôdik mơ oh mi pơyoa añ in, hơ̆ la dô nơm phan ơn gơs ƀô bơlhu, la dô nơm phan pơdơng geh Yàng Tom Trồ dòp mơ niam nùs Kơnràñ.

¹⁹ Yàng Tom Trồ añ jê rơp ai oh mi in ală bơta oh mi pal càng, jat be bơta pas gơs bơta gơklŏ Kơnràñ dê tòm Yàng Krist Jesu.

²⁰ Dan bơta gơklŏ gơrê mơ Yàng Tom Trồ la Bèp bol he dê sùm sùm ò lồi. Amen.

Jơnau còp să ală cau sàng goh

²¹ Dan còp să kòp nă cau sàng goh tòm Yàng Krist Jesu; ală oh mi ơm mơ añ còp să ală oh mi.

²² Jơh ală cau sàng goh còp să oh mi, lài ngan la ală cau tòm hìu nhă Sesa dê.

²³ Dan bơta nđàc Yàng Jesu Krist dê ơm bal mơ hwềng nùs oh mi dê.