Philip 3 - Sră Goh 2018

Bơta song ring Ngan

¹ Lồi tơnơ̆, ơ oh mi añ jê, hòn chò tĕ tòm Yàng! Añ ò dil cih tai ală broă do oh mi in bơh hơ̆ la lơngap lơngai ală oh mi in.

² Kơrhia tĕ di ală so, kơrhia tĕ di ală cau lơh broă iơh bơsak, kơrhia tĕ di bơta siat gơltau ma blac.

³ Bơh să tòm bol he la cau kong siat gơltau ngan, la cau kơnòm di Yàng Hwềng Yàng Tom Trồ dê mơ duh khoai, jòng să tòm Yàng Krist Jesu, mơ ò dòn kơnòm dê poac să.

Pol bơh Bơtau Krist mơ sang lòi Jơh Ală bơta

⁴ Ngan să tòm añ kung rgơi dòn kơnòm di poac să. Dilah cau ndai kơlôi khai rgơi kơnòm di poac să, gen añ kung geh rlau tai.

⁵ Añ neh kong siat gơltau tòm ngai phàm, añ la cau làng bol Israel dê, tòm jơi bơtiàn Benjamin, cau Hebrơ, kòn cau Hebrơ dê, jat bơta boh lam gen la cau Pharisi;

⁶ bơh nùs ngac ngar gen la cau kup kơryan Hìu Jum Goh, ai bơh bơta song ring bơta boh lam dê gen ò gơs tiah geh lah pơrhơng.

⁷ Mơya tài bơh Bơtau Krist, añ neh sền ală cồng nha añ jê kung be bơta roh lơm.

⁸ Ngan behơ̆, añ sền jơh ală bơta kung be bơta roh lơm, bơh bơta dòp git Yàng Jesu Krist, Yàng añ jê, la dờng màng rlau jơh; bơh Kơnràñ mơ añ neh sang lòi jơh ală cồng nha hơ̆. Añ sền ală bơta hơ̆ kung be thul ơmul tồ añ in dòp geh Bơtau Krist,

⁹ mơ geh ơm tòm Kơnràñ, ò di kơnòm di bơta song ring is añ jê bơh bơta boh lam mơ tus, mơya bơh bơta dòn di Bơtau Krist mơ geh, hơ̆ la bơta song ring tus bơh Yàng Tom Trồ bơh bơta dòn mơ geh;

¹⁰ nàng añ in rgơi geh git Bơtau Krist mơ gơnap gơnoar bơta kis wơl Kơnràñ dê, mơ geh pơnah tòm bơta jê sồt Kơnràñ dê, lơh añ in gơlik gơs be Kơnràñ tòm bơta chơt Kơnràñ dê,

¹¹ nàng dilah rgơi, añ geh tus di bơta kis wơl bơh bơta chơt.

Bơta ntoat tus hơ tơnggu

¹² Hơ̆ ò di la añ neh geh rau, hala neh tus di bơta wil tơl ò, mơya añ gam ntoat tồ sơmbat geh, bơh să tòm añ neh geh Yàng Krist Jesu sơmbat rau.

¹³ Ơ oh mi, añ ò kòp añ neh sơmbat geh rau, mơya añ kư̆ lơh dô bơta: Lòi hŭi ală bơta bơh ngkòi, mơ ntoat jat ală bơta hơđap;

¹⁴ Behơ̆ añ ntoat song hơ tơnggu tồ sơmbat geh phan ƀàn bơh bơta hòi sac hơđang trồ Yàng Tom Trồ dê tòm Yàng Krist Jesu.

¹⁵ Behơ̆, ală cau neh dờng đah hwềng tòm bol he pal gơs bơta kơlôi sơnơng behơ̆, mơ dilah tòm broă lơi oh mi gơs bơta kơlôi sơnơng ndai, gen Yàng Tom Trồ kung rơp yal tơlik loh làng bơta hơ̆ oh mi in sơl.

¹⁶ Mìng bol he neh tus di tiah lơi, gen bol he pal cơnđòa lòt tĕ behơ̆.

Pol bơto pal đòm krơh khai dê

¹⁷ Ơ ală oh mi, dô nùs bal đòm tĕ añ, mơ sền ală cau lơh jat krơh mơ oh mi neh gŏ tòm bol hi.

¹⁸ Bơh añ òs đơs bơta do oh mi in, tòm tŭ do añ ñìm mơ đơs tai lah oă cau lơh lòt kung be cau sò tơm di chi pơng Bơtau Krist dê.

¹⁹ Bơta lồi dut bol khai dê la bơta roh rui, yàng bol khai dê la kơndul, bơta gơklŏ bol khai dê hơ̆ la bơta ƀàssìl ƀàsso bol khai dê, bol khai mìng kơlôi bơh broă dunnia dê lơm.

²⁰ Mơya bol he la làng bol hơđang trồ, bơh hơ̆ bol he kơp gơn Yàng Dong klàs la Yàng Jesu Krist.

²¹ Kơnràñ rơp lơh să jan ò kwơ bol he dê gơlik gơs be să jan gơklŏ Kơnràñ dê, jat be gơnap gơnoar Kơnràñ gơs nàng lơh jơh ală phan dòn duh Kơnràñ.