Ñìm Rac 5 - Sră Goh 2018

Jơnau hòi dan làng bol kong rồn bơklơn dê

¹ Khoai Yàng Jehôwa, dan kah ală bơta neh tơndùh hơđang bol hi; sền mơ gŏ bơta bơtat bơtròh di bol hi!

² Sre brê bol hi neh gơrê tòm tê ală cau crih mat, Hìu đam bol hi dê gơrê mơ cau lơgar bơdìh.

³ Bol hi gơlik gơs kòn đòi, ò gơs bèp, mè bol hi dê gơlik gơs ùr bơnrau.

⁴ Bol hi pal tơm jền nàng gơs dà hùc, pal blơi sồng gơs lòng.

⁵ Bơh yô neh ơn di ngko bol hi dê, cau ting jat bàn bol hi; bol hi neh bòl glar rau, bol hi ò geh rlô bòl!

⁶ Bol hi neh lơh dô bơta ho bal mơ ală cau Ejiptơ, mơ cau Asiri nàng gơs tơl ƀañ sa.

⁷ Ồng pàng bol hi dê neh tìs glài, bol khai ò gam kis tai. Bol hi neh ơnòng tồi glài bol khai dê.

⁸ Cau dĭ gơna at bồ hơđang bol hi; Ò gơs cau lơi dong tă bol hi klàs bơh tê bol khai.

⁹ Bol hi phi să sồng gơs piang lă nàng sa, Tài bơh gơs đào tòm ƀlàng ngềt ngơt.

¹⁰ Gơltau bol hi tơr ồ kung be bơnhă ồs, Bơh bơta jơgloh rung tơnroh bol hi!

¹¹ Ală cau ùr kòl rồn bơklơn tòm Siôn, Mơ rồn bơklơn ală cau ơruh dềt tòm ală ƀòn Juda.

¹² Tê bol khai neh yồng ală kwang at bồ, Ò ki ngàm ală cau dờng cau kra.

¹³ Cau klau pơnu pal àñ mpal piah, cau kơnòm gơsèng hơđơm ơnòng lòng.

¹⁴ Ală cau dờng cau kra ò gam nggui di mpồng ƀòn, Mpồl pơnu ò gam lơh kơñi đơs chò.

¹⁵ Bơta hòn chò nùs bol hi dê neh dơh wơl; Bơta tòmya gơlik gơs bơta ñìm ƀồc.

¹⁶ Sơgơn bơtau dùh bơh bồ bol hi, Bòl glar bol hi in, bơh bol hi neh tìs glài!

¹⁷ Tài behơ̆ nùs bol hi kòp jê, tài bơh ală bơta hơ̆ mat bol hi lu li,

¹⁸ Tài bơh mơnơm Siôn neh gơlik gơs tiah ngềt ngơt, so rhau lòt kơp mòc hơđang hơ̆.

¹⁹ Khoai Yàng Jehôwa, Kơnràñ at bồ gam sùm sùm, Sơbàn Kơnràñ gam bơh rài do tus hơ rài ne!

²⁰ Ñchi bơh tài Kơnràñ neh hŭi bol hi sùm sùm taih? Ñchi bơh tài Kơnràñ sang lòi bol hi jŏ jòng behơ̆ taih?

²¹ Khoai Yàng Jehôwa, dan bơtào bol hi wơl hơ să tòm Kơnràñ, gen bol hi rơp geh bơtào wơl, Lơh pa wơl ală ngai bol hi dê kung be yau òr!

²² Kơnràñ neh sang lòi jơh bol hi, bơh Kơnràñ gơjrañ di bol hi oă ir.