Ñìm Rac 3 - Sră Goh 2018

Bơta kòñ gơboh kơ̆ dơn Yàng Tom Trồ dê

¹ Añ la cau neh gŏ bơta bòl glar jê sồt hơđơm gai bơta gơjrañ dờng Yàng Tom Trồ dê.

² Kơnràñ neh bơtrơh tơlik añ mơ cèng tơmut añ tòm bơta klam jơngo, ò gơs dô êt lơi bơta àng.

³ Mìng dô nă Kơnràñ tòmdră mơ añ, Kơnràñ tơrwơl tê oă dơ̆ jơh ngai mho.

⁴ Kơnràñ neh lơh poac mơ gơltau añ jê siar roh, mơ neh dơrkă ală ntìng añ jê,

⁵ Kơnràñ neh gơrwàng añ, mơ krơ̆ jàm añ bơta bòl glar jê sồt dô bă bơtang ngan;

⁶ Kơnràñ lơh añ in nggui tòm tiah klam jơngo, kung be cau neh chơt jŏ rau.

⁷ Kơnràñ neh gơrwàng be dơrñang, nàng añ ò rgơi lik klàs; Kơnràñ neh ơn che sreng kơnjơ̆ hơđang añ.

⁸ Bulah añ hòi driau mơ dan dong kòl, Kơnràñ neh sềt tồr ò iat jơnau hòi dan añ jê;

⁹ Kơnràñ kơryan gùng añ mơ pơnai lŭ; Kơnràñ neh lơh ală gùng dà añ jê rkwet rkwe.

¹⁰ Kơnràñ lơh be jơgơu ơm kơp mòc añ, kung be klìu triă tòm tiah pồn să;

¹¹ Kơnràñ neh lam añ lòt gùng dut mơ crè añ rpot rpet, mơ lơh añ in ơm is.

¹² Kơnràñ neh wàr àtak Kơnràñ dê mơ ai añ lơh gơs tơnggu pañ kam Kơnràñ dê.

¹³ Kơnràñ neh pañ di plai nùs añ jê, mơ ală kam tòm ding Kơnràñ dê.

¹⁴ Añ neh gơlik gơs bơta dơñŏ tơnhial jơh làng bol añ jê, jơnau đơs crih bol khai dê jơh ngai mho.

¹⁵ Kơnràñ neh tơmbềng añ mơ bơta sràt bơtang, Kơnràñ ai añ in sa hòm sơnơm bơtang.

¹⁶ Kơnràñ neh tồl sề añ hơđang lŭ sơngào; mơ lơh añ in bic tơrkồn tòm bùh.

¹⁷ Hwềng soàn añ ơm ngài mơ bơta lơngap lơngai, añ neh hŭi bơta lơngai lơngò la ñchi.

¹⁸ Gen añ đơs lah: “Bơta gơklŏ añ jê jơh rau, hơ̆ la jơh ală bơta añ neh gơn kơnòm bơh Yàng Jehôwa.”

¹⁹ Bơta kơlôi sơnơng bơh bơta bòl glar jê sồt mơ ò gơs hìu ơm añ jê, la nha sơnơm bơtang mơ plai bơtang.

²⁰ Hwềng soàn añ gam kơlôi sùm bơh gơ, mơ gơ bòl glar tòm añ.

²¹ Mơya tòm tŭ añ kah wơl bơta hơ̆, gen tàng añ gơs bơta gơn kơnòm:

²² Bơta kòñ gơboh kơ̆ dơn Yàng Jehôwa ò tŭ lơi gơkòl tơnroh. Bơta kòñ nđàc Kơnràñ dê ò tŭ lơi lồi jơh;

²³ Kòp àng drim la pa sùm, bơta dòn song Kơnràñ dê la dờng ngan.

²⁴ Hwềng soàn añ đơs: “Yàng Jehôwa la pơnah sre brê añ jê, gen tàng añ ơn nùs gơn kơnòm di Kơnràñ.”

²⁵ Yàng Jehôwa la niam gơwèt mơ ală cau kơp gơn Kơnràñ, gơwèt mơ hwềng soàn ală cau jòi Kơnràñ.

²⁶ Hơ̆ la niam cau in ơm mŏ mŏ kơp gơn bơta dong klàs Yàng Jehôwa dê.

²⁷ Hơ̆ la niam cau lơi in tui yô tòm tŭ gam kơnòm să;

²⁸ Ơm nggui is mơ ơm mŏ mŏ, tòm tŭ Yàng Jehôwa neh ơn yô hơđang khai.

²⁹ Ơn tĕ bơr khai tòm thul ơmul! Digơlan gam đau bơta gơn kơnòm.

³⁰ Ai tĕ tơrmồ khai nàng cau in pah, mơ kong oă bơta dơñŏ tơnhial.

³¹ Bơh Yàng ò sang lòi jơl sùm sùm.

³² Bulah Kơnràñ neh lơh jê sồt moat jrùng, Kơnràñ rơp nđàc sơngit jat bơta tơngkah tơngkañ nùs kòñ gơboh kơ̆ dơn Kơnràñ dê;

³³ Hơ̆ ò di la bơh nùs kòñ Kơnràñ lơh jơi kòn mơnus in bòl glar mơ jê sồt.

³⁴ Tòm tŭ ală cau ơm jàm tòm lơgar gơkòl jă trơm hơđơm jơng,

³⁵ Tòm tŭ bơta song ring kòn mơnus dê gơkòl lơh rkwet rkwe di đap Bơtau Hơđang Rlau Jơh.

³⁶ Tòm tŭ bơta gơlik tus mơ dô nă cau gơkòl lơh iơh - gen Yàng Jehôwa ò sền gŏ ơ?

³⁷ Ñcau rgơi ai gơnoar sồr mơ bơta hơ̆ geh lơh gơs, dilah ò di Yàng Jehôwa rơndap lơh nền taih?

³⁸ Hơ̆ ò di bơh bơr Bơtau Hơđang Rlau Jơh mơ gơlik bơta rung rài mơ bơta lơngai lơngò ơ?

³⁹ Ñchi bơh tài cau gam tă nhơm yoam pơrhiat bơh kong lơh glài bơh tồi glài he taih?

⁴⁰ Bol he sền sơwì mơ lòng tĕ gùng dà he, mơ rê wơl tĕ mơ Yàng Jehôwa.

⁴¹ Bol he yò tơngguh tĕ nùs bal mơ tê he tus hơ Yàng Tom Trồ ơm hơđang trồ.

⁴² “Bol hi neh tìs glài, neh sòdră; mơ Kơnràñ ò toh glài!

⁴³ Kơnràñ pùt să tòm Kơnràñ mơ bơta gơjrañ mơ ting jat bol hi, tơnchơt bol hi, ò nđàc sơngit.

⁴⁴ Kơnràñ pùt să tòm mhwal, nàng ò gơs jơnau hòi dan lơi geh tus hơ Kơnràñ.

⁴⁵ Kơnràñ lơh bol hi in gơlik be thul ơmul mơ be phan sang gòi digùl ală làng bol.

⁴⁶ Kòp nă cau sò tơm bol hi dê ha bơr dờng tòmdră mơ bol hi.

⁴⁷ Bơta rngòt rngơt, trồm jrô gơdùh hơđang bol hi bơta tơnroh, mơ tơrlah tơrling.”

⁴⁸ Mat añ gơhòr dà mat be hiòng, tài bơh bơta tơnroh làng bol añ jê.

⁴⁹ Mat añ hòr dà mat sùm, ò dơh kung ò ơm,

⁵⁰ Jơl tus di tŭ lơi Yàng Jehôwa bơh hơđang trồ wèt sền, mơ gŏ.

⁵¹ Mat añ lơh añ in jê sồt moat jrùng, tài bơh bơta neh lơh nền jơh ală kòn ơruh tòm ƀòn dờng añ.

⁵² Ală cau hơ̆ la cau sò tơm añ jê ò bồ neh mòc añ kung be mòc sềm.

⁵³ Bol khai sơrbì añ gam kis tòm dô nơm trồm mơ bồr mơ lŭ hơđang añ.

⁵⁴ Dà guh rlau bồ añ, añ đơs: “Añ chơt roh!”

⁵⁵ “Ơ Yàng Jehôwa, añ hòi di sơnđan Kơnràñ bơh di tiah trồm jrô.

⁵⁶ Kơnràñ neh kơno jơnau hòi dan añ jê, dan bañ sềt tồr bơh jơnau hòi dan bơta dong kòl mơ dan ai añ in bơta rài bòl.”

⁵⁷ Kơnràñ neh tus rềp, tòm tŭ añ hòi dan di Kơnràñ mơ Kơnràñ neh đơs lah: “Bañ rngòt rngơt!”

⁵⁸ Khoai Yàng Jehôwa, Kơnràñ neh dong tò bơta gơrềng tus di añ, Kơnràñ neh dong tơwài bơta kis añ jê.

⁵⁹ Khoai Yàng Jehôwa, Kơnràñ neh gŏ cau lơh iơh di añ: dan cahrña broă gơlik tus di añ!

⁶⁰ Kơnràñ neh gŏ jơh ală bơta iơh rmơh mơ jơh kai gơrmơ̆i bol khai tòmdră di añ.

⁶¹ Khoai Yàng Jehôwa, Kơnràñ neh kơno bol khai bơtat bơtròh, mơ jơh ală kai gơrmơ̆i bol khai tòmdră mơ añ.

⁶² Ală jơnau đơs òm mơ ală jơnau đơs chều ală cau sòdră añ jê tòmdră di añ jơh ngai mho.

⁶³ Sền tĕ bulah bol khai nggui hala ñă, añ la bơta đơs chò bơtat bơtròh bol khai dê.

⁶⁴ Khoai Yàng Jehôwa, dan tơm wơl bol khai in bơta bol khai neh lơh, jat be broă tê bol khai neh lơh.

⁶⁵ Dan ai bol khai in nùs bòl glar jê sồt, bơta srat sơntơm Kơnràñ dê dùh hơđang bol khai.

⁶⁶ Dan ting jat bol khai tòm bơta gơjrañ Kơnràñ dê mơ tơnroh bol khai bơh hơđơm ală tap trồ Yàng Jehôwa dê.