Ñìm Rac 2 - Sră Goh 2018

Yal tơlik bơta phà tơrlah ƀòn dờng Jerusalem

¹ Mbe tòm bơta gơjrañ dờng Yàng Jehôwa dê neh lơh ƀàssìl kòn ùr Siôn dê! Kơnràñ neh sơrbì bơh đang trồ tus tòm ù bơta gơklŏ ryŭ ryơm Israel dê. Kơnràñ neh ò kah kơrnòl ơn jơng Kơnràñ dê, tòm ngai gơjrañ dờng Kơnràñ dê.

² Yàng neh tơnroh ò nđàc sơngit, jơh ală tiah ơm Jakôp dê. Tòm bơta gơjrañ Kơnràñ dê, Kơnràñ neh lơh tơrlơm ală theng kơ̆ cê kòn ùr Juda dê; Kơnràñ neh tơmù tus di ù, tòm bơta ƀàssìl lơgar mơ ală kwang at bồ gơ dê.

³ Tòm bơta gơhào gơjrañ dờng, Kơnràñ koh tơmù jơh ală gơnoar pràn Israel dê. Kơnràñ neh tă tê ma Kơnràñ dê bơh di bol khai di đap mat cau sò tơm. Kơnràñ neh chu ồs sa hơng digùl Jakôp, pơrguc jơh ală bơta gùt dar.

⁴ Kơnràñ wàr àtak be dô nă cau sò tơm; pò tê ma hơđang kung be cau sòdră. Kơnràñ tơnchơt jơh ală cau lơh bol hi in jòng să; Tòm sàl kòn ùr Siôn, Kơnràñ neh tuh bơta gơjrañ dờng Kơnràñ dê kung be ồs.

⁵ Yàng neh gơlik gơs be dô nă cau sò tơm, Kơnràñ neh tơnroh Israel; Kơnràñ neh tơnroh jơh ală gơlang bơtau gơ dê, lơh tơrlah tơrling ală theng kơ̆ cê; mơ bơtơl bơta ñìm rac, pơt wòl digùl kòn ùr Juda.

⁶ Kơnràñ neh lơh tơrlơm ală tum kung be dô nơm suơn; Kơnràñ neh tơnroh cơnòng duh khoai Kơnràñ dê; Yàng Jehôwa neh jùt sang tòm Siôn ngai pơjum sa mơ ngai Saƀat; Tòm bơta gơhào gơjrañ Kơnràñ dê, Kơnràñ neh sang tơlik bơtau mơ cau gơnoar ơn phan duh khoai.

⁷ Yàng Jehôwa neh sền òsơp cơnòng duh khoai Kơnràñ dê, mơ ò dòp tiah sàng goh Kơnràñ dê; Kơnràñ neh jào tòm tê cau sò tơm ală dơrñang gơlang bơtau khai dê; dô bơta nggồr nggàc tòm hìu Yàng Jehôwa dê kung be tòm ngai pơjum sa.

⁸ Yàng Jehôwa neh lơh nền phà tơnroh dơrñang kòn ùr Siôn dê; Kơnràñ neh dang che was, ò tă tê bơh bơta lơh tơnroh; Kơnràñ neh lơh theng kơ̆ cê mơ dơrñang ñìm rac, bol khai siar roh òsô ò soàn bal mơ gơp.

⁹ Ală mpồng ƀòn dờng gơkram tòm ù; Kơnràñ neh tơnroh mơ dơrkă ală kai kal gơ dê. Cau bơtau mơ ală kwang at bồ gơ dê ơm digùl ală lơgar ò gơs bơta sơnio lam tai! Ală cau gơnoar hwơr ò dòp bơta tơnggŏ bơh Yàng Jehôwa.

¹⁰ Ală cau kwang kra kòn ùr Siôn dê ơm nggui mŏ mŏ tòm ù; Bol khai tuh thul hơđang bồ, mơ soh ƀào sơnò kiat. Ală kòn ơruh Jerusalem dê kun bồ bol khai tus tòm ù.

¹¹ Mat añ siar roh bơh hòr dà mat, klung añ gơ nggồr; Klung klòm añ gơtuh tơlik tòm ù, tài bơh bơta tơnroh làng bol añ jê. Ală cau kơnòm dềt mơ kòn se, bòl glar òsô tòm ală gùng tòm ƀòn dờng.

¹² Bol khai ñìm mơ mè bol khai lah: “Ntềng đah piang lă mơ tơrnòm taih?” bol khai bòl glar òsô kung be cau kong sồt tòm ală gùng ƀòn dờng ndang; bol khai tac nhơm ndang hơđang ntơh mè bol khai dê.

¹³ Ñchi Añ rgơi đơs mơ ai taih? Ai bơta lơi nàng pơndròm mơ ai taih? Ơ kòn ùr Jerusalem? Añ ai ñchi nàng pơndròm mơ ai, nàng Añ pơndòm pơniang ai? Ơ kòn ơruh dềt Siôn dê? Bơta roh rui ai kung be dàlềng, Ñcau rgơi sơm ai in taih?

¹⁴ Ală cau gơnoar hwơr ai yal ai in ală bơta ma blac mơ gơtơnggŏ blac pơrlồm. Bol khai ò yal tơlik tồi glài ai, nàng tơm wơl bơta lơngai lơngò bol ai dê, Mơya mìng yal ai in git ală jơnau đơs hwơr ma blac mơ tìs nrah.

¹⁵ Ală cau lòt gan gùng tàp tê di ai; bol khai hwac mơ rtơs bồ di kòn ùr Jerusalem, lah: “Ngan do la ƀòn dờng cau sơnđan lah bơta hàng mơnĕ wil tơl, bơta hòn chò jơh plai ù dê sơl ơ?”

¹⁶ Jơh ală cau sò tơm ai dê ha bơr dờng tòmdră mơ ai, bol khai hwac, rkiat sề driau dờng lah: “Bol he neh sa loan khai! A, do la ngai bol he neh kơp gơn, lồi dut bol he neh sền gŏ gơ!”

¹⁷ Yàng Jehôwa neh lơh bơta Kơnràñ neh lơh nền; Kơnràñ neh lơh gơlik gơs bơta Kơnràñ neh pơhìn; kung be bơta Kơnràñ neh rơndap bơh lài òr, Kơnràñ neh lơh tơrlơm ò nđàc sơngit, Kơnràñ neh lơh cau sò tơm mê chò hòp bơh mê, mơ yò tơngguh gơnoar pràn cau sò tơm mê dê.

¹⁸ Driau dờng tĕ tus hơ Yàng Jehôwa, Ơ dơrñang kòn ùr Siôn dê, lòi dà mat gơhòr be hiòng hòr pràn ngai mơ mang. Să tòm ai bañ ơm rlô; mat ai ò ơm dơh wơl.

¹⁹ Guh tĕ driau nggà tòm trồ mang, tòm tŭ rơp sơntòm kơp gàr; Tuh tơlik nùs ai kung be dà di đap mat Yàng Jehôwa. Pò tĕ tê ai hơ Kơnràñ bơh bơta kis ală kòn dềt ai dê, bol khai bòl glar òsô tài bơh jơgloh tòm kòp nơm bồ gùng.

²⁰ Khoai Yàng Jehôwa, dan wèt sền! Kơnràñ neh lơh bơta do mơ cau lơi taih? Di pal sơl cau ùr sa plai bơh kơndul he, hơ̆ la kòn sau bol khai neh deh ơ? Di pal sơl cau gơnoar ơn phan duh khoai bal mơ cau gơnoar hwơr kong tơnchơt tòm tiah sàng goh Yàng Jehôwa dê ơ?

²¹ Ală cau kơnòm să mơ cau kra bic tòm ù hơđang ală gùng. Ală ùr ơruh mơ klau pơnu añ jê neh gơpừ bơh đào. Tòm ngai gơjrañ dờng Kơnràñ dê, Kơnràñ neh tơnchơt bol khai, sreh tơnchơt ò nđàc sơngit.

²² Kơnràñ neh hòi jà ală cau sò tơm añ jê bơh ală tiah gùt dar, kung be dô ngai pơjum sa chò hòp. Mơ tòm ngai gơjrañ dờng Yàng Jehôwa dê, ò gơs cau lơi geh klàs hala gam kis. Hơ̆ la ală cau añ neh deh mơ ròng siam, cau sò tơm añ jê neh tơnroh jơh.