Nehemi 8 - Sră Goh 2018

Ejra sền sră bơta boh lam di đap làng bol

¹ Gen bol khai pơjum bal be dô nă tòm ƀlàng dờng di đap Mpồng Dà. Bol khai sồr Ejra cau bơto bơta boh lam cèng sră boh lam Môise dê mơ Yàng Jehôwa neh ai làng bol Israel in.

² Gen tàng, cau gơnoar ơn phan duh khoai Ejra cèng bơta boh lam tus di đap mpồl jơnum, cau klau mơ cau ùr, mơ jơh ală cau lơi rgơi iat mơ wă wơng. Hơ̆ la tòm ngai dùl kơnhai poh.

³ Khai sền sră tòm toh di ƀlàng dờng di đap Mpồng Dà, bơh rìng àng drim jơl gùl ngai, di đap ală cau klau mơ ală cau ùr la ală cau rgơi wă. Tồr jơh ală làng bol dê ơm iat nền di sră bơta boh lam.

⁴ Cau bơto bơta boh lam Ejra ntào hơđang tiah bơto lơh mơ mpàn mơ cau neh lơh nàng ngui tŭ hơ̆. Ntào di gah khai la Mattithia, Sema, Anayah, Uria, Hilkia; ntào đah ma khai la Maaseyah; mơ Pedayah, Misael, Malkijah, Hasum, Hasbadanah, Sacari, mơ Mesulam ntào đah kiau khai.

⁵ Ejra pò sră di đap mat jơh làng bol, bơh khai ntào tòm tiah jơnhoa rlau mơ làng bol; Tòm tŭ khai pò sră gen jơh làng bol ñă ntào.

⁶ Gen Ejra jòng ro Yàng Jehôwa, Yàng Tom Trồ dờng ngan; gen jơh làng bol pò tê mơ đơs lah: “Amen! Amen!” Gen bol khai kun bồ tơmbic să di ù mơ duh khoai Yàng Jehôwa.

⁷ Kung gơs Jesua, Bani, Serebia, Jamin, Akup, Sabethai, Hôdiah, Maaseyah, Kelita, Ajaria, Jôjabat, Hanan, Pelayah, mơ ală cau Lebi dong kòl làng bol nàng git wă bơta boh lam tòm tŭ làng bol gam ơm di tiah bol khai dê.

⁸ Behơ̆ bol khai sền bơh tòm sră, bơh bơta boh lam Yàng Tom Trồ dê, mơ yal tơlik gơtha nàng làng bol wă jơnau bol khai sền.

⁹ Gen Nehemi cau kwang at bồ kơnhwàl, Ejra cau gơnoar ơn phan duh khoai kung la cau gơnoar cih, mơ ală cau Lebi la ală cau bơto làng bol đơs mơ làng bol Israel lah: “Ngai do la ngai sàng goh Jehôwa Yàng Tom Trồ bol mê in, bañ moat jrùng mơ ñìm rac.” Tài bơh jơh làng bol ñìm tòm tŭ bol khai kơno ală jơnau bơta boh lam dê.

¹⁰ Gen Nehemi đơs mơ bol khai lah: “Lòt tĕ sa phan lơmă mơ hùc dà ño lơngồt, mơ pơyoa tĕ pơnah pà gòi hơ̆ ală cau ò gơs rcang phan lơi; tài bơh ngai do la sàng goh Yàng bol he in. Bañ moat jrùng, bơh bơta chò hòp Jehôwa di la bơta pràn kơldang bol mê dê.”

¹¹ Behơ̆, ală cau Lebi lơh jơh làng bol in ơm ring ngềt mơ đơs lah: “Ơm tĕ mŏ mŏ, tài bơh ngai do la ngai sàng goh; bañ moat jrùng.”

¹² Gen jơh làng bol rê nàng ñô sa, mơ pơyoa bal ală pơnah phan sa chò hòp ngan; tài bơh bol khai neh wă ală jơnau cau neh bơto bol khai in.

¹³ Tòm ngai bàr ală cau at bồ tòm ală hìu nhă jơh làng bol dê, ală cau ơn phan duh khoai, mơ ală cau Lebi pơjum gùt dar Ejra cau gơnoar cih nàng bơtê ală jơnau bơta boh lam dê.

¹⁴ Bol khai bàn jơnau neh cih tòm bơta boh lam, mơ Yàng Jehôwa neh sồr Môise, la làng bol Israel pal ơm tòm ală sàl tòm tŭ sa bơta ñô sa tòm kơnhai poh,

¹⁵ mơ bol khai kung pal yal loh làng mơ yal tơnggit tòm ală ƀòn bol khai dê mơ tòm Jerusalem lah: “Lik lòt tĕ hơđang ală dòr mơ cèng ală ntê ôlibe brê, ntê mơñàng, nha gòl, mơ ală ntê bơh ală chi ndai mơ gơs nha oă nàng lơh sàl, be neh cih.”

¹⁶ Behơ̆ làng bol lik lòt mơ cèng brê ală nha hơ̆. Kòp nă lơh sàl bol khai in hơđang ală rkàng (hìu cau Hebrơ gơs rkàng ring) hìu ơm, tòm ƀlàng jơng hìu, tòm ƀlàng jơng hìu duh khoai Yàng Tom Trồ dê, tòm ƀlàng dờng di đap Mpồng Dà, mơ tòm ƀlàng di đap Mpồng Epraim.

¹⁷ Jơh mpồl jơnum neh geh rê bơh bơta kong kup cèng gen lơh sàl mơ ơm tềng hơ̆. Bơh di rài Jôsue kòn klau Nun dê jơl tus ngai hơ̆, làng bol òhềt gơs behơ̆, mơ gơs bơta hòn chò dờng ngan.

¹⁸ Bơh ngai do tus ngai ne, bơh ngai sơnròp tus di ngai lồi dut, khai sền tòm sră bơta boh lam Yàng Tom Trồ dê. Bol khai ñô sa tòm poh ngai; mơ tòm ngai phàm, gen gơs pơjum dờng màng jat be bơta neh lơh nền.