Nehemi 5 - Sră Goh 2018

Nehemi dong tò ală cau rƀah lơòi

¹ Tŭ hơ̆ làng bol mơ ală bau ùr bol khai dê driau dờng tòmdră mơ ală oh mi bol khai dê la cau Juda.

² Bơh gơs cau đơs lah: “Bol hi mơ kòn klau mơ kòn ùr bol hi dê la gal ngan, bol hi pal gơs kòi, nàng bol hi in sa mơ kis.”

³ Kung gơs cau ƀà đơs lah: “Bol hi neh tòmbơrkòl mìr sre, suơn ño, mơ hìu bol hi dê tồ geh kòi sa tòm tŭ jơgloh rung.”

⁴ Kung gơs cau ndai đơs lah: “Bol hi neh càn priă hơđang mìr sre mơ suơn ño bol hi dê nàng geh priă boh dia bơtau in.

⁵ Tŭ do poac să bol hi dê kung be poac să oh mi he dê, ală kòn bol hi dê kung be ală kòn bol khai dê, do bol he neh kup bơklơn ală kòn klau mơ ală kòn ùr bol hi dê nàng lơh dĭ, mơ kung gơs kòn ùr bol hi dê neh kong kup cèng; mơya bol hi ò gơs gơnoar lơi, tài bơh ală mìr sre mơ ală suơn ño bol hi dê neh gơrê mơ cau ndai.”

⁶ Añ gơhào gơjrañ ngan tòm tŭ añ kơno ală bơta tòm pơndang hơ̆.

⁷ Tơnơ̆ mơ tŭ kơlôi sơnơng bơh bơta hơ̆, añ cèng bơta hơ̆ tòmdră mơ ală cau màng ryŭ mơ ală cau kwang; añ đơs bol khai lah: “Jơh ală bol mê neh ai priă cồng bơh di làng bol tòm bol mê dê.” Añ neh hòi pơjum dô bơta pơjum dờng nàng tòmdră mơ bol khai,

⁸ gen đơs mơ bol khai lah, “Jat be bơta bol hi rgơi, bol hi neh tơwài oh mi he la cau Juda neh kòl tac ală làng bol bơdìh in, la ală cau pal gơkòl tac bơh bol he wơl ơ?” Gen bol khai ơm mŏ mŏ mơ ò rgơi jòi jơnau lơi nàng đơs, gen añ đơs lah:

⁹ “Bơta bol mê lơh la ò niam. Bol mê pal lơh lòt dô bă duh rngòt di Yàng Tom Trồ he, nàng kơryan jơnau dơñŏ tơnhial ală làng bol la cau sò tơm bol he dê ơ?

¹⁰ Rlau mơ hơ̆ tai, añ mơ ală oh mi añ, mơ ală cau lơh broă añ jê, neh ai bol khai in càn priă mơ kòi. Bol he pơndut tĕ bơta sa cồng do.

¹¹ Ngai do tơm wơl tĕ bol khai in mìr sre, suơn ño, suơn ôlibe, mơ hìu bol khai dê, bal mơ cồng bơh priă, kòi, tơrnòm, mơ mơñà bol khai dê mơ bol mê neh ai bơh bol khai.”

¹² Gen bol khai đơs lah: “Bol hi rơp jào wơl jơh ală bơta mơ ò jòi lùp phan lơi bơh bol khai. Bol hi rơp lơh be ồng neh đơs.” Gen añ hòi ală cau ơn phan duh khoai, mơ sồr bol khai srat să mơ lơh be bơta bol khai neh ho hơ̆.

¹³ Añ kung rtuh ào añ mơ đơs lah: “Cau lơi ò lơh jat jơnau ho gen dan Yàng Tom Trồ rtuh khai bơh hìu khai dê mơ bơh di sre brê khai dê, dan khai gơkòl rtuh tơlik behơ̆.” Gen jơh mpồl jơnum đơs: “Amen” mơ jòng ro Yàng Jehôwa. Làng bol lơh jat bơta bol khai neh ho.

¹⁴ Mơ tai, bơh ngai añ neh geh pồ bơtào gơs kwang đơng lơgar Juda, bơh nam bàr jơt tus di nam pe jơt bàr rài bơtau Artaserses dê, jơh ală la jơt bàr nam. Bulah añ hala oh mi añ ò sa phan sa cau kwang at bồ lơgar ai gơnoar.

¹⁵ Ală kwang at bồ lài mơ añ neh kup làng bol àñ kơnjơ̆ rì phan sa, tơrnòm bal mơ poan jơt sieklơ priă. Tian gơs ală cau duh broă bol khai kung rồn bơklơn làng bol Mơya añ ò lơh behơ̆ ò, tài bơh añ duh rngòt di Yàng Tom Trồ.

¹⁶ Añ ò ơn să tòm añ tòm broă bơt dơrñang, ò dan ù lơi. Mơ jơh ală cau lơh broă añ jê kung pơjum tềng hơ̆ nàng lơh broă.

¹⁷ Rlau mơ hơ̆ tai, di cơnòng sa añ gơs dô rhiang pram jơt nă cau, ală cau Juda mơ ală cau kwang, rlau mơ ală cau tus hơ bol hi bơh ală lơgar gùt dar bol hi.

¹⁸ Tŭ hơ̆, kòp ngai cau yò sa dô nơm kơnrồ, prau nơm belàt niam rlau jơh, bol khai kung yò ală iar añ in sơl, mơ kòp jơt ngai gơs ală gơltau ơn bềng tơrnòm. Bulah behơ̆ ală phan hơ̆ añ ò dan gơnoar ai phan sa mơ cau kwang đơng lơgar dê, tài bơh broă lơh àñ ơnòng kơnjơ̆ ơm hơđang làng bol.

¹⁹ Ơ Yàng Tom Trồ añ jê, dan kah bơh broă niam añ jê, jơh ală broă añ neh lơh làng bol do in.