Nehemi 2 - Sră Goh 2018

Nehemi geh gơnoar rê hơ lơgar Juda

¹ Tòm nam Nisan, nam dơ̆ bàr jơt rài bơtau Artaserses, tòm tŭ gơs tơrnòm di đap cau bơtau, añ cèng tơrnòm mơ tong bơtau in. Bơh lài añ ò gơs tŭ lơi gơs bơta moat jrùng di đap bơtau.

² Behơ̆ cau bơtau đơs mơ añ lah: “Ñchi bơh tài muh mat mê moat jrùng bulah mê ò kòp jê? Bơta do mìng gơs bơta moat jrùng tòm nùs lơm.” Gen añ rngòt oă ngan.

³ Gen añ đơs mơ bơtau lah: Dan bơtau in kis sùm sùm! Mbe rgơi muh mat añ ò moat jrùng, tòm tŭ ƀòn dờng la tiah gơs bơtô ƀồc ồng pàng añ ơm srau gòi mơ ală mpồng gơ dê neh kòl tơnroh bơh ồs taih?

⁴ Cau bơtau đơs mơ añ lah: Ñchi bơta mê kòñ dan taih? Gen añ hòi dan mơ Yàng Tom Trồ hơđang trồ dê.

⁵ Gen añ đơs mơ bơtau lah: “Dilah bơta do niam nùs bơtau mơ añ geh bơta nđàc di đap bơtau, gen añ dan kơnràñ sồr añ lòt hơ lơgar Juda la ƀòn, la tiah gơs bơtô ƀồc mò pàng añ, nàng añ bơt wơl gơ.”

⁶ Cau bơtau đơs mơ añ lah (tŭ hơ̆ bau ùr bơtau dê kung nggui di gah bơtau): “Mê lòt gùng nđò jŏ mơ mê rê wơl tŭ lơi taih?” Gen bơtau niam nùs ai añ in lòt, mơ añ yal bơtau in git nđò jŏ sồng añ rê.

⁷ Añ kung đơs mơ bơtau lah: “Dilah niam nùs bơtau gen dan ai añ in sră pơyoa hơ ală kwang at bồ kơnhwàl Đah Ne Hiòng nàng bol khai ai añ in ƀuơn lòt gùng jơl tus di tŭ añ tus hơ lơgar Juda,

⁸ mơ dô nơm sră pơyoa tus hơ Asap cau at bồ brê bơtau dê, nàng sồr khai ai añ in chi nàng lơh ală jrong mpồng theng kơ̆ cê dê, mơ dơrñang ƀòn dờng dê, bal mơ hìu tòm añ jê.” Bơtau ai gơnoar añ in bơta añ neh dan, tài bơh tê kòñ nđàc Yàng Tom Trồ añ jê ơm hơđang añ.

⁹ Behơ̆, añ lòt tus hơ ală kwang at bồ kơnhwàl Đah Ne Hiòng mơ ai bol khai in sră pơyoa bơtau dê. Tŭ hơ̆ bơtau neh sồr ală kwang ling mơ ală ling hào ơseh lòt bal mơ añ.

¹⁰ Mơya tòm tŭ Sanbalat, cau Hôrôn mơ Tôbiah cau Ammôn dê kơno bơta hơ̆, bol khai sơềt sơềl oă ngan, bơh gơs cau ƀà tus nàng jòi bơta lơngap lơngai làng bol Israel.

¹¹ Behơ̆ añ lòt tus hơ Jerusalem mơ ơm tềng hơ̆ pe ngai.

¹² Gen añ guh tòm mang bal mơ bàr pe nă cau klau, añ ò yal cau lơi in ñchi bơta Yàng Tom Trồ añ jê neh ơn tòm nùs añ nàng lơh Jerusalem in. Añ mìng gơs phan poan jơng mơ añ neh hào lơm.

¹³ Añ neh lik lòt tòm trồ mang bơh Mpồng Thòng, lòt gan Croh Dà Nagrài mơ tus hơ Mpồng È. Mơ añ sơwì sền ală dơrñang Jerusalem dê tơrlah mơ mpồng ƀòn neh ồs sa tơnroh.

¹⁴ Gen añ lòt tus hơ Mpồng Dà Cat mơ tus hơ Mpồng Tơnau Bơtau; mơya tềng hơ̆ ò gơs tiah nàng phan poan jơng añ jê lòt tai.

¹⁵ Behơ̆ añ guh jat thòng tòm mang hơ̆ mơ sền sơwì dơrñang ƀòn, lồc behơ̆ añ rê mut wơl gan Mpồng Thòng.

¹⁶ Ală cau kwang ò git ntềng đah añ neh lòt mơ ñchi añ neh lơh, bơh añ òhềt yal ală cau Juda, ală cau gơnoar ơn phan duh khoai, ală cau màng ryŭ, ală cau kwang dờng, mơ ală cau ndai pal lơh broă hơ̆ in git.

Lơh nền bơt wơl dơrñang

¹⁷ Gen añ đơs mơ bol khai lah: “Bol mê gŏ ală bơta bòl glar bol he dê, mbe Jerusalem neh tơrlah jơh, mơ ală mpồng gơ dê neh ồs sa. Tus tĕ bol he bơt wơl ală dơrñang Jerusalem dê, nàng bol he ò tai ơm tòm bơta jê sồt sền òsơp.”

¹⁸ Añ yal bol khai in git mbe tê Yàng Tom Trồ añ jê neh kòñ nđàc di añ, mơ kung yal ală jơnau bơtau neh đơs mơ añ. Bol khai ho lah: “Bol he bơt wơl tĕ!” Behơ̆ bol khai lơh broă bal dô bă niam.

¹⁹ Mơya tòm tŭ Sanbalat cau Hôrôn, Tôbiah cau kwang Ammôn, mơ Gesem cau Arap kơno bơta hơ̆, gen bol khai ñŏ tơnhial di bol hi, đơs lah: “Ñchi bol mê lơh taih? Bol mê tòmdră mơ bơtau ơ?”

²⁰ Gen añ ho bol khai lah: “Yàng Tom Trồ hơđang trồ la Bơtau rơp ai bol hi in gơlik cồng nha, mơ bol hi la cau duh broă Kơnràñ dê neh lòt nàng sơntòm bơt wơl. Mơya bol mê ò gơs pơnah lơi, gơnoar lơi, hala bơta yal yau lơi di ngan tòm Jerusalem.”