Nehemi 13 - Sră Goh 2018

Bơta tòmgơl pa lồi dut Nehemi dê mơ bơta boh lam

¹ Tòm ngai hơ̆ cau sền sră Môise làng bol in kơno, mơ tềng hơ̆ neh cih lah cau Ammôn mơ cau Môap ò tŭ lơi geh mut tòm mpồl jơnum Yàng Tom Trồ dê,

² tài bơh bol khai ò lòt wă rò cau Israel bal mơ piang lă mơ dà; mơya neh ơpah Balaam tòmdră mơ cau Israel mơ srat rma bol khai — bulah behơ̆ Yàng Tom Trồ bol he dê sơlơ̆u bơta srat rma gơlik dô bơta lơngai lơngò.

³ Tòm tŭ làng bol neh kơno bơta boh lam rau, gen bol khai cah is ală cau bơdìh bơh làng bol Israel.

⁴ Mơ tai, lài mơ bơta do, cau gơnoar ơn phan duh khoai Eliasip, la cau neh geh pồ bơtào sền gàr ală ơdŭ prap phan hìu duh khoai Yàng Tom Trồ bol he dê, la cau gơp bơtiàn mơ Tôbiah,

⁵ neh rcang Tôbiah in dô nơm ơdŭ dờng la tiah bơh lài cau neh ơn ală kòi phe, ală kơlhô, ală phan ngui, kòi pơnah jơt, tơrnòm, mơ mơñà, hơ̆ la ală phan neh geh ơn bơh bơta boh lam ai ală cau Lebi, ală cau đơs chò, mơ ală cau sền gàr mpồng in, bal mơ ală phan ơn ală cau gơnoar ơn phan duh khoai in.

⁶ Tòm tŭ ală bơta hơ̆ neh gơs añ ò ơm tòm Jerusalem; tài bơh di di nam pe jơt bàr rài Artaserses, bơtau Babilôn dê; gen añ neh rê wơl hơ bơtau. Tơnơ̆ dô êt jŏ, añ dan bơtau ai gơnoar nàng lòt bơh di bơtau,

⁷ mơ añ neh rê wơl hơ Jerusalem. Gen añ git broă iơh bơsak mơ Eliasip neh lơh, hơ̆ la rcang Tôbiah in dô nơm ơdŭ tòm hìu duh khoai Yàng Tom Trồ dê.

⁸ Añ gơjrañ ngan, mơ sơrbì jơh ală phan ngui Tôbiah dê bơh ơdŭ.

⁹ Gen añ sồr cau lơh goh ơdŭ hơ̆ mơ añ tơmut wơl ală phan ngui hìu duh khoai Yàng Tom Trồ dê, phan ơn duh khoai mơ kơmbuh phe mơ kơlhô.

¹⁰ Añ kung kơno lah ală cau Lebi òhềt dòp geh ală pơnah ơn bol khai in; gen tàng ală cau Lebi, ală cau đơs chò la ală cau gơs gơnoar broă duh broă, neh dô rê hơ mìr sre tòm khai dê.

¹¹ Behơ̆ añ lah pơrhơng ală kwang lah: “Ñchi bơh tài hìu duh khoai Yàng Tom Trồ kòl sang lòi behơ̆? Gen añ hòi pơjum bol khai mơ ơn bol khai tòm broă bol khai dê.

¹² Gen jơh làng bol Juda cèng ơn kòi pơnah jơt, tơrnòm pa mơ mơñà tòm đam jàr.

¹³ Añ pồ bơtào Selemia, cau gơnoar ơn phan duh khoai; Jadôk cau jak chài àng loh; mơ Pedayah cau Lebi nàng bol khai sền gàr ală đam; ai Hanan kòn klau Jakkur, sau Mattaniah cau dong kòl bol khai tài bơh bol khai geh kòp la ală cau dòn song. Bol khai dòp gơnoar broă tòmpà ală phan geh ơn nàng ngui digùl ală oh mi he in.

¹⁴ Ơ Yàng Tom Trồ! Dan kah añ bơh bơta do, bañ jùt ală broă niam añ neh lơh hìu duh khoai Yàng Tom Trồ añ in mơ tòm ală bơta duh broă.

¹⁵ Tòm ală ngai hơ̆, añ gŏ cau tòm Juda pat plai ño tòm ngai Saƀat. Gơs cau cèng kòi hơđang alàng, mơ kung pơdiang tơrnòm, plai ño, plai ƀal, mơ ală phan ndai hơ Jerusalem tòm ngai Saƀat. Behơ̆ tàng añ neh bơto pơrhơng bol khai bơh bơta tac phan sa tòm ngai hơ̆.

¹⁶ Kung gơs cau bơh Tirơ ơm tòm Jerusalem. Bol khai neh cèng ka mơ ală phan kă bro tus tac gơ mơ làng bol Juda ơm tòm Jerusalem tòm ngai Saƀat.

¹⁷ Tŭ hơ̆ añ lah pơrhơng ală kwang at bồ lơgar Juda dê lah: Ñchi broă iơh bol mê lơh be do, mơ lơh ƀơ̆ ƀơl ngai Saƀat in taih?

¹⁸ Ală mò pàng bol mê ò di neh lơh behơ̆ ơ? Gen tàng Yàng Tom Trồ neh ai bơta rung rài tus hơ bol he mơ hơđang ƀòn do ò ơ? Tŭ do ală bol mê lơh ƀơ̆ ƀơl ngai Saƀat in mơ bơtơl bơta gơjrañ dờng tòmdră mơ Israel.”

¹⁹ Tòm tŭ trồ mòr jơngo di ală mpồng Jerusalem lài mơ ngai Saƀat, añ sồr cau til ală mpồng mơ bañ pò jơl tus ngai Saƀat neh rlau. Añ neh ơn cau tòm mpồl ală cau duh broă añ jê nàng sền gàr ală mpồng tồ ò gơs cau lơi cèng phan tơmut tòm ngai Saƀat.

²⁰ Gen ală cau kă bro mơ ală cau tac ală phan pal bic di bơdìh Jerusalem dô dơ̆ hala bàr dơ̆.

²¹ Mơ añ neh lah pơrhơng bol khai lah: “Tài bơh ñchi bol mê bic mang di đap dơrñang behơ̆? Dilah bol mê gam lơh tai, ngan añ rơp kup bol mê.” Bơh tŭ hơ̆ bol khai ò tus tòm ngai Saƀat tai.

²² Mơ añ sồr ală cau Lebi lơh goh să tòm bol khai mơ lòt sền gàr ală mpồng nàng ơn ngai Saƀat sàng goh. Ơ Yàng Tom Trồ añ! Dan kah añ bơh ală bơta do, mơ dan nđàc sơngit di añ jat bơta kòñ gơboh kơ̆ dơn dờng Kơnràñ dê.

Lơh nền glài cau tòmbau mơ làng bol bơdìh

²³ Rlau mơ hơ̆ añ gŏ ală cau Juda la cau neh bau mơ ală cau ùr Asdot, Ammôn, mơ Môap;

²⁴ Nggùl ală kòn bol khai dê đơs jơnau Asdot mơya jơnau đơs ndai mơ ò git đơs jơnau Juda.

²⁵ Añ lah pơrhơng bol khai, srat rma bol khai, pù lơh bàr pe nă bol khai, dŭi sŏ bol khai, sồr bol khai sơnio Yàng Tom Trồ mơ srat lah: “Bol mê rơp ò tòmbau kòn ùr bol mê dê mơ kòn klau bol khai dê, kung ò tòmbau kòn klau bol mê dê mơ kòn ùr bol khai, hala să tòm bol mê ò bau mơ bol khai.

²⁶ Ò di Salômôn bơtau Israel neh tìs glài mơ ală cau ùr behơ̆ ơ? Digùl jơh ală làng bol ò gơs dô nă cau bơtau lơi be khai, khai neh geh Yàng Tom Trồ kòñ gơboh, mơ Yàng Tom Trồ neh bơtào khai gơs bơtau hơđang jơh ală làng bol Israel. Mơya khai neh kòl cau ùr bơdìh lơh khai in tìs glài!

²⁷ Mbe bol hi rgơi iat mơ lòi bol mê lơh ală bơta iơh mơ broă bơsak dờng hơ̆, tòmbau mơ ùr bơdìh mơ tìs glài mơ Yàng Tom Trồ bol he sơl?”

²⁸ Gơs dô nă tòm ală kòn klau Jôyada dê, sau Eliasip, cau gơnoar lam bồ ơn phan duh khoai, la bơrtơu Sanbalat cau Hôrôn dê. Tài bơh hơ̆ añ neh bơtrơh khai ngài bơh di añ.

²⁹ Ơ Yàng Tom Trồ añ! Dan kah bol khai, bơh bol khai neh lơh ƀơ̆ ƀơl gơnoar ơn phan duh khoai mơ bơta ho pơgon gơnoar ơn phan duh khoai mơ cau Lebi dê.

³⁰ Behơ̆, añ neh lơh goh bol khai bơh jơh ală bơta cau bơdìh dê, mơ bơtào kơ̆ broă tòm ală cau gơnoar ơn phan duh khoai in mơ ală cau Lebi in, kòp nă tòm broă tòm khai dê,

³¹ mơ añ kung rcang lòng nàng ơn phan duh khoai, jat tŭ tơngai neh lơh nền, mơ ơn ală plai đo bồ sơnam. Ơ Yàng Tom Trồ añ! Dan kah añ bơh bơta lơngai niam Kơnràñ dê!