Nahum 3 - Sră Goh 2018

Bơta tơnroh rơp gơlik tus ò gơs cau lơi pleh klàs

¹ Bòl glar, ƀòn dờng lơh gơhòr mhàm in, jơh ală la bơta đơs blac, bềng bơta tòmpìt tòmhà, bơta ntung kơñau ò tŭ lơi lồi.

² Ntas ală gai cau pù lơh, nggồr ală kong rơndeh; Ơseh ntoat rat mơ rơndeh lòs tòmlơh ntoat mhar.

³ Ling hào ơseh brồ lơh, đào mơ tà àng gơcrà! Oă ngan cau gơplơ̆ chơt, oă gơnru ƀồc chơt, ƀồc ò jai kòp. Làng bol gơtup pừ hơđang ală ƀồc chơt!

⁴ Tài bơh bơta gơlềng gơlàng ò git dil cau ùr dri dê, ngui bơta hàng mơnĕ nàng pơndòm ơniai, cau ùr lơh gru bơjơu, la cau kup lơh dĭ ală lơgar bơh bơta gơlềng gơlàng khai dê.

⁵ Yàng Jehôwa Gơnap Gơnoar Dờng Làm Jơh đơs lah: “Añ rơp hồ tă ồi mbơn ai dê, mơ jơm muh mat ai mơ Añ rơp lòi ală làng bol in sền gŏ bơta ơm kuh lòi rồ ai dê, mơ ală lơgar sền gŏ bơta ƀàssìl ƀàsso ai dê.

⁶ Añ rơp tuh bơta ƀơ̆ ƀơl hơđang ai, Añ rơp sền òsơp di ai, mơ lơh ai in gơlik gơs phan cau dơñŏ tơnhial.

⁷ Jơh ală cau gŏ ai gen pleh ngài bơh di ai mơ đơs lah: ‘Ninibe neh kong tơnroh, ñcau rơp ñìm rac pơt wòl bơh ai taih? Ntềng đah Añ rơp jòi dô nă cau nàng pơndòm pơniang ai taih?’”

⁸ Ai la niam rlau mơ Thebes ơm rềp di hiòng Nil, gơs dà gùt dar khai, ai dàlềng lơh gơs theng kơp gàr khai, dà la dơrñang ƀòn khai dê?

⁹ Kus mơ Ejiptơ la bơta pràn kơldang ò git jơh gơ dê; Phus mơ Libi lơh gơs cau dong kòl khai.

¹⁰ Bulah behơ̆, khai neh kong kup cèng pơrdô tòm lơgar ngài. Kòn sau khai dê neh kong jă trơm lề lac di bồ kòp nơm gùng. Cau neh tă khà hơđang ală cau ryŭ ryơm khai dê, mơ jơh ală cau dờng màng neh kong cap mơ che sreng.

¹¹ Ai kung rơp gơlik be cau bơñul ñô, ai rơp lòt tus di tiah pồn să, mơ jòi tiah kìng crŭ bơh di cau sò tơm.

¹² Jơh ală theng kơ̆ cê ai la kung be ală tòm chi ƀal gơs plai bồ sơnam neh dum, dilah cau rơnggô gơ gen plai gơrung gơdùh tơn di bơr cau sa gơ.

¹³ Sền tĕ di mpồl ling ai dê, digùl mê bol khai mìng la ală cau ùr lơm! Ală mpồng dờng lơgar ai dê pò ơnàng ală cau sò tơm ai in; ồs neh sa pơrguc ală kai mpồng ai dê.

¹⁴ Bơ̆ tĕ dà tài bơh cau sò tơm gòm gơrwàng gùt dar, lơh tĕ kơ̆ tai theng kơ̆ cê ai dê! Pơrjă tĕ ù kơnàng, bơcă tĕ cài bơt hìu, rcang wơl bơnhă lơh gac!

¹⁵ Tềng hơ̆ ồs rơp sa pơrguc ai, đào rơp sreh tơnchơt ai, sa loan ai kung be ală srah nting. Tơnggơs bơtơl tĕ kung be srah, tơnggơs tĕ oă kung be ală srah nting!

¹⁶ Ai neh lơh khà cau kă bro ai dê gơbơtơl oă jơl tus bol khai gơs oă rlau mơ ală sơmañ hơđang trồ, mơya kung be srah nting, bol khai sa tơnroh jơh lơgar gen par roh thit.

¹⁷ Ală cau ling kơp gàr ai dê la kung be srah nting, ală cau kwang duh broă ai dê kung be ală mpồl srah nting; gơ rơp hơđang ală dơrñang tòm dô ngai noat mrềt, mơya tòm tŭ mattơngai lik, gơ par roh thit, ò gơs cau lơi git tiah lơi gơ neh lòt.

¹⁸ Ơ cau bơtau Asiri, ală cau ê mê dê neh bic lơhă; ală cau ryŭ ryơm mê dê neh bic rlô. Làng bol mê dê nrah nring hơđang ală mơnơm, ò gơs cau lơi pơjum bol khai wơl.

¹⁹ Ò gơs sơnơm lơi rgơi sơm tềl sồt mê dê, tềl sồt mê dê rơp lơh mê in chơt. Kòp nă cau lơi kơno jơnau yal bơh mê gen tàp tê khai dê bơh mê, bơh ñcau rgơi pleh klàs bơh bơta iơh bơsak ò git lồi mê dê taih?