Nahum 2 - Sră Goh 2018

Bơta tơrlah tơrlơm ƀòn dờng iơh bơsak

¹ Ơ Ninibe, dô nă cau brồ lơh tòmpìt neh tus tòmdră mơ mê, sền gàr tĕ theng kơ̆ cê, kơp gàr tĕ gùng lòt, kơt kơ̆ tĕ but să tòm mê dê, tơrgòm jơh bơta pràn mê dê!

² Yàng Jehôwa rơp bơtào wơl bơta ryŭ ryơm Jakôp in kung be bơta gơklŏ Israel dê, bulah ală cau tơnroh bol khai neh tơnroh bol khai mơ phà tơnroh ală ntê ño bol khai dê.

³ Khèl ală cau ling khai dê la pơrhê; ală ling tòmlơh soh ào dà gur. Ală lòs tòm ală rơndeh tòmlơh àng gơcrà kung be ồs tòm ngai bol khai neh rcang sir tòmlơh; mơ ală đào neh yò hơđang.

⁴ Ală rơndeh lòs tòmlơh mut tòm ală gùng ƀòn dờng, mơ ntoat ma kiau tòm ală hìu dờng mpồl làng bol; rùp să gơ be sơmpòl ồs, mơ brồ tus mhar kung be puhlèp!

⁵ Khai hòi pơjum ală cau kwang khai dê, bol khai gơtup jơng tòm gùng lòt bol khai dê. Bol khai sơrbac sơrbang brồ tus di dơrñang ƀòn dờng; rcang sir nàng tòmdră.

⁶ Ală mpồng dờng hiòng dê neh pò tơlik, mơ hìu gơlang wañ lơnggơh.

⁷ Bơta lơh nền lah ƀòn dờng pal kong kup cèng lòt tiah ngài, ală cau ùr kong kup cèng gơs dĭ ñìm rac kung be ală sềm ntòp mơ tur ntơh bol khai dê.

⁸ Ninibe gơlơh kung be dô nơm tơnau, bol khai be dà gơ neh hòr lik. Bol khai hòi driau: “Ơm tĕ! Ơm tĕ!” Mơya ò gơs cau lơi wơlke!

⁹ Tòmpìt ai tĕ priă! Tòmpìt ai tĕ màh! Gơs đam jàr ò lồi jơh, ală phan kas màng tơngkah tơngkañ ngan!

¹⁰ Gơ neh kong phà tơnroh, sang lòi ngềt ngơt, tơrlah tơrling! Ală plai nùs bòl glar mơ ală gơltang gơ ơrơm, jơh ală but wañ lơnggơh, jơh ală muh mat gơlik pàl.

¹¹ Tŭ do ntềng đah rgồng klìu triă, la tiah mơ klìu dềt geh pà sa, la đah klìu triă dam, klìu me mơ klìu kòn lòt rê, mơ ò gơs bơta lơi lơh gơ in pal rngòt, tŭ do ntềng đah trồm hơ̆ dê taih?

¹² Klìu triă neh crè tơl phan brê kòn gơ in sa, mơ tơnchơt phan kup geh klìu triă me in, gơ tơmbềng rgồng gơ mơ phan kup geh, tơmbềng trồm gơ mơ poac crè sa.

¹³ Yàng Jehôwa Gơnap Gơnoar Dờng Làm Jơh đơs lah: “Añ tòmdră mơ mê, Añ rơp chu pơrguc ală rơndeh mê tòm ñhŭ, mơ đào rơp sa loan ală klìu triă brồ dam; Añ rơp tơnroh phan kup geh bơh di ù, mơ sap đơs ală cau kong sồr mê dê rơp ò gam kơno tai.”