Mice 7 - Sră Goh 2018

Bơta roh gơcoh Israel dê

¹ Bòl glar añ in! Bơh añ be dô nă cau dòñ plai tơnơ̆ mơ kơnhai prang, tơnơ̆ mơ tŭ cau neh pic plai ño neh dòñ plai ño; ò gơs dô dơrkum lơi nàng sa, plai ƀal bồ sơnam mơ hwềng nùs añ kơp kòñ kung ò geh.

² Ală cau dòn song neh roh thit jơh bơh lơgar; ò gơs dô nă cau song ring lơi gam wơl. Bol khai jơh tơl nă kơp mòc nàng lơh gơhòr mhàm; kòp nă dang bơtơng kup cau ndai.

³ Jơh bàr đah tê bol khai chài rgơi lơh bơta iơh. Kwang at bồ mơ kwang cahrña lùp ală phan sa loă, cau gơs gơnoar pràn sồr ai phan lơi bol khai kòñ; bơta song ring bol khai dê la bơta rkwet rkwe.

⁴ Cau niam rlau jơh tòm bol khai la kung be lò mrơt, cau song ring rlau jơh la iơh rlau mơ pơnggàr lò. Ngai ală cau kơp gàr bol khai dê, hơ̆ la ngai bơta lơh glài bol khai dê neh tus rau. Tŭ do bơta sơlồng sơlàng bol khai dê neh tus rềp rau.

⁵ Bañ dòn kơnòm di dô nă cau bơyô, bañ ơn nùs dòn kơnòm di dô nă cau kòñ gơboh. Kơrmap gàr mpồng bơr mê dê mơ bơh cau ùr bic tòm tơwòr tê mê dê.

⁶ Bơh kòn klau lơh ƀàssìl bèp, kòn ùr ntào tòmdră mơ mè, ƀan tòmdră mơ po me khai dê, mơ cau sò tơm dê mê la cau tòm hìu nhă mê dê.

⁷ Mơya đah mơ añ, añ ai bơta gơn kơnòm mơ tơnggòr sền Yàng Jehôwa, añ rơp kơp gơn Yàng Tom Trồ la bơta dong klàs añ jê; Yàng Tom Trồ añ jê rơp iat añ.

Bơta gơjrañ sang glài mơ dòn kơnòm di Yàng Tom Trồ

⁸ Ơ cau sò tơm di añ, bañ hòn chò bơh añ; tòm tŭ añ gơpừ, añ rơp guh wơl. Tòm tŭ añ nggui tòm tiah klam jơngo, Yàng Jehôwa rơp la bơta àng añ jê.

⁹ Añ pal ơnòng bơta gơjrañ dờng Yàng Jehôwa dê; tài bơh añ neh tìs glài tòmdră mơ Kơnràñ, jơl tus di tŭ Kơnràñ dong tò bơta gơrềng tus di añ, mơ lơh gơlik bơta cahrña añ in. Kơnràñ rơp cèng añ lik hơ bơta àng; Añ rơp sền gŏ bơta song ring Kơnràñ dê.

¹⁰ Gen cau sò tơm di añ rơp gŏ, mơ rơp kong bơta ƀàssìl jơm gòm khai la cau neh đơs mơ añ lah: “Ntềng đah Jehôwa Yàng Tom Trồ mê dê taih?” Mat añ rơp gŏ bơta gơplơ̆ khai dê; tŭ do khai rơp kong jă trơm hơđơm mpàng jơng kung be bŏ tòm ală gùng lòt.

Jơnau đơs hwơr bơh bơta bơtào wơl

¹¹ Gơs dô ngai bơt bơtào ală dơrñang mê dê, tòm ngai pò ơnàng ală nhàr lơgar mê dê.

¹² Tòm ngai hơ̆ bol khai rơp tus hơ mê, bơh Asiri tus hơ Ejiptơ, mơ bơh Ejiptơ tus hơ hiòng Ơphrat, bơh dàlềng do tus hơ dàlềng ne, mơ bơh mơnơm do tus hơ mơnơm ne.

¹³ Mơya plai ù rơp gơlik gơs tiah sang lòi ngềt ngơt tài bơh ală cau ơm tòm hơ̆, mơ bơh cồng nha broă lơh bol khai dê.

Jơnau hòi dan mơ jòng ro

¹⁴ Ê gàr tĕ làng bol mê dê mơ gai jra mê dê, la mpồl belàt gơrê bal mê dê, ơm kis is tòm brê, ơm digùl dô nơm suơn tòm lơgar. Lòi tĕ bol gơ in sa ñhơt tòm Basan mơ Galaat kung be tòm ală ngai yau òr.

¹⁵ Be tòm ală ngai tòm tŭ mê lik bơh lơgar Ejiptơ, sơnio bol hi in gŏ ală bơta crih crài.

¹⁶ Ală làng bol rơp gŏ mơ ƀàssìl, bơh jơh gơnoar pràn bol khai dê. Bol khai rơp ơn tê di bơr bol khai dê, mơ tồr bol khai rơp tĭ.

¹⁷ Bol khai rơp liap thul kung be bơs, kung be phan wìn nsròng hơđang ù. Bol khai rơp rơm să rngòt lik bơh di ală tiah kơp gàr bol khai dê; bol khai rơp tus hơ Jehôwa Yàng Tom Trồ bol he dê tòm bơta rngòt rngơt, mơ bol khai rơp ntào tòm bơta rngòt rngơt mê dê.

Nùs nđàc sơngit mơ bơta kòñ gơboh kơ̆ dơn Yàng Tom Trồ dê

¹⁸ Ñcau la Yàng Tom Trồ tòm toh be Kơnràñ, ò kòp tồi glài mơ toh bơta tìs nrah làng bol gam wơl la sre brê Kơnràñ. Kơnràñ ò prap bơta gơjrañ sùm sùm, tài bơh Kơnràñ niam nùs yal tơlik bơta kòñ nđàc.

¹⁹ Kơnràñ rơp kòñ nđàc tai di bol he, Kơnràñ rơp jă trơm ală tồi glài bol he dê hơđơm jơng Kơnràñ mơ sang sơrbì jơh ală bơta tồi glài iơh bơsak bol he dê tòm ală tiah jrô dàlềng dê.

²⁰ Kơnràñ rơp yal tơlik bơta dòn song mơ Jakôp, mơ yal tơlik bơta song ngan mơ Abraham, jat be Kơnràñ neh ho pơgon mơ ồng pàng bol he dê, bơh tòm ală ngai yau òr.