Mice 5 - Sră Goh 2018

Jơnau ho ai dô nă Cau Gơnoar At Bồ tus bơh Betlehem

¹ Tŭ do, bol mê gơrwàng gùt dar be dô nơm dơrñang! Gơrwàng tòmdră mơ bol hi; Bol khai ai gai pòng di tơrmồ cau at bồ Israel dê.

² Mơya mê, ơ Betlehem Ephrata, mê la dềt tòm mpồl hìu nhă Juda dê, mơya bơh di mê rơp tơnggơs añ in dô bơtau at bồ Israel, tòm ryas Kơnràñ dê la bơh tòm rài yau, bơh ală tŭ tơngai rài yau òr.

³ Gen tàng Israel rơp gơkòl sang lòi jơl tus di tŭ cau ùr jê deh neh deh kòn mơ cau oh mi gam wơl Kơnràñ dê rơp rê wơl lơh gơs dô bă bal mơ kòn sau Israel dê.

⁴ Kơnràñ rơp ntào mơ ê gàr mpồl Kơnràñ dê kơnòm di pràn Yàng Jehôwa dê, bal mơ bơta ryŭ ryơm tòm sơnđan Jehôwa Yàng Tom Trồ Kơnràñ dê. Mơ bol khai rơp ơm lơngap lơngai, bơh tŭ hơ̆ Kơnràñ rơp la dờng làm jơh tus di ală tiah lồi plai ù dê.

⁵ Kơnràñ rơp la bơtau bơta lơngap lơngai dê. Dilah cau Asiri brồ mut tòm ù tiah bol he dê, mơ lòt hơđang ù bol he dê, gen bol he rơp bơtào tơngguh poh nă cau ê gàr, mơ phàm nă cau gơnoar lam bồ làng bol nàng tòmdră mơ khai.

⁶ Bol khai rơp at bồ lơgar Asiri mơ đào, mơ tă đào at bồ lơgar Nimrôt. Bol khai rơp dong bol he klàs bơh cau Asiri, dilah bol khai brồ mut tòm ù tiah bol he dê hala cơnđòa lòt tòm ală nhàr tiah bol he dê.

Bơta dong klàs mơ bơta tơnroh

⁷ Pơnah gam wơl Jakôp dê rơp ơm digùl oă làng bol kung be dà tŭ tus bơh di Yàng Jehôwa, kung be mìu dùh hơđang ñhơt, gơ ò gơn kơnòm di cau hala kơp gơn jơi kòn mơnus.

⁸ Pơnah gam wơl Jakôp dê rơp ơm digùl oă lơgar, mơ ơm digùl oă làng bol kung be dô nơm klìu triă ơm digùl ală phan poan jơng tòm brê, mơ kung be dô nơm klìu triă brồ dam ơm digùl ală mpồl belàt, tòm tŭ gơ lòt gan gơ jă trơm mơ kap crè rpot rpet, ò gơs cau lơi rgơi dong klàs.

⁹ Tê Kơnràñ rơp yò tơngguh hơđang rlau mơ ală cau sò tơm di Kơnràñ, mơ jơh ală cau sò tơm Kơnràñ dê rơp kong tơnroh.

¹⁰ Yàng Jehôwa đơs lah: “Tòm ngai hơ̆, Añ rơp tơnroh ală ơseh bơh digùl bol mê, mơ tơnroh jơh ală rơndeh ơseh tòmlơh bol mê dê.

¹¹ Añ rơp tơnroh ală ƀòn dờng tòm lơgar bol mê dê, mơ phà tơrlah ală theng kơ̆ cê bol mê dê.

¹² Añ rơp tơnroh bơta juh proh bơh tê bol mê dê mơ bol mê rơp ò gơs tŭ lơi sền dà tai.

¹³ Añ rơp tơnroh ală rùp ràk pac sềr bol mê dê, bal mơ ală jrong duh khoai bơh digùl bol mê dê, mơ bol mê rơp ò tai kun duh khoai ală broă bơh tê bol mê dê.

¹⁴ Añ rơp dus sang ală jrong Asera bơh digùl bol mê, mơ tơnroh ală ƀòn dờng bol mê dê.

¹⁵ Tòm bơta gơhào gơjrañ mơ gơjrañ dờng, Añ rơp sal tê di ală lơgar ò dòn bơr Añ.”