Mice 2 - Sră Goh 2018

Israel tìs glài mơ kong lơh glài

¹ Bòl glar cau lơi in bơtào kai bơta jàñ bơsak, mơ broă iơh rmơh hơđang cơnòng bic bol khai dê! Tòm tŭ trồ rìng àng, bol khai lơh gơs bơta hơ̆ tài bơh gơ ơm tòm gơnoar bol khai dê.

² Bol khai hàm kòñ ală ƀlàng sre mơ tòmpìt gơ, hàm hà hìu đam mơ tă sơmbrơt gơ. Bol khai rồn bơklơn cau tòm hìu mơ hìu; la cau mơ sre brê bol khai dê.

³ Behơ̆ tàng Yàng Jehôwa đơs be do: “Añ lòi wơl dô bơta iơh tòmdră mơ làng bol do, bol mê ò rgơi hồ bơh di ngko bol mê dê; mơ bol mê ò rgơi cơnđòa lòt pò bồ; bơh hơ̆ rơp la dô tŭ tơngai iơh rmơh ngan.

⁴ Tòm ngai hơ̆, bol khai rơp ñŏ tơnhial di bol mê bơh dô jơnau đơs crih tòmdră mơ bol mê; mơ ñìm rac pơt wòl lah, Bol he kong tơnroh jơh hir; Yàng Jehôwa tòmgơl jơh sre brê làng bol añ jê, Kơnràñ tă ai gơ bơh di añ, Kơnràñ ai ù tiah he dê ală cau tòmdră in.”

⁵ Gen tàng tòm mpồl jơnum Yàng Jehôwa dê, bol mê rơp ò gơs dô nă cau lơi nàng tă khà tòmpà ù tiah.

Ală cau gơnoar hwơr ma blac

⁶ Bol khai bơto lah: “Bañ đơs hwơr. Bañ đơs hwơr bơh ală bơta do; bơta dơñŏ tơnhial rơp ò tus hơđang bol he ò.”

⁷ Ơ hìu Jakôp; di pal sơl đơs lah Hwềng Yàng Jehôwa ò gam ơt ơl ơ? Kơnràñ lơh ală bơta behơ̆ sơl ơ? Jơnau đơs Añ jê ò di gơs kwơ cau lơi in lòt jat ală gùng song ring ò ơ?

⁸ Mơya bol mê guh tòmdră mơ làng bol Añ jê kung be dô nă cau sò tơm. Bol mê hồ ào jrùh bơh di ală cau ơm ring lơngai, bơh di ală cau lòt gùng dòn kơnòm mơ ò kơlôi bơh bơta kơlìn.

⁹ Bol mê bơtrơh ală cau ùr làng bol Añ jê lik bơh di ală hìu ơm niam nùs bol khai dê. Bol mê tă bơta gơklŏ gam sùm sùm Añ jê bơh di kòn sau bol khai dê.

¹⁰ Ñă ntào tĕ, mơ lòt! Bơh do ò di la tiah rlô bòl bol mê dê, tài bơh bơta ƀơ̆ ƀơl gơ neh kòl tơnroh bal mơ bơta jê sồt roh gơprah.

¹¹ Dilah gơs dô nă cau đơs blac pơrlồm tus đơs lah: “Añ rơp bơto bol mê in bơh tơrnòm mơ phan ñô lơh bơñul,” gen cau hơ̆ rơp lơh gơs cau bơto làng bol do in!

Bơta ho pơgon bơh cau Israel gam wơl

¹² “Ơ Jakôp! Ngan Añ rơp pơjum wơl jơh ală bol mê; Añ rơp tơrgòm ală cau gam wơl Israel dê, Añ rơp ơn bol khai dô bă bal be belàt tòm dô mpồl, be dô mpồl tòm ƀlàng ñhơt gơ dê; rơp gơlik gơs jơnau lơh nggồr mpong bơh làng bol oă.

¹³ Dô nă cau pò gùng rơp guh lài mơ bol khai; bol khai rơp brồ tus lòt gan di mpồng dờng mơ lik bơh hơ̆. Cau bơtau bol khai dê rơp lòt gan di đap bol khai, Yàng Jehôwa lam bồ bol khai.”