Mathiơ 25 - Sră Goh 2018

Pơnyơu bơh jơt nă cau ơruh

¹ “Tŭ hơ̆ lơgar đang trồ rơp tòm toh be jơt nă cau ơruh at đèng lòt wă rò bơrtơu.

² Tòm bol khai, gơs pram nă bơrngơl mơ pram nă jak.

³ Ală cau ơruh bơrngơl at đèng mơ ò cèng mơñà ồs bal,

⁴ ai ală cau ơruh jak at đèng mơ cèng mơñà ồs bal.

⁵ Tài bơh bơrtơu òbat tus, gen bol khai gơdan bic yồp yồi mơ bic lơhă.

⁶ Tus digùl mơnang gơs jơnau hòi lah: ‘Ne, bơrtơu tus! Lik lòt tĕ wă rò khai.’

⁷ Gen ală cau ơruh hơ̆ kah rngal jơh, rcang đèng bol khai dê.

⁸ Ală cau ơruh bơrngơl đơs mơ ală cau ơruh jak lah: ‘Dan tòmpà mơñà ồs ală bi dê bol hi in ƀà, bơh đèng hi mòr chơt.’

⁹ Mơya ală cau ơruh jak ho lah: ‘Rngòt ò tơl bol hi mơ ală bi in sơl. Chan ală bi lòt tus hơ cau tac nàng rwat.’

¹⁰ Mơ tòm tŭ bol khai lòt rwat, gen bơrtơu tus; ală cau neh rcang sir lòt bal mơ bơrtơu mut tòm tiah sa tòmbau, mơ til mpồng.

¹¹ Lồc behơ̆, ală cau ơruh ne kung tus mơ đơs lah: ‘Ơ Yàng, ơ Yàng, dan pò mpồng bol hi in!’

¹² Mơya cau tòmho lah: ‘Di ngan añ đơs mơ bol ai, añ ò git bol ai ò.’

¹³ Behơ̆, drơng kơp tĕ bơh bol mê ò git ngai mơ kung ò git jơ Añ rê wơl.”

Pơnyơu bơh ală talơng

¹⁴ “Mơ tai, lơgar đang trồ rơp tòm toh be dô nă cau ne mòr lòt ngài, gen hòi ală cau dĭ nàng jào phan mơna bol khai in.

¹⁵ Cau tòm jào cau do in pram talơng, cau ne bàr talơng, cau ndai dô talơng, jat be bơta chài rgơi kòp nă cau dê; gen cau tòm lik lòt.

¹⁶ Cau neh dòp pram talơng lòt kă bro mo mơ lơh gơlik cồng pram talơng tai.

¹⁷ Cau neh dòp bàr talơng kung lơh gơlik cồng bàr talơng sơl.

¹⁸ Ai cau dòp dô talơng, gen lòt tò trồm tòm ù mơ pồn priă cau tòm dê.

¹⁹ Tòm jŏ tơngai, cau tòm ală cau dĭ hơ̆ rê wơl ting khà priă mơ bol khai.

²⁰ Cau neh dòp pram talơng tus cèng pram talơng tai mơ yal lah: ‘Ơ ồng, ồng neh jào añ in pram talơng, do añ neh lơh gơlik cồng pram talơng tai.’

²¹ Cau tòm đơs mơ khai lah: ‘Ơ cau dĭ lơbơn niam mơ dòn song ne, niam ngan; mê neh dòn song tòm broă dềt, añ rơp bơtào mê tòm oă broă. Mut tĕ tòm bơta hòn chò cau tòm mê dê.’

²² Cau neh dòp bàr talơng kung tus mơ yal lah: ‘Ơ ồng, ồng neh jào añ in bàr talơng; do añ neh lơh gơlik cồng bàr talơng tai.’

²³ Cau tòm đơs mơ khai lah: ‘Ơ cau dĭ lơbơn niam mơ dòn song ne, niam ngan; mê neh dòn song tòm broă dềt, añ rơp bơtào mê tòm oă broă. Mut tĕ tòm bơta hòn chò cau tòm mê dê.’

²⁴ Cau neh dòp dô talơng kung tus mơ yal lah: ‘Ơ ồng, añ git ồng la cau kràñ cê, toès tòm tiah ồng ò sih, dòñ tòm tiah ồng ò rsìh,

²⁵ gen tàng añ rngòt mơ lòt pồn talơng ồng dê tòm ù. Do phan ồng dê gam tềng do.’

²⁶ Mơya cau tòmho lah: ‘Ơ cau dĭ iơh bơsak mơ alah ne! Mê git añ toès tòm tiah añ ò sih, mơ dòñ tòm tiah añ ò rsìh;

²⁷ behơ̆ mê pal ai priă añ jê cau kă bro priă in, nàng tòm tŭ añ rê wơl gen rơp ai wơl phan añ mơ cồng gơ dê sơl.

²⁸ Behơ̆ tă tĕ talơng bơh khai mơ ai cau gơs jơt talơng in.

²⁹ Bơh cau lơi gơs rơp ai bơtơl tai, tồ khai geh tơngkah tơngkañ; mơya cau lơi ò gơs, bulah phan khai neh gơs kung rơp tă tơlik tơn.

³⁰ Ai cau dĭ ò kwơ do, sơrbì tĕ khai hơ bơdìh tòm tiah klam jơngo, tềng hơ̆ rơp gơs ñìm rac mơ rkiat sề.’”

Bơta cahrña tòm ngai lồi dut

³¹ “Tòm tŭ Kòn Mơnus ơm tòm bơta gơklŏ Kơnràñ dê tus bal mơ jơh ală cau gơnrơh, gen Kơnràñ rơp nggui hơđang sơbàn gơklŏ.

³² Jơh ală làng bol pơjum bal di đap Kơnràñ, gen Kơnràñ cah is làng bol do mơ làng bol ndai, kung be cau ê cah belàt mơ be,

³³ ơn belàt đah ma mơ be đah kiau.

³⁴ Tŭ hơ̆ Bơtau rơp đơs mơ ală cau ơm đah ma lah: ‘Ơ ală cau geh lơngai bơh di Bèp añ jê, tus tĕ pơrdòn lơgar neh rcang sir bol mê in bơh tŭ crơng gơs trồ tiah.

³⁵ Bơh Añ jơgloh, bol mê ai Añ in sa; Añ tơhìr, bol mê ai Añ in hùc; Añ la cau nac crih, bol mê wă rò Añ;

³⁶ Añ ơm kuh, bol mê tơnsoh Añ in, Añ kòp jê, bol mê lòt còp Añ; Añ kòl jàm, bol mê tus còp Añ.’

³⁷ Tŭ hơ̆ cau song ring ho lah: ‘Ơ Yàng, tŭ lơi bol hi neh gŏ Yàng jơgloh mơ ai Yàng in sa, hala tơhìr mơ ai Yàng in hùc taih?

³⁸ Tŭ lơi bol hi neh gŏ Yàng la cau nac crih mơ wă rò, hala ơm kuh mơ tơnsoh Yàng in taih?

³⁹ Tŭ lơi bol hi neh gŏ Yàng kòp jê hala kòl jàm, mơ lòt còp Yàng taih?’

⁴⁰ Cau Bơtau rơp ho lah: ‘Di ngan Añ đơs mơ bol mê, tòm tŭ bol mê neh lơh broă hơ̆ mơ dô nă cau dềt rhền rlau jơh tòm ală oh mi Añ, hơ̆ la lơh să tòm Añ in.’

⁴¹ Gen Kơnràñ rơp đơs mơ ală cau ơm đah kiau lah: ‘Ơ ală cau gơkòl srat rma, lik tĕ bơh di Añ mơ mut tòm ồs gam sùm sùm, la tiah neh rcang sir cà ràk in mơ ală cau gơnrơh gơ dê.

⁴² Bơh Añ jơgloh, bol mê ò ai Añ in sa; Añ tơhìr, bol mê ò ai Añ in hùc;

⁴³ Añ la cau nac crih, bol mê ò wă rò Añ; Añ ơm kuh, bol mê ò tơnsoh Añ in; Añ kòp jê mơ kòl jàm, bol mi ò lòt còp Añ.’

⁴⁴ Tŭ hơ̆ bol khai kung rơp ho lah: ‘Ơ Yàng, tŭ lơi bol hi neh gŏ Yàng jơgloh, hala tơhìr, hala cau nac crih, hala ơm kuh, hala kòl jàm, mơ ò duh broă Kơnràñ in ơ?’

⁴⁵ Kơnràñ rơp ho lah: ‘Di ngan Añ đơs mơ bol mê, tòm tŭ bol mê ò lơh broă hơ̆ mơ dô nă cau dềt rhền rlau jơh do, hơ̆ la bol mê ò lơh să tòm Añ in.’

⁴⁶ Gen ală cau do rơp mut tòm bơta lơh glài gam sùm sùm, ai ală cau song ring gen rơp mut tòm bơta kis gam sùm sùm.”