Mathiơ 19 - Sră Goh 2018

Gơnoar broă Yàng Jesu tòm Jude mơ Jerusalem ( 19:1 – 25:46 ) Yàng Jesu bơto bơh bơta lòi bau

¹ Tòm tŭ Yàng Jesu neh bơto ală jơnau hơ̆ rau, gen bơh Galile lòt tus hơ kơnhwàl Jude đah ne hiòng Jordan.

² Gơs mpồl làng bol oă jat Kơnràñ, tềng hơ̆ Kơnràñ sơmbòi bol khai in.

³ Gơs cau Pharisi tus lòng Kơnràñ mơ đơs lah: “Bulah bơh bơta lơi cau klau kung gơs gơnoar lòi bau ùr khai dê sơl?”

⁴ Kơnràñ ho lah: “Bol mê òhềt sền jơnau neh cih lah, bơh sơnròp Yàng Tom Trồ neh lơh gơs cau klau mơ cau ùr,

⁵ mơ đơs lah: ‘Tài bơh hơ̆, cau klau rơp lik bơh mè bèp mơ đềt mềr mơ bau ùr khai dê, mơ bàr nă rơp gơlik gơs dô nơm poac bal ò ơ?’

⁶ Behơ̆ gen bol khai ò di la bàr tai, mơya dô nơm poac lơm. Behơ̆ cau bañ cah is ală cau mơ Yàng Tom Trồ neh bơrkoat bal!”

⁷ Bol khai lùp tai Kơnràñ lah: “Behơ̆ ñchi bơh tài Môise neh sồr ai sră tòmlòi nàng lòi bau ùr taih?”

⁸ Kơnràñ đơs lah: “Bơh nùs bol mê kră kơldang gen tàng Môise ai gơnoar bol mê in lòi bau ùr, mơya bơh sơnròp ò gơs behơ̆ ò.

⁹ Mơ Añ đơs mơ bol mê, cau lơi lòi bau ùr khai dê, ò di bơh glài rềs àr bơrnàn, mơ bau mơ cau ndai gen cau hơ̆ tìs glài bơrnàn; ai cau lơi bau mơ ùr cau lòi hơ̆ gen kung tìs glài bơrnàn sơl.”

¹⁰ Ală cau bơtê đơs mơ Kơnràñ lah: “Dilah tòm rài cau klau, gơs mìng bơta behơ̆ lơm mơ lòi bau ùr, gen chan ò bau la niam rlau.”

¹¹ Mơya Kơnràñ đơs tai lah: “Ò di jơh tơl nă cau rgơi dòp jơnau hơ̆, mìng ală cau geh ai lơm.

¹² Bơh gơs cau kơndời bơh tòm kơndul mè, gơs cau kơndời bơh cau ndai, mơ gơs cau kơndời la bơh să tòm khai lơh is tài bơh lơgar đang trồ. Cau lơi rgơi dòp jơnau hơ̆ gen dòp tĕ.”

Yàng Jesu ai lơngai ală kơnòm dềt in

¹³ Tŭ hơ̆ cau cèng ală kơnòm dềt tus hơ Yàng Jesu, nàng Kơnràñ ơn tê hơđang bol khai mơ hòi dan bol khai in, mơya ală cau bơtê lah pơrhơng ală cau cèng hơ̆.

¹⁴ Yàng Jesu đơs lah: “Lòi tĕ ală kơnòm dềt tus hơ Añ, bañ bơkơŭ bol khai; bơh lơgar đang trồ gơrê mơ ală cau be bol khai.”

¹⁵ Kơnràñ ơn tê hơđang bol khai, gen lik lòt bơh tềng hơ̆.

Cau kwang pas sơm

¹⁶ Ne, gơs dô nă cau tus lùp Yàng Jesu lah: “Ơ Cau Bơto, añ pal lơh broă niam lơi nàng geh bơta kis gam sùm sùm taih?”

¹⁷ Yàng Jesu ho lah: “Ñchi bơh tài mê lùp Añ bơh broă niam taih? Mìng gơs dô Bơtau niam lơm. Dilah mê kòñ mut tòm bơta kis, gen pal prap gàr ală bơta sồr lam.”

¹⁸ Cau hơ̆ lùp lah: “Bơta sồr lam lơi taih?” Yàng Jesu ho lah: “Mê bañ tơnchơt cau, bañ tìs glài rềs àr bơrnàn, bañ ntung kơñau, bañ lơh cơng blac,

¹⁹ dòn duh tĕ mè bèp mê, mơ kòñ gơboh tĕ di cau gơp ƀòn he be he.”

²⁰ Cau pơnu hơ̆ đơs lah: “Añ neh prap gàr ală bơta hơ̆ rau, bơta lơi añ gam siơ̆u taih?”

²¹ Yàng Jesu đơs mơ khai lah: “Dilah mê kòñ gơs wil tơl, gen lòt tĕ tac jơh ală phan mơna mê dê mơ tòmpà cau rƀah lơòi in, gen mê rơp geh phan màng hơđang trồ; lồc behơ̆ tus tĕ jat Añ.”

²² Mơya dơ̆ kơno jơnau hơ̆, gen cau pơnu moat jrùng mơ lòt, bơh khai gơs oă ngan phan mơna.

²³ Gen Yàng Jesu đơs mơ ală cau bơtê lah: “Di ngan Añ đơs mơ bol mê, cau pas sơm mut tòm lơgar đang trồ la kalke ngan.

²⁴ Añ đơs tai mơ bol mê, làkđa mut tòm trồm jrum la ƀuơn rlau mơ cau pas sơm mut tòm lơgar Yàng Tom Trồ.”

²⁵ Ală cau bơtê kơno jơnau hơ̆ gen ai lơh crih crài oă ngan mơ đơs lah: “Behơ̆ gen ñcau rgơi geh dong klàs taih?”

²⁶ Yàng Jesu sền di bol khai mơ đơs lah: “Bơta hơ̆ jơi kòn mơnus ò rgơi lơh, mơya Yàng Tom Trồ rgơi lơh jơh ală bơta.”

²⁷ Tŭ hơ̆ Pier đơs mơ Kơnràñ lah: “Ơ Yàng, bol hi neh sang jơh ală bơta mơ jat Kơnràñ. Behơ̆ gen ñchi bol hi rơp geh taih?”

²⁸ Yàng Jesu ho lah: “Di ngan Añ đơs mơ bol mê, tus di tŭ jơh ală bơta gơs wơl pa, la tŭ Kòn Mơnus rơp nggui hơđang sơbàn gơklŏ Kơnràñ dê, gen bol mê la cau neh jat Añ kung rơp nggui hơđang jơt bàr nơm sơbàn mơ cahrña jơt bàr jơi bơtiàn làng bol Israel.

²⁹ Dilah cau lơi bơh sơnđan Añ mơ sang hìu đam, oh mi, ruh lŏ, mè bèp, oh kòn, hala sre brê, gen cau hơ̆ rơp dòp leng dô rhiang dơ̆ rlau mơ hơ̆, mơ pơrdòn bơta kis gam sùm sùm.

³⁰ Mơya gơs oă cau sơnròp rơp gơs lồi dut mơ cau lồi dut rơp gơs sơnròp.”