Mathiơ 11 - Sră Goh 2018

Cau kong sồr bơh Jang Ƀaptis

¹ Tòm tŭ Yàng Jesu neh nting sồr jơt bàr nă cau gơnoar bơto dờng rau, gen lòt bơh tiah hơ̆ nàng bơto sồr mơ bơto yal tòm ală ƀòn dờng bol khai dê.

² Mơ tai, Jang ơm tòm hìu jàm kơno đơs bơh ală broă Bơtau Krist dê, gen sồr ală cau bơtê khai dê lòt tus,

³ đơs mơ Kơnràñ lah: “Cau Bơto la Bơtau pal tus, hala bol hi pal gơn bơtau ndai taih?”

⁴ Yàng Jesu ho lah: “Rê tĕ yal Jang in ală bơta bol mê neh kơno mơ gŏ;

⁵ cau jơngo geh àng, cau pă geh lòt, cau dun geh goh, cau tĭ geh klo, cau chơt geh kis wơl, cau rƀah lơòi geh kơno bơto yal Jơnau Niam.

⁶ Lơngai cau lơi in ò gơtup tìs tài bơh Añ!”

⁷ Dơ̆ bol hơ̆ lik rê gen sồng Yàng Jesu đơs mơ mpồl làng bol bơh Jang lah: “Ñchi bol mê lik sền tòm ƀlàng bràs taih? Sền tòm proh gơkòl càl tơnwañ ơ?

⁸ Hala ñchi bol mê lik sền taih? Sền cau soh ào kas màng ơ? Ne, ală cau soh ào kas màng gen ơm tòm gơlang bơtau dê.

⁹ Behơ̆ gen ñchi bol mê lik sền taih? Nàng sền cau gơnoar hwơr ơ? Ngan Añ đơs mơ bol mê, kung lin rlau mơ cau gơnoar hwơr tai sơl.

¹⁰ Bơh cau hơ̆ mơ gơs jơnau cih lah: ‘Do, Añ sồr cau kong sồr Añ jê lòt lài di đap mê, La cau rơp wàs gùng lài mê in.’

¹¹ Di ngan Añ đơs mơ bol mê, tòm ală cau deh bơh cau ùr, ò gơs cau lơi dờng màng rlau mơ Jang Ƀaptis, mơya cau dềt rlau jơh tòm lơgar đang trồ la dờng rlau mơ khai.

¹² Bơh ngai Jang Ƀaptis dê jơl tus tŭ do, lơgar đang trồ neh geh bơtào tơngguh pràn kơldang, mơ cau pràn kơldang tòmpìt geh gơ.

¹³ Bơh jơh ală cau gơnoar hwơr mơ bơta boh lam neh đơs hwơr jơl tus dê rài Jang.

¹⁴ Dilah bol mê kòñ dòp, gen hơ̆ la Eli la cau pal tus.

¹⁵ Cau lơi gơs tồr gen iat tĕ.

¹⁶ Añ rơp pơndròm cau rài do mơ ñcau taih? Bol khai be ală cau kơnòm nggui tòm drà, hòi driau mơ oh mi bơyô he lah:

¹⁷ ‘Bol hi neh uh kơwào bol mê in, mơya bol mê ò tòmya; bol hi neh pơt wòl, mơya bol mê ò ñìm rac.’

¹⁸ Bơh Jang neh tus ò sa ò ñô, gen cau đơs lah: ‘Khai gơkòl cà lơh.’

¹⁹ Kòn mơnus tus sa mơ ñô, gen cau đơs lah: ‘Ne, khai la cau jròk sa jròk ñô, oh mi bơyô mơ ală cau dar dia mơ cau glài!’ Behơ̆, bơta jak chài geh lơh cơng la song ring bơh broă lơh gơ dê.”

Ƀòn kơldang nùs

²⁰ Ală ƀòn dờng mơ Yàng Jesu neh lơh broă gơnap gơnoar oă rlau, mơ kư̆ ò bài gơjrañ sang glài, gen Kơnràñ lah pơrhơng bol khai lah:

²¹ “Bòl glar mê in, ơ Kôrajin! Bòl glar mê in, ơ Betsaida! Bơh ală broă gơnap gơnoar neh geh lơh gơs digùl bol mê, dilah geh lơh gơs tòm Tirơ mơ Sidôn, gen bol khai neh soh ào bài sơnò kiat, ơm tòm bùh mơ gơjrañ sang glài neh jŏ rau.

²² Mơya Añ đơs mơ bol mê, tòm ngai cahrña, Tirơ mơ Sidôn rơp kong nggòc rlau mơ bol mê.

²³ Ai mê, ơ Kapenaum, mê rơp geh yò tơngguh tus hơđang trồ sơl? Ngan mê pal kong tơmù tus tòm lơgar làng ƀồc! Bơh ală broă gơnap gơnoar neh lơh digùl mê, dilah lơh tòm Sôdôm, gen ƀòn hơ̆ gam wơl tus ngai do.

²⁴ Mơya Añ đơs mơ bol mê, tòm ngai cahrña, Sôdôm rơp kong nggòc rlau mơ mê.”

Tus hơ Añ nàng rlô bòl

²⁵ Tòm tŭ hơ̆ Yàng Jesu đơs lah: “Ơ Bèp, Añ ưnngài Bèp la Yàng trồ tiah dê, bơh Bèp neh pồn ală bơta do di ală cau jak chài àng loh, mơ yal tơlik ală kơnòm dềt in.

²⁶ Ngan behơ̆, ơ Bèp, bơh hơ̆ la nùs kòñ Bèp dê.

²⁷ Bèp Añ neh jào jơh ală bơta Añ in; rlau mơ Bèp, ò gơs cau lơi git Kòn. Rlau mơ Kòn, cau lơi Kòn kòñ yal tơlik, kung ò gơs cau lơi git Bèp.

²⁸ Ơ jơh ală cau kong bòl glar lơh broă mơ àñ kơnjơ̆, tus tĕ hơ Añ; Añ rơp ai bol mê in rlô bòl.

²⁹ Bol mê tui tĕ yô Añ jê mơ bơtê jat Añ, bơh Añ gơs nùs niam lơnhơn mơ pơndêt să, gen hwềng soàn bol mê rơp geh rlô bòl.

³⁰ Bơh yô Añ la ƀuơn mơ phan àñ Añ jê la nggòc.”