Mathiơ 10 - Sră Goh 2018

Jơt bàr nă cau gơnoar bơto dờng

¹ Yàng Jesu hòi jơt bàr nă cau bơtê tus, ai bol khai in gơs gơnoar hơđang ală cà nàng bơtrơh bol gơ, mơ sơmbòi ală bơta kòp jê lơbơn lơño.

² Do la sơnđan jơt bàr nă cau gơnoar bơto dờng: Sơnròp la Simôn, kung sơnđan la Pier mơ Andre la oh khai; Jakơ kòn Sebede mơ Jang la oh khai dê;

³ Philip mơ Bathelemi; Thôma mơ Mathiơ la cau dar dia; Jakơ kòn Alphe mơ Thade;

⁴ Simôn cau Kanaan mơ Juda Iskariôt, la cau pơrlơ̆ dră dê Yàng Jesu.

Gơnoar broă cau gơnoar bơto dờng

⁵ Gen Yàng Jesu sồr jơt bàr nă cau gơnoar bơto dờng do lòt mơ nting lah: “Bañ lòt tus hơ làng bol Bơdìh, mơ bañ mut tòm ƀòn dờng lơi cau Samari dê,

⁶ mơya lòt tus tĕ hơ ală belàt tìs nrah hìu Israel dê.

⁷ Tòm tŭ lòt, bơto yal lah: ‘Lơgar đang trồ neh tus rềp rau.’

⁸ Sơmbòi tĕ cau kòp jê, sồr cau chơt kis wơl, lơh goh cau dun mơ bơtrơh ală cà. Bol mê neh dòp gòi, gen pà tĕ gòi.

⁹ Bañ cèng màh hala priă hala jền mơ kòng tòm che but bol mê dê;

¹⁰ kung bañ cèng kơldung lòt gùng, hala bàr blah ào dơlam, hala gơltau jă, hala gai jra, bơh cau lơh broă pal gơs phan sa.

¹¹ Tòm tŭ bol mê mut tòm ƀòn dờng hala ƀòn dềt lơi, gen jòi lùp tĕ tềng hơ̆ gơs cau lơi di pal, gen ơm tĕ bal mơ khai tus di tŭ lik lòt.

¹² Dơ̆ mut tòm hìu hơ̆, gen ai lơngai tĕ.

¹³ Dilah hìu hơ̆ di pal, gen bơta lơngap lơngai bol mê dê rơp ơm tòm hìu hơ̆; dilah ò, gen bơta lơngap lơngai bol mê dê gơrê wơl hơ bol mê.

¹⁴ Cau lơi ò wă rò bol mê hala ò iat jơnau bol mê, tŭ lik bơh hìu hơ̆ hala bơh ƀòn dờng hơ̆, gen rtuh tĕ thul bơh di jơng bol mê dê.

¹⁵ Di ngan Añ đơs mơ bol mê, tòm ngai cahrña, lơgar Sôdôm mơ Gômôrơ rơp kong nggòc rlau mơ ƀòn dờng hơ̆.”

Gơtơntus bơta kup kơryan

¹⁶ “Do Añ sồr bol mê lòt kung ò gơkrơi be belàt digùl mpồl so rhau. Behơ̆ chài rgơi tĕ be bơs, mơ lơbơn niam tĕ be sềm ntòp.

¹⁷ Kơrhia tĕ dê cau, bơh bol khai rơp bơtào bol mê di đap Mpồl Kwang Tơrña, mơ pù lơh bol mê tòm ală hìu jum.

¹⁸ Bol mê rơp kòl hwài tus di đap ală cau kwang đơng lơgar mơ ală cau bơtau tài bơh Añ, nàng lơh cơng di đap bol khai mơ ală làng bol Bơdìh.

¹⁹ Mơya tòm tŭ bol khai bơtào bol mê, gen bañ kơlôi rcang mbe lơi hala jơnau lơi bol mê pal đơs. Bơh rơp ai bol mê in ală jơnau pal đơs tòm jơ hơ̆.

²⁰ Bơh ò di bol mê đơs is ò, mơya la Hwềng Yàng Bèp bol mê dê ơm tòm bol mê đơs gơ dê.

²¹ Oh mơ mi rơp bơtào bal nàng kòl tơnchơt, bèp rơp bơtào kòn, ală kòn rơp tòmdră mơ mè bèp mơ tơnchơt bol khai.

²² Bol mê rơp gơkòl jơh ală cau gơjrañ kơuềng tài bơh sơnđan Añ. Mơya cau lơi kơ̆ nùs jơl tus di lồi dut, gen rơp geh dong klàs.

²³ Tòm tŭ bol khai kup kơryan bol mê tòm ƀòn dờng do, gen dô tĕ tòm ƀòn dờng ne; bơh di ngan Añ đơs mơ bol mê, bol mê òhềt lòt làm ală ƀòn dờng Israel dê, gen Kòn mơnus neh tus rau.

²⁴ Cau bơtê ò lin rlau mơ cau bơto, mơ cau dĭ ò lin rlau mơ cau tòm.

²⁵ Cau bơtê gơs be cau bơto, cau dĭ gơs be cau tòm, gen tơl rau. Dilah cau tòm hìu kung neh kòl cau sơnđan la Beeljebul, tơ ài lah cau ơm tòm hìu.”

Ñcau he pal rngòt

²⁶ “Behơ̆ bañ rngòt di bol khai, bơh ò gơs bơta lơi pồn ndơp mơ ò gơ pò tơlik, ò gơs bơta lơi ndơp ndơr mơ ò gơ ràng tơlik.

²⁷ Jơnau Añ đơs mơ bol mê tòm tiah jơngo, sơnio yal tĕ tòm tiah àng; jơnau bol mê kơno cau đơs chều, yal tơlik tĕ hơđang rkàng hìu.

²⁸ Bañ rngòt di cau tơnchơt să jan mơ ò rgơi tơnchơt hwềng soàn; mơya chan rngòt tĕ di Bơtau rgơi tơnroh hwềng soàn bal mơ să jan tòm brong ồs.

²⁹ Bàr nơm rac ò di òs tac dô su ơ? Bulah behơ̆, ò gơs dô nơm lơi rung tòm ù dilah ò bơh nùs kòñ Bèp bol mê dê.

³⁰ Sŏ hơđang bồ bol mê kung neh kòp jơh rau.

³¹ Behơ̆ bañ rngòt, bơh bol mê la màng rlau mơ oă rac.”

Dòn dòp hala pơndang sang Bơtau Krist

³² Cau lơi yal tơlik Añ di đap cau, gen Añ kung rơp yal tơlik khai di đap Bèp Añ ơm hơđang trồ.

³³ Ai cau lơi pơndang sang Añ di đap cau, gen Añ kung rơp pơndang sang khai di đap Bèp Añ ơm hơđang trồ sơl.

Ò di ring lơngai mơya la pềs tà

³⁴ “Bañ kơlôi lah Añ tus nàng cèng bơta ring lơngai tòm ù; Añ tus ò di nàng cèng bơta ring lơngai ò, mơya cèng đào.

³⁵ Bơh Añ tus nàng lơh gơtòm pơrlơ̆ bal, kòn klau mơ bèp, kòn ùr mơ mè, ƀan mơ po me;

³⁶ cau sò tơm bol mê dê hơ̆ la cau tòm hìu nhă he.

³⁷ Cau lơi kòñ gơboh di bèp hala mè rlau mơ Añ, gen ò di pal Añ in; mơ cau lơi kòñ gơboh di kòn klau hala kòn ùr rlau mơ Añ, kung ò di pal Añ in.

³⁸ Cau lơi ò tui chi pơng khai dê mơ jat Añ, gen ò di pal Añ in.

³⁹ Cau lơi jòi bàn bơta kis he, gen rơp roh; ai cau lơi tài bơh Añ mơ roh bơta kis he, gen rơp jòi bàn wơl.”

Phan ƀàn

⁴⁰ “Cau lơi wă rò bol mê, hơ̆ la wă rò Añ, mơ cau lơi wă rò Añ, hơ̆ la wă rò Bơtau neh sồr Añ lòt tus.

⁴¹ Cau lơi bơh sơnđan cau gơnoar hwơr mơ wă rò dô nă cau gơnoar hwơr, gen rơp geh phan ƀàn cau gơnoar hwơr dê; ai cau lơi bơh sơnđan cau song ring mơ wă rò dô nă cau song ring, gen rơp geh phan ƀàn cau song ring dê.

⁴² Cau lơi ai dô nă tòm mpồl kơnòm dềt do in mìng hùc dô mơngàn dà ngềt lơm, tài bơh kơnòm hơ̆ la cau bơtê Añ jê, di ngan Añ đơs mơ bol mê, cau hơ̆ rơp ò gơs tŭ lơi roh phan ƀàn khai dê.”