Luka 9 - Sră Goh 2018

Yàng Jesu sồr jơt bàr nă cau bơtê

¹ Yàng Jesu hòi jơt bàr nă cau bơtê pơjum bal, ai bol khai in gơnap gơnoar mơ gơnoar pràn nàng bơtrơh ală cà mơ sơmbòi ală bơta kòp jê,

² mơ sồr bol khai lik lòt bơto yal bơh lơgar Yàng Tom Trồ, mơ sơmbòi ală cau kòp jê.

³ Kơnràñ sồr bol khai lah: “Tòm tŭ lòt gùng bañ cèng phan lơi, gai jra hala kơldung hala piang lă, hala jền priă; kung bañ cèng bàr blah ào sơl.

⁴ Tòm tŭ bol mê mut tòm hìu lơi, kư̆ ơm tĕ tềng hơ̆, jơl tus di tŭ lik bơh ƀòn hơ̆.

⁵ Dilah cau lơi ò wă rò bol mê, gen tòm tŭ lik bơh ƀòn dờng hơ̆, rtuh tĕ thul bơh di jơng bol mê nàng lơh cơng pơrlơ̆ di bol khai.”

⁶ Gen ală cau bơtê lik lòt làm ală ƀòn, bơto yal Jơnau Niam mơ sơmbòi kòp jê tòm làm bă tiah.

Bơta rngòt bơtau Herôt dê

⁷ Mơ tai, bơtau Herôt at bồ kơnhwàl Galile kơno ală broă neh gơlik gơs gen ò suk ơm ngan, bơh cau ƀà đơs lah: Hơ̆ la Jang neh kis wơl bơh bơta chơt;

⁸ cau ƀà tai yal lah: Eli neh tơlik să; cau ndai đơs lah: Hơ̆ la dô nă tòm ală cau gơnoar hwơr yau òr neh kis wơl.

⁹ Ai Herôt đơs lah: “Añ neh koh ngko Jang rau; mơya cau do la ñcau mơ añ neh kơno ală broă behơ̆ taih?” Gen khai jòi gùng nàng tìp Kơnràñ.

Yàng Jesu lơh piang lă gơlik gơs oă

¹⁰ Ală cau gơnoar bơto dờng rê wơl yal mơ Yàng Jesu ală broă bol khai neh lơh. Gen Kơnràñ lam bol khai lòt is bal mơ Kơnràñ tus hơ ƀòn dờng ne sơnđan la Betsaida.

¹¹ Mơya mpồl làng bol git behơ̆ gen lòt jat. Kơnràñ wă rò bol khai, tòmbơhbơr, mơ bơto bol khai in bơh lơgar Yàng Tom Trồ, mơ sơmbòi ală cau pal càng geh sơmbòi.

¹² Dơ̆ trồ mòr mang, jơt bàr nă cau bơtê tus đơs mơ Kơnràñ lah: “Dan ai mpồl làng bol in rê, nàng bol khai mut tòm ală ƀòn mơ ƀòn dềt gùt dar tồ ơm mơ jòi phan sa; bơh bol he ơm tềng do la tiah ngềt ngơt.”

¹³ Mơya Kơnràñ đơs lah: “Să tòm bol mê ai tĕ bol khai in sa.” Ală cau bơtê ho lah: “bol he gơs mìng pram nơm piang lă mơ bàr nơm ka lơm. Kơnràñ kòñ bol he lòt rwat phan sa jơh làng bol do in sơl?”

¹⁴ Bơh bol khai gơs pơgap pram rbô nă cau klau. Gen Kơnràñ đơs mơ ală cau bơtê lah: “Sồr tĕ bol khai nggui jat sèng, dô sèng pơgap pram jơt.”

¹⁵ Bol khai lơh jat jơnau, sồr jơh tơl nă nggui.

¹⁶ Gen Kơnràñ ai pram nơm piang lă mơ bàr nơm ka hơ̆, tơnggòr hơ trồ, ai lơngai, dơrkă, mơ tong ală cau bơtê in nàng tòmpà mpồl làng bol in sa.

¹⁷ Bol khai sa, cau lơi kung hòm lơm. Bol khai dòñ ală pet piang lă tơngkah geh bềng jơt bàr bài.

Pier yal tơlik Yàng Jesu la Bơtau Krist

¹⁸ Tòm tŭ Yàng Jesu hòi dan is, ală cau bơtê tus ơm gùt dar Kơnràñ, gen Kơnràñ lùp bol khai lah: “Làng bol đơs Añ la ñcau taih?”

¹⁹ Bol khai ho lah: “Cau do đơs la Jang Ƀaptis, mơya cau ƀà đơs la Eli; ai cau ndai tai đơs la dô nă tòm ală cau gơnoar hwơr yau òr kis wơl.”

²⁰ Kơnràñ lùp tai: “Ai bol mê gen đơs Añ la ñcau taih?” Pier ho lah: “Kơnràñ la Bơtau Krist Yàng Tom Trồ dê.”

²¹ Gen Kơnràñ bơkơŭ bol khai, sồr bañ yal bơta hơ̆ mơ cau lơi,

²² mơ lah: “Kòn Mơnus pal kong oă bơta bòl glar, kong ală cau kwang kra, ală cau gơnoar lam bồ ơn phan duh khoai, mơ ală cau bơto bơta boh lam sang lòi, mơ kong cau tơnchơt, gen tus di ngai pe geh kis wơl.”

²³ Chòp Kơnràñ đơs mơ tơl nă cau lah: “Dilah cau lơi kòñ jat Añ, gen pơndang sang tĕ să he, kòp ngai tui chi pơng he dê mơ jat Añ.

²⁴ Bơh cau lơi kòñ dong klàs bơta kis he dê gen gơ rơp roh, ai cau lơi tài bơh Añ mơ roh bơta kis he gen rơp geh dong klàs.

²⁵ Bơh dilah cau lơi geh jơh dunnia mơ să tòm he gơkòl roh rui hala roh gơcoh, gen gơs ñchi kwơ cau hơ̆ in taih?

²⁶ Bơh cau lơi ƀàssìl bơh Añ mơ jơnau Añ jê, gen Kòn Mơnus kung rơp ƀàssìl bơh cau hơ̆ tòm tŭ Kơnràñ tus tòm bơta gơklŏ Kơnràñ dê, Bèp dê, mơ ală cau gơnrơh sàng goh dê.

²⁷ Añ đơs song mơ bol mê, tòm ală cau ntào tềng do ngan gơs cau rơp ò mut tòm bơta chơt lài mơ tŭ gŏ lơgar Yàng Tom Trồ.”

Yàng Jesu srơh să

²⁸ Pơgap phàm ngai tơnơ̆ mơ tŭ đơs ală jơnau hơ̆, Yàng Jesu lam Pier, Jang mơ Jakơ guh bal mơ Kơnràñ hơđang mơnơm nàng hòi dan.

²⁹ Tòm tŭ Kơnràñ hòi dan, muh mat Kơnràñ gơtòmgơl, ào Kơnràñ gơlik bò àng gơcrà lul.

³⁰ Ne, gơs bàr nă cau tòmbơhbơr mơ Kơnràñ, hơ̆ la Môise mơ Eli.

³¹ Bol khai tơlik să tòm bơta gơklŏ, đơs bơh bơta chơt Kơnràñ dê mơ Kơnràñ rơp lơh wil tơl tòm Jerusalem.

³² Pier bal mơ oh mi bơyô khai dê gơdan bic siup siup ngan, mơya tòm tŭ kah rngal, gŏ bơta gơklŏ Kơnràñ dê mơ bàr nă cau ntào bal mơ Kơnràñ.

³³ Dơ̆ bàr nă cau hơ̆ guh rê bơh di Yàng Jesu, gen Pier đơs mơ Kơnràñ lah: “Ơ Kơnràñ, bol he ơm tềng do la niam ngan. Lòi bol hi lơh pe nơm sàl, dô nơm Kơnràñ in, dô nơm Môise in, mơ dô nơm Eli in.” Mơya khai ò git khai đơs jơnau lơi.

³⁴ Tòm tŭ khai gam đơs, gơs dô puk mhwal jơm gòm bol khai; mơ tòm tŭ mut tòm puk mhwal hơ̆ gen bol khai rngòt rngơt.

³⁵ Gơs jơnau bơh tòm mhwal đơs lah: “Do la Kòn kòñ gơboh Añ jê, cau geh sac rwah Añ jê iat tĕ Khai.”

³⁶ Dơ̆ neh kơno ntas jơnau hơ̆, gen mìng gŏ Yàng Jesu ơm is dô nă. Tòm ală ngai hơ̆ ală cau bơtê ơm mŏ mŏ, bol khai ò yal wơl cau lơi in bơh bơta bol khai neh gŏ.

Yàng Jesu sơmbòi cau kroă sơnrang

³⁷ Ngai tơnơ̆, dơ̆ Yàng Jesu mơ ală cau bơtê mù bơh hơđang mơnơm, gơs mpồl làng bol oă tus tìp Kơnràñ.

³⁸ Ne, gơs dô nă cau tòm mpồl làng bol hòi driau lah: “Ơ Cau Bơto, dan wèt sền di kòn klau añ jê, bơh la kòn dô nă añ jê.

³⁹ Tŭ gơkòl cà lơh, nisơna khai hòi driau, cà sơntơt rơnggô khai, lơh gơlik kơmbuh bơr, sồt brơp gơklò làm să, gen gơ lòi ing khai, ò bài lòi tơn.

⁴⁰ Añ neh dan ală cau bơtê Kơnràñ bơtrơh tơlik cà hơ̆, mơya bol khai ò rgơi bơtrơh.”

⁴¹ Yàng Jesu đơs lah: “Ơ jơi bơtiàn ò dòn mơ kơldang nùs ne, Añ ơm bal mơ bol mê mơ kong ơt di bol mê jơl tus di tŭ lơi taih? Lam tĕ kòn klau mê tus hơ do.”

⁴² Dơ̆ kòn klau lòt tus, cà sơrglơm khai, sơntơt rơnggô khai pràn ngan. Mơya Yàng Jesu lah pơrhơng cà, sơmbòi cau kơnòm hơ̆ mơ jào wơl bèp khai in.

⁴³ Jơh tơl nă cau ai lơh crih crài ngan bơh gơnap gơnoar ryŭ ryơm Yàng Tom Trồ dê. Tòm tŭ tơl nă cau ai lơh krơi bơh ală broă Kơnràñ neh lơh, gen Kơnràñ đơs mơ ală cau bơtê lah:

Yàng Jesu yal lài bơh bơta chơt Kơnràñ dê

⁴⁴ “Ai tĕ ală jơnau do mut tòm tồr bol mê: Kòn mơnus rơp gơkòl bơtào tòm tê cau sò tơm.”

⁴⁵ Mơya bol khai ò git wă jơnau hơ̆, bơh gơ gam gơkòl pồn ndơp gen tàng bol khai ò git wă, mơ rngòt ò khin lùp Kơnràñ bơh jơnau đơs hơ̆.

Bơta dờng màng ngan

⁴⁶ Digùl ală cau bơtê gơlik dô bơta tòm pơndang bal bơh ñcau tòm bol khai la dờng màng rlau.

⁴⁷ Mơya Yàng Jesu git bơta kơlôi tòm nùs bol khai dê, gen cèng dô nă kòn dềt ơn di gah Kơnràñ,

⁴⁸ mơ đơs mơ bol khai lah: “Dilah cau lơi bơh sơnđan Añ mơ wă rò kòn dềt do, hơ̆ la wă rò Añ; ai cau lơi wă rò Añ hơ̆ la wă rò Bơtau neh sồr Añ lòt tus. Bơh cau lơi dềt rhền rlau jơh digùl bol mê, hơ̆ la cau dờng rlau jơh.”

⁴⁹ Jang đơs lah: “Ơ Kơnràñ, bol hi neh gŏ dô nă cau ai sơnđan Kơnràñ nàng bơtrơh cà, gen bol hi bơkơŭ khai tài bơh khai ò lòt bal mơ bol he.”

⁵⁰ Mơya Yàng Jesu đơs lah: “Bañ bơkơŭ khai, bơh cau lơi ò tòmdră mơ bol mê hơ̆ la tòmsòr mơ bol mê.”

Yàng Jesu guh hơ Jerusalem ( 9:51 – 19:28 ) Yàng Jesu tòm lơgar Samari

⁵¹ Tòm tŭ neh mòr tus di tơngai Yàng Jesu geh rò guh rê hơđang trồ, gen Kơnràñ lơh nền lòt hơ Jerusalem,

⁵² mơ sồr ală cau kong sồr lòt lài mơ Kơnràñ. Bol khai mut tòm dô nơm ƀòn cau Samari dê nàng rcang ală bơta Kơnràñ in;

⁵³ mơya làng bol Samari ò wă rò Kơnràñ, bơh Kơnràñ neh lơh nền lòt hơ Jerusalem.

⁵⁴ Cau bơtê Kơnràñ dê la Jakơ mơ Jang gŏ behơ̆ gen đơs lah: “Ơ Yàng, Kơnràñ kòñ bol hi sồr ồs mù bơh đang trồ tơnroh bol khai sơl?”

⁵⁵ Mơya Yàng Jesu wơlke lah pơrhơng bol khai; [lah: “Bol mê ò git hwềng lơi gơchồl bol mê đơs behơ̆.”]

⁵⁶ Bơh Kòn Mơnus ò di lòt tus nàng tơnroh bơta kis cau, mơya nàng dong klàs. Lồc behơ̆ bol khai lòt tus hơ ƀòn ndai.

Bơyai bơh bơta jat Yàng

⁵⁷ Tòm tŭ lòt gùng, gơs cau đơs mơ Kơnràñ lah: “Kơnràñ lòt tiah lơi añ rơp lòt jat tềng hơ̆.”

⁵⁸ Yàng Jesu đơs lah: “Pì gơs trồm, sềm gơs rsòn, mơya Kòn Mơnus ò gơs tiah gòl bồ.”

⁵⁹ Kơnràñ đơs mơ cau ndai lah: “Lòt tĕ jat Añ.” Cau hơ̆ ho lah: “Ơ Yàng, dan ai Añ in rê tơp bèp añ lài.”

⁶⁰ Mơya Kơnràñ đơs lah: “Lòi tĕ cau chơt tơp cau chơt bol khai dê; ai mê lòt tĕ bơto yal bơh lơgar Yàng Tom Trồ.”

⁶¹ Cau ndai tai đơs lah: “Ơ Yàng, añ rơp jat Kơnràñ, mơya dan ai añ in rê tơngac cau tòm hìu lài.”

⁶² Mơya Yàng Jesu đơs lah: “Cau lơi neh ai tê at ngal mơ gam wơlke tơnơ̆ la ò di pal mơ lơgar Yàng Tom Trồ.”