Luka 8 - Sră Goh 2018

Ală cau ùr la cau bơtê

¹ Tơnơ̆ mơ hơ̆ dô êt jŏ, Yàng Jesu lòt làm bơh ƀòn dờng do tus hơ ƀòn dờng ne, ƀòn do tus hơ ƀòn dă, bơto tơnggit mơ bơto yal Jơnau Niam lơgar Yàng Tom Trồ dê. Gơs jơt bàr nă cau bơtê lòt bal mơ Kơnràñ,

² bal mơ ală cau ùr neh geh sơmbòi klàs bơh cà mơ bơta kòp jê, hơ̆ la Mari sơnđan la Madơlen gơs poh nơm cà neh lik bơh di khai.

³ Jana bau ùr Cusa, la cau at bồ hìu Herôt dê, Susan, mơ oă cau ndai, la ală cau neh ngui phan mơna bol khai dê nàng duh broă Kơnràñ.

Pơnyơu bơh cau sih gar

⁴ Tòm tŭ gơs mpồl làng bol oă pơjum bal mơ ală cau bơh ală ƀòn dờng lòt tus hơ Kơnràñ, gen Kơnràñ ngui jơnau pơnyơu mơ đơs lah:

⁵ “Cau sih gar lik lòt nàng sih gar sơntìl khai dê. Tòm tŭ sih, gơs gar rung di gah gùng, gơtìp cau jă, mơ gơs sềm trồ sa jơh.

⁶ Gar ƀà rung dê lŭ, gơ rơp hòn gen ro mo tài bơh ù ò tơl sùh.

⁷ Gar ƀà tai rung di tòm lò, lò hòn bal mơ gơ, lơh gơrềt jơh.

⁸ Gar tai rung di ù niam gen gơhòn, gơlik plai dô rhiang.” Dơ̆ Yàng Jesu đơs ală jơnau hơ̆ rau, gen Kơnràñ hòi dờng lah: “Cau lơi gơs tồr nàng iat, gen iat tĕ!”

Yal gơtha jơnau pơnyơu

⁹ Ală cau bơtê lùp Kơnràñ bơh jơnau pơnyơu hơ̆ la ñchi.

¹⁰ Kơnràñ đơs lah: “Neh ai bol mê in git ală bơta ndơp ndơr lơgar Yàng Tom Trồ dê, mơya gơwèt mơ ală cau ndai gen ngui jơnau pơnyơu, nàng bol khai in sền mơ ò gŏ, kơno mơ ò git wă.

¹¹ Mơ tai, pơnyơu hơ̆ la be do: Gar sơntìl la jơnau Yàng Tom Trồ dê.

¹² Ală gar rung di gah gùng la ală cau neh kơno jơnau Yàng, gen cà ràk tus tòmpìt jơnau hơ̆ bơh di nùs bol khai, rngòt bol khai dòn mơ geh dong klàs mòn.

¹³ Ală gar rung di lŭ la ală cau kơno jơnau Yàng, gen hòn chò dòp mo; mơya bol khai ò gơs ryas, mìng dòn ing lơm, dơ̆ gơtìp bơta gơlòng bòl glar ơniai gen gơtơnruc mo.

¹⁴ Gar sơntìl rung di tòm lò la ală cau neh kơno jơnau, gen lòi bơta kơlôi rcang, pas sơm, chò hòp rài do lơh gơrềt, gen ò dờng.

¹⁵ Ai gar sơntìl ơm di ù niam la ală cau kơno jơnau Yàng, gen ai nùs song mơ lơbơn niam nàng prap gàr, ơt ơl mơ gơlik plai.

¹⁶ Ò gơs cau lơi chu đèng mơ ai phan drup wơl, hala ơn hơđơm cơnòng bic, mơya ơn hơđang jơng đèng, tồ ală cau lơi mut gen gŏ bơta àng.

¹⁷ Bơh ò gơs bơta lơi pồn mơ ò gơ pò tơlik, kung ò gơs broă lơi ndơp mơ ò geh git mơ ò gơtơlik loh làng.

¹⁸ Behơ̆ kơrhia tĕ tòm bơta iat bol mê dê, bơh cau lơi gơs, rơp geh bơtơl tai; ai cau lơi ò gơs, bulah bơta khai tồnlah khai neh gơs, kung rơp gơkòl tă tơlik tơn.”

Mè mơ oh mi Yàng Jesu dê

¹⁹ Mè mơ oh mi Yàng Jesu dê lòt tus, mơya tài bơh mpồl làng bol gen ò rgơi tus rềp hơ Kơnràñ.

²⁰ Gơs cau yal mơ Kơnràñ lah: “Mè mơ oh mi ồng dê ơm ntào đah bơdìh, kòñ tìp ồng.”

²¹ Mơya Kơnràñ ho mơ bol khai lah: “Mè Añ mơ oh mi Añ jê hơ̆ la ală cau kơno jơnau Yàng Tom Trồ dê mơ lơh jat.”

Yàng Jesu sồr càl rbut ơm mŏ mŏ

²² Dô ngai ne Kơnràñ mut tòm ơhò bal mơ ală cau bơtê mơ sồr lah: “Bol he tiă lă đah ne tơnau dờng.” Gen bol khai wàs ơhò lòt.

²³ Tòm tŭ ơhò gam tiă dà gen Kơnràñ bic lơhă. Nisơna gơs càl rbut khồm druh tòm tơnau dờng, dà mut mòr bềng ơhò, sơbơng rơng ngan.

²⁴ Ală cau bơtê tus pơrlai Kơnràñ mơ đơs lah: “Ơ Kơnràñ, ơ Kơnràñ do bol he mòr chơt roh!” Kơnràñ kah rngal, lah pơrhơng càl mơ ryà lơnggac dàlềng, gen gơ thit mo, ring drik.

²⁵ Gen Kơnràñ đơs mơ bol khai lah: “Ntềng đah bơta dòn bol mê dê taih?” Bol khai rngòt rngơt ngan, ai lơh krơi đơs bal mơ gơp lah: “Behơ̆ cau do la ñcau, mơ kung rgơi lơh càl mơ ryà dà in dòn bơr khai dê taih?”

Yàng Jesu sơmbòi cau Jerase klàs cà lơh

²⁶ Gen Yàng Jesu mơ ală cau bơtê dah tòm lơgar làng bol Jerase dê, tòm toh mơ Galile.

²⁷ Dơ̆ Kơnràñ guh di gah dà, gơs dô nă cau cà lơh tòm ƀòn dờng hơ̆ lik kơp Kơnràñ; neh jŏ rau khai ò soh ồi ào, ò ơm tòm hìu, mơya ơm di tiah bơtô ƀồc.

²⁸ Dơ̆ cau hơ̆ gŏ Yàng Jesu, gen hòi driau, tơmbic să di đap Kơnràñ mơ đơs lah: “Ơ Yàng Jesu, Kòn Yàng Tom Trồ Hơđang Rlau Jơh, digùl añ mơ Kơnràñ gơs ñchi jơnau taih? Añ rac dan mơ Kơnràñ bañ lơh bòl glar di añ.”

²⁹ Bơh Kơnràñ neh sồr cà hơ̆ pal lik bơh di khai. Tài bơh oă dơ̆ cà hơ̆ neh mut mơ rồn bơklơn khai, gen khai kòl cau cap mơ che sreng mơ tơndò gơsàng nàng sền gàr, mơ khai gơltac sreng mơ dơrpă gơsàng, mơ cà bơtrơh tơlik khai tòm ƀlàng bràs.

³⁰ Gen Yàng Jesu lùp khai lah: “Ñchi sơnđan mat mê taih?” Khai ho lah: “Mpồl ling,” bơh gơs oă cà mut tòm khai.

³¹ Ală cà hơ̆ rac dan mơ Kơnràñ bañ bơtrơh bol gơ mù tòm brong jrô hùt hung.

³² Mơ tai, tềng hơ̆ gơs dô mpồl sur oă ngan ơm sa hơđang mơnơm. Ală cà rac dan mơ Kơnràñ ai bol gơ in mut tòm mpồl sur hơ̆. Gen Kơnràñ ai gơnoar bol gơ in.

³³ Gen ală cà lik bơh di cau hơ̆, mơ mut tòm mpồl sur; mpồl sur bơh kơh ntoat ntruñ tòm tơnau dờng, dà bŭ chơt jơh.

³⁴ Ală cau ê sur gŏ bơta hơ̆, gen ntoat dô jơh, mơ yal wơl jơnau hơ̆ tòm ƀòn dờng mơ ƀòn dềt.

³⁵ Làng bol lik lòt nàng sền bơta pa gơlik gơs hơ̆. Dơ̆ bol khai lòt tus hơ Yàng Jesu, gŏ cau gơs ală cà pa lik hơ̆, ơm nggui di jơng Yàng Jesu, soh ồi ào, dơngoh jak niam be òs, gen rngòt rngơt ngan.

³⁶ Ală cau neh gŏ broă hơ̆ yal wơl jơh tơl nă cau in mbe gơlơh cau cà lơh geh sơmbòi.

³⁷ Jơh làng bol làm gùt lơgar Jerase dan Kơnràñ lik bơh di bol khai, bơh bol khai rngòt rngơt oă ngan. Kơnràñ mut tòm ơhò mơ rê.

³⁸ Cau gơs ală cà pa lik hơ̆ dan lòt bal mơ Kơnràñ, mơya Kơnràñ sồr khai rê, mơ lah:

³⁹ “Rê tĕ hơ hìu mê, yal wơl bơta dờng ò git nđò mơ Yàng Tom Trồ neh lơh mê in.” Gen khai rê, yal làm jơh ƀòn dờng bơta dờng ò git nđò mơ Yàng Jesu neh lơh khai in.

Yàng Jesu hòi kòn ùr Jeru kis wơl mơ cau ùr pìng mhàm

⁴⁰ Tòm tŭ Yàng Jesu rê wơl, mpồl làng bol wă rò Kơnràñ, tài bơh cau lơi kung kơp gơn Kơnràñ.

⁴¹ Ne, gơs dô nă cau sơnđan la Jeru, cau at bồ hìu jum, lòt tus tơmbic să di jơng Yàng Jesu, rac dan Kơnràñ mut tòm hìu khai,

⁴² bơh khai gơs mìng dô nă kòn ùr pơgap jơt bàr sơnam, mòr chơt. Tòm tŭ Kơnràñ lòt gen làng bol ntềt di Kơnràñ.

⁴³ Mơ tai, gơs dô nă cau ùr kòp pìng mhàm neh jơt bàr nam rau, neh roh jơh phan mơna ai cau gơnoar sơnơm in, mơya ò gơs cau lơi rgơi sơmbòi.

⁴⁴ Khai tus bơh ngkòi ƀư di tiang ào Kơnràñ, tŭ hơ̆ mo mhàm ò pìng tai.

⁴⁵ Gen Yàng Jesu lùp lah: “Ñcau neh ƀư di Añ taih?” Cau lơi kung đơs ò git, gen Pier mơ oh mi lòt bal đơs lah: “Ơ Kơnràñ, mpồl làng bol oă gơrwàng mơ ntềt di Kơnràñ.”

⁴⁶ Mơya Yàng Jesu đơs lah: “Ngan gơs cau neh ƀư di Añ, bơh Añ git gơs gơnap gơnoar neh lik bơh Añ.”

⁴⁷ Cau ùr hơ̆ git khai ò rgơi pồn să tai, gen rơm să, tus tơmbic să di đap Kơnràñ, yal tơlik tài bơh ñchi khai neh ƀư di Kơnràñ mơ mbe lơi khai geh bòi mo; gơs jơh làng bol kơno lơm.

⁴⁸ Gen Kơnràñ đơs mơ khai lah: “Ơ kòn ùr, bơta dòn ai dê neh sơmbòi ai; rê tĕ lơngap lơngai.”

⁴⁹ Tòm tŭ Kơnràñ gam đơs, gen gơs cau tus bơh hìu cau at bồ hìu jum đơs lah: “Kòn ùr ồng neh chơt rau, bañ lơh tơmbòl Cau Bơto tai.”

⁵⁰ Mơya Yàng Jesu kơno behơ̆ gen đơs mơ khai lah: “Bañ rngòt, mìng dòn lơm, gen kòn ùr mê dê rơp geh sơmbòi.”

⁵¹ Dơ̆ neh tus di hìu, gen Kơnràñ ò ai cau lơi in mut bal, mìng Pier, Jang, Jakơ mơ mè bèp kòn ùr hơ̆.

⁵² Cau lơi kung ñìm rac tur ntơh bơh kòn hơ̆. Mơya Kơnràñ sồr lah: “Bañ ñìm, kòn ùr do ò chơt ò, mơya khai bic lơhă gơ dê.”

⁵³ Bol hơ̆ git khai neh chơt ngan rau, gen dơñŏ tơnhial di Kơnràñ.

⁵⁴ Mơya Kơnràñ at di tê kòn ùr mơ hòi lah: “Ơ kòn ùr, guh tĕ.”

⁵⁵ Hwềng khai mut wơl, khai ñă ntào mo, gen Kơnràñ sồr ai khai in sa.

⁵⁶ Mè bèp khai ai lơh crih crài ngan, mơya Kơnràñ sồr bol khai bañ yal cau lơi in bơta neh gơlik gơs.