Luka 16 - Sră Goh 2018

Pơnyơu bơh cau at bồ hìu ò song ring

¹ Yàng Jesu đơs tai mơ ală cau bơtê lah: “Cau pas ne gơs dô nă cau at bồ hìu gơkòl cau yă mơ cau tòmlah: khai neh ngui pròng preh phan mơna cau tòm dê.

² Gen cau tòm hòi cau hơ̆ mơ lùp lah: ‘Ñchi bơta cau yă mê mơ añ taih? Yal tĕ broă lơh mê dê, bơh mê ò rgơi lơh gơs cau at bồ hìu tai.’

³ Cau at bồ hìu đơs is lah: ‘Cau tòm tă gơnoar broă añ jê, ñchi broă añ rơp lơh taih? Pŏ ù gen ò jai, kanadàn gen ƀàssìl.

⁴ Tŭ do añ git bơta añ pal lơh nàng tòm tŭ añ roh gơnoar broă, gen gơs cau wă rò añ tòm hìu bol khai dê.’

⁵ Behơ̆, khai hòi is kòp nă cau kòl dồs mơ cau tòm khai dê tus, mơ lùp cau sơnròp lah: ‘Nđò mê kòl dồs mơ cau tòm añ jê taih?’

⁶ Khai ho lah: ‘Dô rhiang thùng mơñà.’ Cau at bồ hìu đơs lah: ‘Ai tĕ sră cih dồs, nggui mơ mhar cih wơl pram jơt.’

⁷ Lồc behơ̆ lùp cau dơ̆ bàr lah: ‘Ai mê kòl dồs nđò taih?’ Khai ho lah: ‘Dô rhiang drong kòi mi.’ Cau at bồ hìu đơs lah: ‘Ai tĕ sră cih dồs, mơ cih wơl phàm jơt.’

⁸ Cau tòm jòng ro cau at bồ hìu ò song ring hơ̆, bơh khai neh lơh chài rgơi. Bơh ală kòn rài do dê chài rgơi rlau mơ ală kòn bơta àng dê gơwèt hơ cau tòm pah rài bal mơ bol khai.

⁹ Añ đơs mơ bol mê, ngui tĕ priă jền ò song ring nàng jòi lơh oh mi bơyô, tồ tŭ gơ neh jơh gen bol khai wă rò bol mê mut tòm hìu gam sùm sùm.

¹⁰ Cau lơi dòn song tòm broă dềt rhền, gen kung dòn song tòm broă dờng; cau lơi ò song ring tòm broă dềt rhền, gen kung ò song ring tòm broă dờng sơl.

¹¹ Behơ̆ dilah bol mê ò dòn song bơh phan mơna ò song ring, gen ñcau khin jào bol mê in phan mơna ngan taih?

¹² Dilah bol mê ò dòn song bơh phan mơna cau ndai dê, gen ñcau rơp jào bol mê in phan mơna rơp gơrê is mơ bol mê taih?

¹³ Ò gơs cau dĭ lơi rgơi duh broă bàr nă cau tòm, bơh rơp gơjrañ kơuềng di cau do mơ kòñ gơboh di cau ne, hala sền dờng màng di cau do mơ sền òsơp di cau ne. Ală bol mê ò rgơi duh broă Yàng Tom Trồ ndang mơ duh broă jền priă ndang.”

¹⁴ Ală cau Pharisi la cau hàm kòñ jền priă, kơno ală jơnau hơ̆ gen dơñŏ tơnhial di Kơnràñ.

¹⁵ Kơnràñ đơs mơ bol khai lah: “Bol mê kòp is să he la song ring di đap ală cau, mơya Yàng Tom Trồ git nùs bol mê; bơh bơta lơi la ryŭ ryơm digùl kòn mơnus la ngkòr ngkàc di đap Yàng Tom Trồ.

¹⁶ Gơs bơta boh lam mơ ală jơnau cau gơnoar hwơr jơl tus di Jang; gen bơh tŭ hơ̆ Jơnau Niam lơgar Yàng Tom Trồ dê geh bơto yal, mơ kòp nă cau pơnđơl jơh pràn mut tòm hơ̆.

¹⁷ Trồ tiah roh la ƀuơn rlau mơ roh dô cik tòm bơta boh lam.

¹⁸ Cau lơi sang lòi bau ùr khai dê mơ bau mơ cau ùr ndai, gen tìs glài bơrnàn; ai cau lơi bau mơ cau ùr neh bau klau sang lòi, gen kung tìs glài bơrnàn sơl.”

Cau pas gơs mơ Lasarơ

¹⁹ “Gơs dô nă cau pas sơm ne soh ào gur mơ bài che dơmài lơbơn, kòp ngai ngui sa pròng preh sih sàc.

²⁰ Mơ gơs dô nă cau rƀah lơòi ne sơnđan la Lasarơ, bic bơdìh mpồng cau pas sơm hơ̆, să jan bềng toh kiat.

²¹ Khai kơp kòñ gơs ală phan pìng bơh di cơnòng sào cau pas sơm dê nàng geh hòm đau, mơ kung gơs so lòt tus liap toh kiat khai dê.

²² Cau rƀah lơòi hơ̆ chơt, geh cau gơnrơh cèng ơn di gah Abraham. Cau pas sơm kung chơt mơ cau cèng tơp.

²³ Ơm tòm lơgar làng ƀồc, cau pas sơm gơkòl pơnjê pơngkồr, tơnggòr sền, gŏ Abraham bơh ngài mơ Lasarơ ơm di gah khai.

²⁴ Cau pas sơm hòi driau lah: ‘Abraham ơ bèp, dan nđàc sơngit di añ, sồr ƀà Lasarơ iurŭ ràs tê tòm dà nàng lơh mrềt lơmpiat añ in, bơh añ kòl pơnjê pơngkồr oă ir tòm ồs do.’

²⁵ Mơya Abraham đơs lah: ‘Ơ kòn, kah tĕ tòm tŭ gam kis, mê neh dòp geh ală bơta niam mê dê rau, ai Lasarơ neh kong ală bơta iơh; tŭ do khai ơm tềng do geh pơndòm pơniang, ai mê gen kong pơnjê pơngkồr.

²⁶ Rlau mơ hơ̆ tai, gơs dô nơm brong jrô dờng neh gơs nền digùl bol hi mơ bol mê, tian gơs cau lơi kòñ bơh do tus hơ bol mê kung ò rgơi, hala cau bơh tềng hơ̆ lòt tus hơ bol hi kung ò rgơi sơl.’

²⁷ Cau pas sơm đơs lah: ‘Behơ̆, ơ bèp, añ dan bèp sồr Lasarơ lòt tus hơ hìu bèp añ jê,

²⁸ bơh añ gam gơs pram nă oh mi; nàng Lasarơ lơh cơng bol khai in, rngòt bol khai kung gơdùh tòm tiah pơnjê pơngkồr do mòn.’

²⁹ Mơya Abraham đơs lah: ‘Bol khai neh gơs Môise mơ ală cau gơnoar hwơr rau; bol khai pal iat bol hơ̆.’

³⁰ Cau pas sơm ho lah: ‘Abraham ơ bèp, ò di behơ̆ ò; dilah gơs cau bơh cau chơt kis wơl lòt tus hơ bol khai, gen ngan bol khai rơp gơjrañ sang glài.’

³¹ Abraham đơs lah: ‘Dilah bol khai ò bài iat Môise mơ ală cau gơnoar hwơr, gen bulah gơs cau kis wơl bơh bơta chơt, bol khai kung ò bài iat sơl.’”