Luka 10 - Sră Goh 2018

Yàng Jesu sồr poh jơt nă cau bơtê

¹ Tơnơ̆ mơ ală broă hơ̆ Yàng sac rwah poh jơt nă cau bơtê ndai, sồr lòt dô yô dô yô lài mơ Kơnràñ, mut tòm ală ƀòn dờng mơ ală tiah mơ să tòm Kơnràñ rơp lòt tus.

² Kơnràñ đơs mơ bol khai lah: “Kơnhai toès la dờng, mơya cau toès la dô êt. Behơ̆ hòi dan tĕ mơ Yàng kơnhai toès sồr ală cau toès lòt tus hơ kơnhai toès Kơnràñ dê.

³ Lik lòt tĕ; do, Añ sồr bol mê lòt ò gơkrơi be ală belàt kòn ơm digùl ală so rhau.

⁴ Bañ cèng kơldung priă, kơldung phan, gơltau jă, mơ kung bañ lùp còp să cau rò gùng.

⁵ Tòm tŭ bol mê mut tòm hìu lơi, sơnròp ngan đơs tĕ: ‘Lơngap lơngai hìu do in!’

⁶ Dilah tềng hơ̆ gơs cau di pal dòp bơta lơngap lơngai, gen bơta lơngap lơngai bol mê neh ai rơp ơm mơ cau; dilah ò behơ̆, gơ rơp rê wơl hơ bol mê.

⁷ Kư̆ ơm tĕ tòm hìu hơ̆, sa mơ hùc phan lơi bol khai ai, bơh cau kong bòl glar lơh broă gen di pal geh jền tơngai khai dê; bañ lòt bơh hìu do tus hơ hìu ne.

⁸ Dilah bol mê mut tòm ƀòn dờng lơi mơ gơs cau wă rò bol mê, sa tĕ phan lơi bol khai yò bol mê in.

⁹ Kung sơmbòi tĕ cau kòp jê tềng hơ̆, mơ đơs mơ bol khai lah: ‘Lơgar Yàng Tom Trồ neh tus rềp mơ bol mê.’

¹⁰ Mơya tòm tŭ bol mê mut tòm ƀòn dờng lơi mơ bol khai ò wă rò bol mê, lik tĕ tòm gùng mơ đơs lah:

¹¹ ‘Tus di thul ƀòn dờng bol mê dê gơđềt di jơng bol hi, gen bol hi kung rtuh sơl nàng lơh cơng tơrwơl di bol mê; bulah behơ̆, pal git bơta do: lơgar Yàng Tom Trồ neh tus rềp mơ bol mê.’

¹² Añ đơs mơ bol mê, tòm ngai cahrña Yàng Tom Trồ dê, Sôdôm rơp kong lơh glài nggòc rlau mơ ƀòn dờng hơ̆.”

Bơta ò dòn ală ƀòn dờng dê

¹³ “Bòl glar mê in, ơ Kôrajin! Bòl glar mê in, ơ Betsaida! Bơh ală broă gơnap gơnoar neh lơh gơs digùl bol mê, dilah geh lơh gơs tòm Tirơ mơ Sidôn, gen bol khai neh soh ào bài sơnò kiat, nggui tòm bùh mơ gơjrañ sang glài neh jŏ rau.

¹⁴ Behơ̆ tòm ngai cahrña, Tirơ mơ Sidôn rơp kong nggòc rlau mơ bol mê.

¹⁵ Ai mê, ơ Kapenaum, mê rơp geh yò tơngguh tus hơđang trồ sơl? Ngan mê pal kong tơmù tus tòm lơgar Làng Ƀồc.

¹⁶ Cau lơi iat bol mê, hơ̆ la iat Añ; cau lơi sang bol mê, hơ̆ la sang Añ; ai cau lơi sang Añ, hơ̆ la sang Bơtau neh sồr Añ lòt tus.”

¹⁷ Poh jơt nă cau bơtê hòn chò rê wơl, đơs lah: “Ơ Yàng, bơh ai sơnđan Yàng tian gơs ală cà kung dòn duh bol hi!”

¹⁸ Kơnràñ đơs mơ bol khai lah: “Añ neh gŏ cà Satan bơh đang trồ dùh be puhlèp.

¹⁹ Do, Añ neh ai gơnap gơnoar bol mê in jă hơđang bơs mơ diang, mơ hơđang jơh ală gơnoar pràn ală cau sò tơm dê; ò gơs bơta lơi rgơi lơh iơh di bol mê ò.

²⁰ Bulah behơ̆, bañ hòn chò bơh ală cà dòn duh bol mê, mơya hòn chò tĕ bơh sơnđan mat bol mê dê neh geh cih hơđang trồ.”

Jơnau Niam yal tơlik ală kơnòm dềt in

²¹ Kung tòm jơ hơ̆, Yàng Jesu geh hòn chò tòm Yàng Hwềng Goh mơ đơs lah: “Ơ Bèp la Yàng trồ tiah dê, Añ ưnngài Bèp, bơh Bèp neh pồn ală bơta do bơh di ală cau jak chài àng loh, mơ yal tơlik ală kơnòm dềt in. Ngan, ơ Bèp, bơh bơta hơ̆ niam nùs Bèp.

²² Bèp Añ jào jơh ală bơta Añ in; rlau mơ Bèp ò gơs cau lơi git Kòn la ñcau; rlau mơ Kòn mơ cau lơi Kòn kòñ yal tơlik gen kung ò gơs cau lơi git Bèp la ñcau sơl.”

²³ Chòp Kơnràñ wơlke hơ ală cau bơtê mơ đơs is mơ bol khai lah: “Lơngai mat lơi in geh gŏ ală bơta bol mê gŏ!

²⁴ Bơh Añ đơs mơ bol mê, neh gơs oă cau gơnoar hwơr mơ cau bơtau kòñ gŏ ală bơta bol mê gŏ, mơ ò geh gŏ; kòñ kơno ală jơnau bol mê kơno mơ ò geh kơno.”

Pơnyơu bơh cau Samari lơbơn niam

²⁵ Ne, gơs dô nă cau bơto bơta boh lam ñă ntào nàng lòng Yàng Jesu lah: “Ơ Cau Bơto, ñchi bơta añ pal lơh nàng geh pơrdòn bơta kis gam sùm sùm taih?”

²⁶ Kơnràñ lùp khai lah: “Ñchi bơta neh cih tòm bơta boh lam taih? Mê sền mơ wă mbe lơi?”

²⁷ Khai ho lah: “Mê jơh tĕ nùs, jơh hwềng soàn, jơh pràn kơldang, jơh dơngoh jak mơ kòñ gơboh di Yàng la Yàng Tom Trồ mê dê mơ kòñ gơboh di cau gơp ƀòn he be he.”

²⁸ Kơnràñ đơs lah: “Mê đơs di; lơh tĕ bơta hơ̆ gen rơp geh kis.”

²⁹ Mơya khai kòñ sơnđan is să he la song ring, gen đơs mơ Yàng Jesu lah: “Ñcau la cau gơp ƀòn añ taih?”

³⁰ Yàng Jesu ho lah: “Gơs dô nă cau ne bơh Jerusalem mù hơ Jerikô, gơtìp mpồl cau phà kơñau; bol hơ̆ hồ sơmbrơt jơh ồi ào khai, pù lơh khai, gen lòt, lòi khai mòr chơt.

³¹ Gơs dô nă cau gơnoar ơn phan duh khoai kung lòt tòm gùng hơ̆, gŏ cau hơ̆ gen pleh đah ne mơ lòt gan.

³² Kung behơ̆ sơl, gơs dô nă cau Lebi lòt tus, gŏ cau hơ̆, gen pleh đah ne mơ lòt gan.

³³ Mơya gơs dô nă cau Samari kung lòt gùng hơ̆, tus di tiah khai bic, gŏ khai gen gơs nùs nđàc sơngit.

³⁴ Gen khai lòt tus rềp ai mơñà mơ alak bong di tiah jê sồt, pùt, gen tơnhào cau hơ̆ hơđang phan poan jơng khai dê, pơdiang tus hơ hìu ơpah bic mơ dong gàr khai.

³⁵ Àng drim hìng, khai ai bàr dơnie tong cau tòm hìu ơpah bic in mơ nting lah: ‘Dong gàr tĕ cau do; dilah ngui lin rlau, tòm tŭ añ rê wơl gen añ rơp tơm wơl.’

³⁶ Tòm pe nă cau hơ̆, mê kơlôi ñcau la cau gơp ƀòn mơ cau gơtìp mpồl cau phà kơñau taih?”

³⁷ Khai ho lah: “Hơ̆ la cau neh yal tơlik nùs kòñ nđàc di khai.” Yàng Jesu đơs lah: “Lòt tĕ lơh jat behơ̆.”

Mathe mơ Mari wă rò Yàng Jesu

³⁸ Tòm tŭ Yàng Jesu bal mơ ală cau bơtê lòt gùng tus hơ ƀòn ne, gơs dô nă cau ùr sơnđan la Mathe wă rò Kơnràñ mut tòm hìu khai.

³⁹ Khai gơs dô nă oh ùr sơnđan la Mari nggui di jơng Yàng Jesu nàng iat jơnau Kơnràñ.

⁴⁰ Mơya Mathe giga bơh oă broă, lòt tus đơs mơ Kơnràñ lah: “Ơ Yàng, oh añ lòi dô nă añ duh broă, Kơnràñ ò kơlôi ơ? Dan sồr khai dong bal añ.”

⁴¹ Yàng đơs lah: “Ơ Mathe, Mathe, ai kơlôi rcang mơ ò suk ơm bơh oă broă,

⁴² mơya gơs mìng dô nơm broă pal càng lơm. Mari neh sac rwah pơnah niam rlau, la pơnah ò gơs cau lơi rgơi tòmpìt bơh di khai.”