Lebi 3 - Sră Goh 2018

Phan ơn ring lơngai

¹ Dilah cau lơi kòñ ơn phan ơn duh khoai ring lơngai, dilah khai ơn dô nơm phan poan jơng bơh di mpồl kơnrồ, bulah la dam hala me, khai pal ơn di đap Yàng Jehôwa dô nơm phan poan jơng ò tềl sồt.

² Khai rơp ơn tê khai dê hơđang bồ phan ơn khai dê mơ tơnchơt gơ di tiah mut Sàl Tòm Mat. Gen ală kòn klau Arôn dê la ală cau gơnoar ơn phan duh khoai rơp rsìh mhàm hơđang cơnòng duh khoai di ală đah.

³ Bơh di phan ơn ring lơngai, khai pal cèng ơn Yàng Jehôwa in dô nơm phan ơn chu mơ ồs, hơ̆ la jơh ală dơngi gòm klòm ală pơnah tòm dơlam hala gơđềt bal mơ gơ,

⁴ bàr nơm leh, bal mơ dơngi hơđang gơ rềp di but, mơ dô blah poac lơho gòm klòm mơ khai tă bal mơ bàr nơm leh.

⁵ Gen ală kòn klau Arôn dê rơp chu gơ hơđang cơnòng duh khoai hơđang phan ơn chu pơrguc ơn hơđang lòng ồs sa, lơh gơs dô nơm phan ơn chu mơ ồs, gơs ƀô bơlhu niam nùs Yàng Jehôwa.

⁶ Dilah khai ơn dô nơm phan poan jơng bơh di mpồl belàt lơh gơs phan ơn ring lơngai Yàng Jehôwa in, khai pal ơn dô nơm dam hala me ò gơs tềl sồt.

⁷ Dilah khai ơn dô nơm belàt kòn nàng lơh phan ơn, gen khai pal cèng gơ tus di đap Yàng Jehôwa.

⁸ Khai pal ơn tê khai dê hơđang bồ phan ơn hơ̆ mơ tơnchơt gơ di đap Sàl Tòm Mat. Gen ală kòn klau Arôn dê rsìh mhàm gơ di cơnòng duh khoai hơđang kòp đah.

⁹ Bơh di phan ơn ring lơngai nàng lơh phan ơn, khai pal cèng dô nơm phan chu mơ ồs ơn Yàng Jehôwa in: dơngi gơ dê, jơh dô nơm tiang neh koh rềp di ntìng gòr ngkòi, jơh dơngi gòm ală pơnah tòm dơlam hala gơđềt bal mơ ală pơnah hơ̆,

¹⁰ bàr nơm leh bal mơ dơngi hơđang gơ rềp di but, mơ blah poac lơho gòm klòm, mơ khai rơp tă bal mơ ală leh.

¹¹ Cau gơnoar ơn phan duh khoai rơp chu gơ hơđang cơnòng duh khoai lơh gơs phan sa, hơ̆ la dô nơm phan ơn chu mơ ồs ơn Yàng Jehôwa in.

¹² Dilah phan ơn khai dê la dô nơm be, khai pal ơn gơ di đap Yàng Jehôwa.

¹³ Khai pal ơn tê khai hơđang bồ gơ dê mơ tơnchơt gơ di đap Sàl Tòm Mat. Gen ală kòn klau Arôn dê rơp rsìh mhàm gơ di cơnòng duh khoai hơđang ală đah.

¹⁴ Bơh di phan khai ơn gen khai pal ơn phan duh khoai do chu tòm ồs Yàng Jehôwa in: jơh ală dơngi jơm gòm ală pơnah tòm dơlam hala gơđềt bal mơ gơ,

¹⁵ bàr nơm leh bal mơ dơngi hơđang gơ rềp di but mơ blah gơltau lơho gòm klòm, mơ khai rơp tă bal mơ ală leh.

¹⁶ Cau gơnoar ơn phan duh khoai rơp chu ală phan hơ̆ hơđang cơnòng duh khoai lơh gơs phan sa, hơ̆ la dô nơm phan ơn chu tòm ồs, gơs ƀô bơlhu. Jơh ală dơngi gơrê mơ Yàng Jehôwa.

¹⁷ Do la dô jơnau sồr gam sùm sùm ală rài rơp tus in, bulah ơm tiah lơi: Bol mê ò di sa dơngi hala mhàm.