Lebi 21 - Sră Goh 2018

Bơta sàng goh ală cau gơnoar ơn phan duh khoai dê

¹ Yàng Jehôwa đơs mơ Môise lah: “Yal tĕ mơ ală cau gơnoar ơn phan duh khoai la ală kòn klau Arôn dê mơ đơs mơ bol khai lah: ‘Dô nă cau gơnoar ơn phan duh khoai ò di lơh să tòm khai in gơlik ƀơ̆ ƀơl, bơh dô nă cau chơt tòm gơp bơtiàn khai dê,

² lòi mìng bơh dô nă cau gơp bơtiàn rềp, kung be mè hala bèp khai dê, kòn klau hala kòn ùr khai dê, oh mi khai dê,

³ hala dô nă oh mi ùr òhềt bau, mơya kis kơnòm di khai tài bơh khai ò gơs bau klau, bơh khai rgơi lơh bol mê in gơlik ò goh.

⁴ Mơya khai ò di lơh să tòm khai in gơlik gơs ò goh, be dô nă bau klau ơm digùl làng bol khai dê, behơ̆ khai lơh să tòm khai gơkòl sền òsơp.

⁵ Ală cau gơnoar ơn phan duh khoai ò di koah bồ bol khai dê hala koah sơnò tềp di bàr đah hala koah să jan bol khai dê.

⁶ Bol khai pal gơs goh Yàng Tom Trồ bol khai in, mơ ò di lơh sơnđan Yàng Tom Trồ bol khai dê gơkòl sền òsơp.

⁷ Bol khai ò di bau mơ ală cau ùr neh gơlik ƀơ̆ ƀơl tài bơh neh lơh dri hala neh gơkòl bau klau sang lòi, tài bơh ală cau gơnoar ơn phan duh khoai pal gơs sàng goh Yàng Tom Trồ bol khai in.

⁸ Sền tĕ di bol khai la sàng goh tài bơh bol khai ơn phan sa Yàng Tom Trồ bol mê dê. Sền tĕ bol khai la sàng goh, tài bơh Añ, Yàng Jehôwa, la sàng goh, mơ Añ neh lơh bol mê in gơs sàng goh.

⁹ Dilah dô nă kòn ùr cau gơnoar ơn phan duh khoai lơh să tòm khai in gơlik gơs ƀơ̆ ƀơl bơh neh lơh dri, khai lơh ƀàssìl ƀàsso bèp khai in, khai pal kong chu tòm ồs.

¹⁰ Cau gơnoar dờng ơn phan duh khoai, la cau gơs gơnoar broă lin rlau mơ ală oh mi khai dê mơ neh geh tuh mơñà ngui nàng bong hơđang bồ khai mơ la cau neh geh pồ bơtào nàng soh ală ồi ào cau gơnoar ơn phan duh khoai dê, cau hơ̆ ò di lòi bồ ò kèr sŏ hala crè ală ồi ào khai dê.

¹¹ Khai ò geh mut di tiah gơs cau chơt. Khai ò geh lơh să tòm khai in gơlik gơs ò goh, bulah bơh bèp hala mè khai dê kung behơ̆ sơl,

¹² kung ò di lik lòt bơh di tiah sàng goh Yàng Tom Trồ khai dê hala lơh tiah hơ̆ in gơlik gơs ò goh, tài bơh khai neh geh ơn is bơh mơñà Yàng Tom Trồ khai dê neh bong hơđang khai. Añ la Yàng Jehôwa.

¹³ Cau ùr mơ khai bau pal la cau ơruh dềt òhềt bau.

¹⁴ Khai ò di bau mơ dô nă cau ùr bơnrau, mơ dô nă cau ùr neh lòi bau, hala mơ dô nă cau ùr neh gơlik ƀơ̆ ƀơl bơh neh lơh dri, mơya mìng bau mơ dô nă cau ơruh dềt òhềt tòmbau bơh tòm làng bol khai dê,

¹⁵ nàng khai rơp ò lơh ƀơ̆ ƀơl kòn sau khai dê digùl làng bol khai. Añ la Yàng Jehôwa, la Bơtau lơh khai in gơs sàng goh.’”

¹⁶ Yàng Jehôwa đơs mơ Môise lah:

¹⁷ “Đơs tĕ mơ Arôn lah: ‘Gan ală rài rơp tus gen bañ gơs cau lơi tòm kòn sau mê dê la cau gơs să jan ò wil tơl rgơi tus rềp nàng ơn phan sa Yàng Tom Trồ khai dê.

¹⁸ Ò gơs cau lơi gơs să jan ò wil tơl rgơi tus rềp: ò gơs cau lơi jơngo mat hala gơlte jơng, pă muh hala să jan ò gam be òs;

¹⁹ ò gơs cau lơi pă dô đah jơng hala tê,

²⁰ khun but hala liah, hala gar mat ò sền song, gơs toh sa rì hala tơrklào bơcah.

²¹ Tòm kòn sau Arôn la cau gơnoar ơn phan duh khoai, ò gơs cau lơi gơs să jan ò wil tơl rgơi tus rềp nàng ơn Yàng Jehôwa in ală phan ơn chu tòm ồs. Khai gơs să jan ò wil tơl; khai ò geh tus rềp nàng ơn phan sa Yàng Tom Trồ khai dê.

²² Khai rgơi sa phan sa sàng goh rlau jơh Yàng Tom Trồ khai dê, kung rgơi sa phan sa sàng goh;

²³ bulah behơ̆, tài bơh să jan ò wil tơl khai dê gen khai ò geh tus rềp bài kơrnìng hala tus rềp cơnòng duh khoai, mơ lơh hìu Añ jê gơlik gơs ò goh. Añ la Yàng Jehôwa, la Bơtau lơh bol khai in geh sàng goh.’”

²⁴ Behơ̆ Môise yal wơl ală jơnau do Arôn mơ ală kòn klau khai in mơ jơh ală cau Israel in sơl.