Kôlôse 4 - Sră Goh 2018

¹ Ơ cau la cau tòm, gơwèt tĕ mơ cau dĭ gơna mê dê dô bă song ring mơ ring bal, bơh git lah oh mi kung gơs dô nă Cau tòm ơm hơđang trồ.

Jơnau bơto tơngkah ndai

² Kơ̆ nùs tĕ tòm bơta hòi dan, ai bơta ưnngài mơ drơng kơp tòm broă hơ̆.

³ Kung hòi dan tĕ bol hi in, dan Yàng Tom Trồ pò bol hi in dô nơm mpồng bơto jơnau Yàng, nàng bơto jơnau ndơp ndơr Bơtau Krist dê, kung bơh jơnau hơ̆ mơ añ kòl kơt mơ che sreng,

⁴ tồ añ in yal tơlik jơnau hơ̆ be añ pal đơs.

⁵ Lơh lòt tĕ dô bă jak chài gơwèt mơ cau bơdìh, mơ pơlai tĕ tŭ tơngai.

⁶ Jơnau đơs oh mi pal gơs bơta nđàc sùm sùm, mơ tĕ bơtơl boh, tồ oh mi in git pal ho wơl kòp nă cau in la mbe lơi.

Jơnau còp să

⁷ Ticikơ la oh mi đềt mềr, la cau gơnoar duh broă dòn song, mơ kung la cau bơyô duh broă bal mơ añ tòm Yàng, rơp yal tơlik oh mi in git jơh ală broă añ jê.

⁸ Ngan bơh bơta hơ̆ mơ añ neh sồr khai tus hơ oh mi, tồ oh mi in git ală bơta gơtơntus di bol hi la mbe lơi, mơ nàng khai chồl bơtrut nùs oh mi dê.

⁹ Cau lòt bal mơ khai la Ônesim, oh mi dòn song mơ đềt mềr ngan, la cau gơp ƀòn oh mi dê. Bol khai rơp yal oh mi in git jơh ală bơta tềng do.

¹⁰ Aritak, la cau bơyô kong jàm bal mơ añ, còp să oh mi; Mak, la oh mi jơi bơtiàn bal mơ Banaba, kung behơ̆ sơl. (Bơh Mak gen oh mi neh dòp jơnau sồr rau dilah khai tus hơ oh mi, wă rò tĕ khai.)

¹¹ Jesu sơnđan la Justus kung còp să oh mi. Tòm mpồl cau kòñ prap gàr bơta boh lam siat gơltau, mìng ală cau hơ̆ la bơyô lơh broă bal mơ añ bơh lơgar Yàng Tom Trồ dê; bol khai kung lơh nùs añ in geh pơndòm pơniang.

¹² Epapras cau gơp ƀòn oh mi dê, dĭ gơna Yàng Krist Jesu dê, còp să oh mi; khai bơh oh mi mơ òs tòmlơh tòm bơta hòi dan, nàng oh mi gơs bơta dòn kơ̆ nền mơ dòn bơr wil tơl jat nùs kòñ Yàng Tom Trồ dê.

¹³ Bơh añ lơh cơng bơh khai lah, khai kong oă broă bòl glar bơh oh mi, bơh cau ơm tòm Laodise, mơ bơh cau ơm tòm Hierapôlis sơl.

¹⁴ Luka, la cau gơnoar sơnơm kòñ gơboh, còp să oh mi; Demas kung behơ̆ sơl.

¹⁵ Dan còp să ală oh mi ơm tòm Laodise, mơ Nimpas bal mơ Hìu Jum Goh pơjum tòm hìu khai dê.

¹⁶ Dơ̆ neh sền sră do digùl oh mi rau, gen ai tĕ gơ Hìu Jum Goh Laodise in sền bal, mơ oh mi kung sền tĕ sră bơh Laodise pơyoa tus sơl.

¹⁷ Đơs tĕ mơ Acip lah: “Kơrhia tĕ lơh wil tơl gơnoar broă mơ bi neh dòp bơh Yàng.”

¹⁸ Tê tòm añ, Pol, cih jơnau do còp să oh mi. Kah tĕ che sreng añ jê. Dan bơta nđàc ơm bal mơ oh mi.