Kôlôse 3 - Sră Goh 2018

Bơto tơngkah bơh bơta ngui sa tòm ƀòn lơgar mơ hìu nhă ( 3:1 – 4:18 ) Rài pa tòm Bơtau Krist

¹ Behơ̆ dilah oh mi neh geh kis wơl bal mơ Bơtau Krist, gen jòi jat tĕ ală bơta hơđang trồ, la tiah Bơtau Krist nggui đah ma Yàng Tom Trồ.

² Ơn tĕ nùs kơlôi gơwèt mơ ală bơta hơđang trồ mơ bañ ơn nùs kơlôi gơwèt mơ ală bơta tòm ù.

³ Bơh oh mi neh chơt, bơta kis oh mi dê neh pồn bal mơ Bơtau Krist tòm Yàng Tom Trồ.

⁴ Tŭ lơi Bơtau Krist la bơta kis bol he dê tơlik să, tŭ hơ̆ oh mi kung rơp tơlik să bal mơ Kơnràñ tòm bơta gơklŏ.

⁵ Behơ̆ tơnchơt tĕ ală pơnah să jan oh mi dê tòm ù, hơ̆ la rềs àr bơrnàn, ngkòr ngkàc, gơboh kơnhơl lềng làng, hàm kòñ bơta iơh, mơ hàm hà la bơta duh rùp ràk.

⁶ Tài bơh ală bơta hơ̆ gen bơta gơjrañ dờng Yàng Tom Trồ dê dùh hơđang ală cau ò dòn bơr Yàng.

⁷ Lài òr tòm tŭ oh mi gam kis tòm ală glài hơ̆, gen kung neh lơh lòt behơ̆ sơl.

⁸ Mơya tŭ do oh mi tă sang tĕ jơh ală bơta hơ̆, la bơta gơhào nùs, bơta gơjrañ mañ, bơta bih khih, bơta bơrsèl tơnhial, mơ jơnau pàp tràl bơh di bơr oh mi.

⁹ Bañ đơs blac bal mơ gơp, bơh neh klò sang cau yau bal mơ bơta lơh lòt gơ dê,

¹⁰ mơ neh soh cau pa, la cau geh tòmgơl pa jat rùp să Bơtau neh crơng gơs cau hơ̆, nàng geh tus hơ bơta dòp git Yàng Tom Trồ.

¹¹ Tềng do ò tai gơs cau Grek, cau Juda, cau siat gơltau hala cau ò siat gơltau, cau ò git jơnau, cau Sithe, cau dĭ gơna hala cau khat gơboh, mơya Bơtau Krist la jơh ală bơta mơ tòm jơh ală bơta.

¹² Behơ̆ oh mi la cau sac rwah Yàng Tom Trồ dê, cau sàng goh mơ đềt mềr Kơnràñ dê, gen soh tĕ nùs nđàc sơngit, kơ̆ dơn, pơndêt să, niam lơnhơn, kong ơt.

¹³ Dilah cau do gơs bơta yoam joh mơ cau ne, gen kong ơt tĕ bal mơ gơp mơ toh glài tĕ bal mơ gơp; be Yàng neh toh glài oh mi be lơi, gen oh mi kung pal toh glài behơ̆ sơl.

¹⁴ Hơđang jơh ală bơta hơ̆, soh tĕ nùs kòñ gơboh, la che tơrbŏ bơta wil tơl dê.

¹⁵ Lòi tĕ bơta lơngap lơngai Bơtau Krist dê at bồ tòm nùs oh mi, la bơta lơngap lơngai mơ oh mi neh geh hòi tus tòm dô nơm să jan; kung gơs tĕ nùs ưnngài.

¹⁶ Ai tĕ jơh ală bơta jak chài nàng jơnau Bơtau Krist dê ơm bềng lìu tòm oh mi; ngui bơta đơs crih, bơta đơs chò, mơ sèng đơs chò đah hwềng mơ bơto tơngkah bal mơ gơp, mơ tòm nùs đơs chò Yàng Tom Trồ in dô bă gơs bơta nđàc.

¹⁷ Dilah oh mi lơh bơta lơi, bulah jơnau đơs hala broă lơh, ai tĕ sơnđan Yàng Jesu mơ lơh jơh ală bơta, kơnòm di Kơnràñ mơ ưnngài Yàng Tom Trồ la Bèp.

Broă tòm tòm hìu nhă

¹⁸ Ơ cau la bau ùr, dòn duh tĕ bau klau ai dê, bơta hơ̆ la di pal tòm Yàng.

¹⁹ Ơ cau la bau klau, kòñ gơboh tĕ di bau ùr mê dê mơ bañ gơs bơta sràt bơtang mơ khai.

²⁰ Ơ cau la kòn, tòm jơh ală bơta dòn duh tĕ mè bèp he, bơh bơta hơ̆ niam nùs Yàng.

²¹ Ơ cau la bèp, bañ bơrcek kòn he, rngòt bol khai gơplơ̆ nùs mòn.

²² Ơ cau la dĭ gơna, tòm jơh ală bơta dòn duh tĕ cau tòm mê dê jat đah poac să, ò di bơh bơta duh broă di đap mat cau, be cau kòñ lơh niam nùs cau, mơya bơh duh rngòt di Yàng, ai tĕ nùs song ngan mơ duh broă.

²³ Dilah lơh broă lơi, lơh tĕ jơh nùs, be lơh Yàng in, ò di be lơh cau in ò,

²⁴ Bơh git lah oh mi rơp bơh Yàng mơ dòp sre brê lơh gơs phan ƀàn, tài bơh oh mi kung duh broă Yàng Krist sơl.

²⁵ Bơh cau lơi lơh bơta ò song ring, gen rơp kong sal wơl bơta ò song ring khai neh lơh hơ̆, bơh ò gơs bơta cah is cau lơi.