Jude 1 - Sră Goh 2018

Jơnau còp să

¹ Jude, dĭ gơna Yàng Jesu Krist dê mơ oh Jakơ dê, pơyoa ală cau neh geh hòi sac in, la cau kòñ gơboh tòm Yàng Tom Trồ la Bèp, mơ geh Yàng Jesu Krist sền gàr;

² Dan bơta kòñ nđàc, bơta lơngap lơngai mơ bơta kòñ gơboh geh ai bơtơl oă oh mi in.

Ală cau bơto ma blac

³ Ơ ală oh mi kòñ gơboh, tòm tŭ añ jơh nùs kòñ cih oh mi in bơh bơta dong klàs bal bol he dê, gen añ kơlôi la pal càng cih nàng bơto tơngkah oh mi lah pal jơh nùs tòmlơh tài bơh bơta dòn, la bơta neh jào ală cau sàng goh in dô dơ̆ tơl rau.

⁴ Bơh gơs cau ƀà neh mut òm tòm mpồl bol he, hơ̆ la ală cau bơh lài òr neh kòl lơh nền lòi bơta cahrña in, la cau ò gơs nùs duh rngòt, neh tòmgơl bơta nđàc Yàng Tom Trồ bol he dê gơlik gơs bơta bung jang, mơ pơndang sang Bơtau Tòm At Bồ gơs mìng dô nă, la Yàng bol he dê, la Yàng Jesu Krist.

⁵ Añ kòñ tơngkah wơl oh mi in, bulah oh mi neh git tơl jơh rau, hơ̆ la Yàng neh dong làng bol lik klàs bơh lơgar Ejiptơ, gen tơnơ̆ neh tơnroh ală cau ò dòn.

⁶ Ai ală cau gơnrơh ò prap gàr gơnoar broă bol khai dê mơya sang lòi tiah tòm bol khai dê, gen Yàng Tom Trồ neh kơt bol khai mơ che sreng gam sùm sùm tòm tiah klam jơngo jơl tus di ngai cahrña dờng.

⁷ Be Sôdôm, Gômôrơ mơ ală ƀòn dờng gùt dar kung neh jat behơ̆ mơ lơh bơta rềs àr bơrnàn mơ ting jat bơta hàm kòñ poac să dê la bơta cau ò òs lơh, gen neh kong lơh glài jàm tòm ồs gam sùm sùm, mơ lòi krơh di đap bol he.

⁸ Bulah behơ̆, ală cau gơlơh be mpau do kung jat dô gùng hơ̆ mơ lơh ƀơ̆ ƀơl să jan he, pơndang sang gơnoar at bồ, mơ bơrsèl tơnhial di ală gơnoar dờng ryŭ.

⁹ Mơya tòm tŭ cau gơnrơh dờng rlau jơh la Mikael tòm pơndang mơ cà ràk nàng tòmpìt ƀồc Môise, gen khai ò khin ai jơnau bơrsèl tơnhial nàng yă cà ràk mơya mìng đơs lah: “Dan Yàng lah pơrhơng mê.”

¹⁰ Mơya ală cau do bơrsèl tơnhial di ală bơta bol khai ò git wă, ai ală bơta bol khai jat bơta òs mơ git kung be ală phan poan jơng ò gơs dơngoh kơlôi, gen bol khai kòl tơnroh bơh ală bơta hơ̆.

¹¹ Bòl glar bol khai in! Bơh bol khai neh jat gùng Kain dê, bơh hàm kòñ cồng nha gen phi să tòm bơta tìs nrah Balaam dê, mơ kòl roh rui tòm bơta tòmdră Kôra dê.

¹² Ală cau hơ̆ la tềl ƀơ̆ ƀơl tòm bơta pơjum sa kòñ gơboh oh mi dê, bol khai kư̆ ñô sa rui ràm khat gơboh bal mơ gơp dô bă ò rngòt, bol khai mìng siam is să he; bol khai kung be mhwal ò gơs dà, jat càl pơrdô tềng do tềng dă; kung be chi di di kơnhai plai mơya gơ ò gơs plai, bàr dơ̆ chơt, gơlừ ryas.

¹³ Bol khai la ryà dàlềng lơnggac dờng ngan, kơmbuh bơta ƀàssìl ƀàsso bol khai dê; bol khai kung be ală sơmañ lòt gơlềng gơlàng, mơ bơta klam jơngo cik neh geh prap lòi sùm sùm bol khai in.

¹⁴ Hơ̆ kung tài bơh bol khai mơ Enôk la cau neh poh rài bơh Adam, neh đơs hwơr lah: “Ne, Yàng tus bal mơ tơlak tơmàn cau sàng goh Kơnràñ dê,

¹⁵ nàng cahrña, mơ lơh nền glài jơh ală cau ò duh rngòt Yàng Tom Trồ bơh jơh ală broă ò duh rngòt bol khai dê, mơ bơh jơh ală jơnau tràl sơrbil mơ cau glài ò duh rngòt neh đơs tòmdră mơ Kơnràñ.”

¹⁶ Ală cau hơ̆ la cau jak yoam pơrhiat mơ ò hừh nùs, lơh jat bơta hàm kòñ is he dê, jak đơs jơnau pơnhừ să, ngui jơnau đơs rơmhòc nàng geh cồng nha.

¹⁷ Mơya, ơ ală oh mi kòñ gơboh, kah tĕ jơnau ală cau gơnoar bơto dờng Yàng Jesu Krist dê neh đơs lài.

¹⁸ Bol khai đơs mơ oh mi lah: “Tòm tŭ lồi dut rơp gŏ ală cau jak dơñŏ tơnhial lơh lòt jat bơta hàm kòñ is ò duh rngòt Yàng Tom Trồ bol khai dê.”

¹⁹ Hơ̆ la ală cau cah is mpồl, jat đah dunnia ò gơs Yàng Hwềng.

²⁰ Mơya, ơ ală oh mi kòñ gơboh, oh mi bơt bơtào tĕ să tòm oh mi hơđang bơta dòn sàng goh ngan oh mi dê, kơnòm di Yàng Hwềng Goh mơ hòi dan.

²¹ Kơrmap gàr să tòm he tòm bơta kòñ gơboh Yàng Tom Trồ dê, kơp gơn bơta kòñ nđàc Yàng Jesu Krist bol he dê nàng gơs bơta kis gam sùm sùm.

²² Yal tơlik tĕ ală bơta nđàc hơ ală cau pin wil wơl,

²³ dong klàs tĕ ală cau ndai, tă bol khai lik klàs bơh di ồs; ai ală cau ndai tai gen oh mi ai tĕ nùs kòñ nđàc bal mơ nùs rngòt, gơjrañ kơuềng tơn di ào kòl poac să lơh ƀơ̆ ƀơl.

Bơta hòi dan jòng ro

²⁴ Mơ tai, dan Bơtau rgơi ê sền gàr oh mi klàs bơh bơta gơtup tìs, mơ tơlik mat oh mi ntào di đap bơta gơklŏ Kơnràñ dê, dô bă ò tềl sồt mơ hòn chò ò git lơh,

²⁵ hơ̆ la Yàng Tom Trồ mìng dùl lơm mơ la Yàng Jesu la Yàng Dong Klàs bol he dê; dan bơta gơklŏ, bơta ryŭ ryơm, gơnoar pràn mơ gơnap gơnoar gơrê bal mơ Kơnràñ bơh ală rài lài, tus di tŭ do, jơl tus sùm sùm. Amen.