Jôsue 9 - Sră Goh 2018

Cau Gabaôn ngui kai gơrmơ̆i nàng lơh bơta tòmho bal mơ Israel

¹ Tòm tŭ ală cau bơtau ơm đah ne hiòng Jordan dê, ơm tòm lơgar kơh mơnơm, mơ tòm tiah liah rò gah Dàlềng Dờng hơ đah Liban, la bơtau làng bol Hetit, Amôrit, Kanaan, Pherijit, Hebit mơ Jebusit, kơno bơh bơta do,

² bol khai pơjum bal nàng tòmlơh mơ Jôsue mơ Israel.

³ Mơya tòm tŭ làng bol ơm tòm Gabaôn kơno bơta Jôsue neh lơh di Jerikô mơ Ahi,

⁴ gen bol khai bơyai pal lơh blac pơrlồm: Bol khai lòt rcang phan ngui sa ơn tòm kơldung yau kơt hơđang alàng, ơn tơrnòm tòm nhồng gơltau sèt neh tơmbồl wơl.

⁵ Bol khai jă gơltau jă neh siar sèt mơ kơt wơl, mơ bol khai soh ồi ào yau. Jơh ală phan sa bol khai dê neh ro rañ mơ but bơsềt.

⁶ Bol khai lòt tus hơ Jôsue di tiah lơh sàl tòm Gilgal mơ đơs mơ khai mơ jơh ală cau Israel lah: “Bol hi neh tus bơh dô nơm lơgar ngài, dan lơh tĕ dô bơta tòmho bal mơ bol hi.”

⁷ Cau Israel đơs mơ ală cau Hebit lah: “Digơlan bol mê ơm rềp mơ bol hi; behơ̆ gen mbe bol hi rgơi lơh bơta tòmho bal mơ bol mê taih?”

⁸ Bol hơ̆ đơs mơ Jôsue lah: “Bol hi la cau duh broă ồng dê.” Mơya Jôsue đơs mơ bol khai lah: “Bol mê la ñcau? Bol mê tus bơh lơi taih?”

⁹ Bol hơ̆ ho lah: “Ală cau duh broă ồng dê neh tus bơh dô nơm lơgar ngài ngan, tài bơh bol hi neh kơno sơnđan Jehôwa Yàng Tom Trồ ồng dê. Bol hi neh kơno cau yal bơh Kơnràñ, mơ jơh ală bơta Kơnràñ neh lơh tòm lơgar Ejiptơ,

¹⁰ mơ jơh ală bơta Kơnràñ neh lơh di bàr nă cau bơtau Amôrit ơm đah mattơngai lik hiòng Jordan dê, hơ̆ la Sihôn bơtau Hesbôn mơ Ok bơtau Basan at bồ tòm Astarôt.

¹¹ Behơ̆ ală cau kwang kra bal mơ jơh làng bol tòm lơgar bol hi dê đơs mơ bol hi lah: ‘Cèng tĕ phan ngui sa nàng lòt gùng tus hơ làng bol hơ̆, mơ đơs mơ bol khai lah: “Bol hi la cau duh broă ală ồng dê; dan lơh tĕ dô bơta tòmho bal mơ bol hi.”’

¹² Do la piang lă bol hi dê; la phan sa lòt gùng gơ gam duh tòm ngai bol hi lik bơh hìu bol hi dê nàng tus hơ ală ồng, mơya tŭ do, sền tĕ gơ neh ro rañ mơ but bơsềt tai sơl.

¹³ Ală nhồng gơltau do gam tơrme tòm tŭ bol hi tuh bềng tơrnòm, mơya sền tĕ gơ neh klar sèt ngan ò git lơh. Ală ồi ào bol hi dê neh sut sèt mơ gơltau jă neh siar lơho tài bơh lòt gùng ngài.”

¹⁴ Cau Israel sền sơwì ală phan ngui sa bol hơ̆ dê mơ ò hòi lùp Yàng Jehôwa.

¹⁵ Gen Jôsue lơh dô bơta tòmho ring lơngai mơ bol hơ̆, mơ lòi bol khai in kis, mơ ală cau kwang at bồ mpồl jơnum Israel dê srat să tòmho mơ bol hơ̆.

¹⁶ Mơya pe ngai tơnơ̆ mơ tŭ neh lơh bơta tòmho bal mơ bol khai, cau Israel kơno lah bol hơ̆ la cau lơgar ơm rềp mơ bol khai.

¹⁷ Behơ̆ cau Israel ñă lòt gùng tòm pe ngai mơ tus hơ ală ƀòn dờng bol hơ̆ dê la Gabaôn, Kephirah, Beerôt mơ Kiriat Jearim,

¹⁸ mơya làng bol Israel ò lơh bol hơ̆ tài bơh ală cau kwang at bồ mpồl jơnum Israel dê neh ai sơnđan Jehôwa Yàng Tom Trồ Israel dê mơ srat să ho nền mơ bol hơ̆ rau. Jơh dô mpồl jơnum Israel dê yoam tòmdră di ală cau kwang at bồ,

¹⁹ mơya ală cau kwang at bồ đơs mơ mpồl làng bol lah: “Bol hi neh ai sơnđan Jehôwa Yàng Tom Trồ Israel dê mơ srat să ho nền mơ làng bol hơ̆ mơ tŭ do bol he ò rgơi ƀư di bol khai.

²⁰ Do la bơta bol he rơp lơh gơwèt mơ bol hơ̆: bol he rơp lòi bol khai in kis nàng bơta gơjrañ dờng hơ̆ ò tuh hơđang bol he, tài bơh bol he ò prap gàr jơnau srat să ho nền mơ bol khai.”

²¹ Ală cau kwang at bồ đơs pơnjat tai lah: “Lòi bol khai in kis, mơya bol khai pal koh lòng ơnòng dà jơh mpồl jơnum Israel in.” Behơ̆, jơnau srat să tòmho ală cau kwang at bồ dê neh geh prap gàr.

²² Gen Jôsue hòi làng bol Gabaôn mơ đơs mơ bol khai lah: “Ñchi bơh tài bol mê neh pơrlồm bol hi mơ đơs lah: ‘Bol hi ơm ngài ngan bơh di ală ồng,’ mơya bol mê ngan la ơm rềp mơ bol hi behơ̆ taih?

²³ Tŭ do bol mê gơkòl srat rma. Bol mê pal gơs cau koh lòng ơnòng dà tòm hìu Yàng Tom Trồ añ jê sùm sùm.”

²⁴ Bol khai đơs mơ Jôsue lah: “Ală cau duh broă ồng dê neh kơno loh làng mbe Jehôwa Yàng Tom Trồ ồng dê neh ai jơnau gơnoar sồr Môise in la cau duh broă Kơnràñ dê, nàng ai ồng in jơh lơgar do mơ tơnroh jơh ală làng bol tòm lơgar bơh di đap ồng. Behơ̆ bol hi rngòt roh bơta kis bol hi dê tòm tê ồng, gen tàng bol hi neh lơh bơta hơ̆.

²⁵ Tŭ do bol hi ơm tòm tê ồng, lơh tĕ di bol hi bơta lơi ồng kơlôi la niam mơ di.”

²⁶ Behơ̆ Jôsue dong bol khai klàs bơh di cau Israel mơ cau Israel ò tơnchơt bol khai.

²⁷ Tòm ngai hơ̆, Jôsue lơh di bol khai gơs cau koh lòng ơnòng dà mpồl jơnum in mơ cơnòng duh khoai Yàng Jehôwa in tòm tiah Kơnràñ rơp sac rwah; mơ bol khai lơh behơ̆ jơl tus di ngai do.