Jôsue 8 - Sră Goh 2018

Tòmpìt ai ƀòn Ahi

¹ Gen Yàng Jehôwa đơs mơ Jôsue lah: “Mê bañ rngòt, bañ gơplơ̆ nùs; lam tĕ jơh cau ling tòmlơh bal mơ mê, mơ guh tus hơ Ahi, bơh Añ neh jào tòm tê mê bơtau Ahi dê, bal mơ làng bol, ƀòn dờng mơ lơgar khai dê.

² Mê rơp lơh di Ahi mơ bơtau gơ dê kung be mê neh lơh di Jerikô mơ bơtau gơ dê; mìng bơh ală phan phà kup bal mơ phan poan jơng gơ dê bol mê rơp ai be phan phà kup să tòm bol mê in. Ơn dô mpồl kơp òm tòmdră bơh ngkòi ƀòn dờng.”

³ Behơ̆ Jôsue mơ jơh ală cau ling tòmlơh rcang lik lòt tòmlơh mơ ƀòn Ahi. Jôsue sac rwah pe jơt rbô nă cau jak tòmlơh, sồr bol khai lik lòt tòm trồ mang,

⁴ mơ ai jơnau sồr lah: “Bol mê kơp mòc tĕ đah ngkòi ƀòn; bañ lòt ngài ir bơh ƀòn, mơya jơh tơl nă bol mê ơm ngac mat.

⁵ Ai añ mơ jơh ală cau bal mơ añ rơp tus rềp hơ ƀòn. Tòm tŭ bol khai lik bơh ƀòn nàng tòmdră mơ bol hi be dơ̆ lài, bol hi rơp dô bơh di bol khai.

⁶ Bol khai rơp ting jat bol hi jơl tus bol hi neh lam bol khai ngài bơh di ƀòn dờng; bơh bol khai rơp đơs, ‘bol khai dô bơh di bol he kung be dơ̆ lài.’ Tòm tŭ bol hi dô bơh di bol khai,

⁷ bol mê pal guh bơh di tiah bol mê ơm kơp òm mơ tòmpìt ai ƀòn; bơh Jehôwa Yàng Tom Trồ bol mê dê rơp jào gơtòm tê bol mê.

⁸ Mơ tòm tŭ bol mê neh ai geh ƀòn rau, gen bol mê pal chu gơ. Lơh tĕ jat be jơnau Yàng Jehôwa neh sồr. Sền tĕ, añ neh ai jơnau sồr bol mê.”

⁹ Gen Jôsue sồr bol khai lik lòt; bol khai lòt tus di tiah ơm kơp òm mơ bol khai ơm kơp digùl Betel mơ Ahi, đah mattơngai mut Ahi dê; ai Jôsue ơm mang hơ̆ digùl làng bol tòm sàl.

¹⁰ Rìng àng, Jôsue guh gòñ pơjum làng bol mơ lik lòt; bal mơ ală cau kwang kra Israel dê, di đap làng bol tus hơ ƀòn Ahi.

¹¹ Jơh ală cau ling tòmlơh ơm bal mơ khai lik lòt tus rềp di đap ƀòn mơ lơh sàl đah đang Ahi, gơs dô nơm croh digùl bol khai mơ Ahi.

¹² Jôsue ai pram rbô nă cau ling, sồr bol khai kơp òm digùl Betel mơ Ahi, đah mattơngai mut ƀòn dê.

¹³ Bol khai rơndap ală cau ling nàng tòmlơh, mpồl lơh sàl đah đang ƀòn dê mơ mpồl sền gàr kơp òm bơh ngkòi đah mattơngai mut ƀòn dê. Mơya mang hơ̆ Jôsue ơm tòm thòng.

¹⁴ Tòm tŭ bơtau Ahi gŏ bơta hơ̆ gen khai mơ jơh ală làng bol khai dê, la ală cau ơm tòm ƀòn sơrbac sơrbang lik lòt gòñ bơh àng drim tus di tiah neh lơh nền tòm toh di đap Arabah nàng tòmlơh mơ cau Israel. Mơya khai ò git gơs cau kơp òm nàng tòmlơh mơ khai đah ngkòi ƀòn.

¹⁵ Jôsue mơ jơh Israel lơh be alah di đap bol khai mơ dô hơ đah ƀlàng ngềt ngơt.

¹⁶ Behơ̆ jơh làng bol tòm ƀòn hòi bal mơ gơp nàng ting jat bol khai, mơ bol khai ting jat Jôsue, bol khai neh kòl lam lòt ngài bơh di ƀòn.

¹⁷ Ò gơs dô nă cau klau lơi gam ơm wơl tòm Ahi hala Betel mơ ò lik ting jat Israel; bol khai lòi ƀòn ơm pò gòi, mơ ting jat Israel.

¹⁸ Gen Yàng Jehôwa đơs mơ Jôsue lah: “Yơr tĕ đào mê at tòm tê wèt hơ ƀòn Ahi, bơh Añ rơp jào gơtòm tê mê dê.” Mơ Jôsue yơr đào khai at tòm tê wèt hơ ƀòn Ahi.

¹⁹ Tòm tŭ khai yơr tê khai dê gen mpồl ơm kơp òm guh mhar bơh di tiah bol khai ơm kơp mơ brồ tus hơđap. Bol khai mut tòm ƀòn, tòmpìt ai gơ mơ chu gơ mơ ồs mo.

²⁰ Ală cau Ahi wơlke sền gŏ ñhŭ bơh ƀòn guh hơ trồ; mơya bol khai ò rgơi dô hơ đah do hala đah ne, tài bơh cau Israel neh dô đah ƀlàng ngềt ngơt tơrwơl lơh ală cau ting jat bol khai.

²¹ Tòm tŭ Jôsue mơ jơh cau Israel gŏ ală cau kơp òm neh tòmpìt ai ƀòn mơ gŏ ñhŭ guh bơh ƀòn, gen bol khai rê wơl lơh cau Ahi.

²² Ală cau neh kơp òm kung lik bơh ƀòn mơ lơh cau Ahi sơl; bol khai kòl gơrwàng gùt dar, cau Israel tơnchơt bol khai jơl tus di tŭ ò gam dô nă cau lơi kis hala dô nă cau lơi dô klàs.

²³ Mơya bol khai kup bơtau Ahi gam kis mơ cèng khai tus hơ Jôsue.

²⁴ Tòm tŭ cau Israel neh sir tơnchơt jơh cau ƀòn Ahi tòm ƀlàng ngềt ngơt la tiah bol khai ting jat bol hơ̆, mơ tòm tŭ jơh tơl nă tòm bol khai jơl tus di cau lồi dut neh gơplơ̆ chơt bơh đào, jơh cau Israel rê wơl hơ Ahi mơ brồ lơh gơ mơ đào.

²⁵ Jơh ală cau neh gơplơ̆ chơt tòm ngai hơ̆, ală cau klau, ală cau ùr la jơh ală làng bol Ahi, jơt bàr rbô nă.

²⁶ Bơh Jôsue ò tơmù tê khai dê, bơh khai neh pò tơlik đào khai dê jơl tus di tŭ khai neh tơnroh jơh ală cau tòm ƀòn Ahi.

²⁷ Mìng ală phan poan jơng mơ ală phan phà geh bơh ƀòn hơ̆, cau Israel ai lơh gơs be phan phà kup să tòm bol khai in, jat be Yàng Jehôwa neh nting sồr Jôsue.

²⁸ Behơ̆ Jôsue neh chu ƀòn Ahi, mơ neh lơh gơ in gơlik dô gơnru tơrlah tơrlơm gam sùm sùm, be gơ gơs tus di ngai do.

²⁹ Khai yồng bơtau Ahi hơđang dô nơm chi jơl tus di mho; tŭ mattơngai mut, Jôsue ai jơnau sồr tơmù ƀồc khai bơh di chi mơ sơrbì gơ di mpồng ƀòn, mơ bol khai rơndap lŭ dô gơnru dờng hơđang gơ gam tềng hơ̆ tus di ngai do.

Lơh pa wơl bơta ho bal hơđang mơnơm Ebal

³⁰ Gen Jôsue bơt bơtào hơđang mơnơm Ebal dô nơm cơnòng duh khoai Jehôwa Yàng Tom Trồ Israel in,

³¹ kung be Môise cau duh broă Yàng Jehôwa dê neh bơto sồr cau Israel, be neh cih tòm Sră Bơta Boh Lam Môise dê: “dô nơm cơnòng duh khoai bơt mơ lŭ òhềt phàt mơ òhềt ngui pơnhàt lòs.” Hơđang hơ̆ bol khai ơn phan duh khoai chu pơrguc Yàng Jehôwa in, mơ ơn phan duh khoai bơta ring lơngai dê.

³² Tềng hơ̆, di đap cau Israel, Jôsue pac hơđang lŭ bơta boh lam Môise dê mơ khai neh cih.

³³ Jơh Israel, cau làng bơdìh mơ cau làng tòm bal mơ ală cau kwang kra bol khai dê, ală cau kwang at bồ mơ ală cau kwang cahrña ntào bàr gah Đài Bơta Ho Bal Yàng Jehôwa dê, di đap ală cau gơnoar ơn phan duh khoai tòm jơi bơtiàn Lebi, la ală cau tùng Đài Bơta Ho Bal Yàng Jehôwa dê, nggùl tòm bol khai ơm di đap mơnơm Gerijim, mơ nggùl ơm di đap mơnơm Ebal, jat be Môise cau duh broă Yàng Jehôwa dê neh sồr dơ̆ sơnròp, mơ bol khai pal ai lơngai làng bol Israel in.

³⁴ Tơnơ̆ mơ hơ̆, Jôsue sền jơh ală jơnau cih bơh bơta boh lam, bơta lơngai mơ bơta srat sơntơm, jat be neh cih tòm Sră Bơta Boh Lam.

³⁵ Ò gơs dô jơnau lơi tòm jơh ală jơnau Môise nting sồr mơ Jôsue ò sền di đap mpồl jơnum Israel dê, gơs ală cau ùr, cau kơnòm, mơ cau làng bơdìh ơm digùl bol khai.