Jôsue 6 - Sră Goh 2018

Tòmpìt ai ƀòn Jerikô

¹ Mơ tai, ƀòn Jerikô neh til mpồng đah dơlam mơ đah bơdìh tài bơh làng bol Israel, ò gơs cau lơi lik hala mut.

² Yàng Jehôwa đơs mơ Jôsue lah: “Sền ne, Añ neh jào tòm tê mê ƀòn Jerikô bal mơ cau bơtau mơ jơh mpồl ling gơ dê.

³ Bol mê pal lòt gùt dar ƀòn dô ngai dô dơ̆ bal mơ jơh ală cau ling. Bol mê pal lòt tĕ behơ̆ tòm prau ngai,

⁴ mơ poh nă cau gơnoar ơn phan duh khoai at poh nơm kơlwòk ngke belàt dam lòt hơđap Đài Bơta Ho Bal. Tòm ngai poh bol mê lòt tĕ gùt dar ƀòn tòm poh dơ̆, mơ ală cau gơnoar ơn phan duh khoai uh kơlwòk.

⁵ Tòm tŭ bol mê kơno ntas kơlwòk ală cau gơnoar ơn phan duh khoai neh uh sap jòng, gen jơh làng bol pal driau dô sap dờng; mơ dơrñang ƀòn rơp tơrlơm lề jơh, mơ jơh làng bol kòp nă rơp guh song hơđap.”

⁶ Behơ̆ Jôsue kòn klau Nun hòi ală cau gơnoar ơn phan duh khoai mơ đơs mơ bol khai lah: “Tùng tĕ Đài Bơta Ho Bal Yàng Jehôwa dê mơ gơs poh nă cau gơnoar ơn phan duh khoai at poh nơm kơlwòk ngke belàt dam lòt hơđap Đài Yàng Jehôwa dê.”

⁷ Khai kung đơs mơ làng bol lah: “Lòt tĕ hơđap mơ lòt gùt dar ƀòn, gơs ală cau ling at phan tòmlơh lòt hơđap Đài Yàng Jehôwa dê.”

⁸ Tòm tŭ Jôsue neh đơs mơ làng bol rau, gen poh nă cau gơnoar ơn phan duh khoai at poh nơm kơlwòk ngke belàt dam lòt hơđap uh kơlwòk ndang, mơ Đài Bơta Ho Bal Yàng Jehôwa dê jat bơh tơnơ̆.

⁹ Ală cau ling at phan tòmlơh lòt hơđap ală cau gơnoar ơn phan duh khoai uh kơlwòk, ai ală cau ling sền gàr đah ngkòi lòt jat tơnơ̆ Đài, tòm tŭ kơlwòk gen kư̆ pơnjat uh sùm.

¹⁰ Jôsue neh ai jơnau gơnoar sồr làng bol lah: “Bol mê bañ driau dờng, bañ lòi cau kơno sap đơs bol mê dê, kung bañ đơs dô jơnau lơi jơl tus di ngai añ sồr bol mê driau, gen tŭ hơ̆ bol mê rơp driau.”

¹¹ Behơ̆, Đài Yàng Jehôwa dê geh tùng gùt dar ƀòn dô dơ̆, gen bol khai rê wơl mơ bic mang tòm sàl.

¹² Jôsue guh gòñ bơh àng drim mơ ală cau gơnoar ơn phan duh khoai tùng Đài Yàng Jehôwa dê.

¹³ Poh nă cau gơnoar ơn phan duh khoai at poh nơm kơlwòk ngke belàt dam lòt lài mơ Đài Yàng Jehôwa dê, lòt ndang uh kơlwòk ndang. Ală cau ling at phan tòmlơh lòt lài mơ bol khai, mơ ală cau ling sền gàr bơh ngkòi lòt jat tơnơ̆ Đài Yàng Jehôwa dê tòm tŭ ală kơlwòk kư̆ uh sùm.

¹⁴ Behơ̆ tòm ngai bàr bol khai lòt gùt dar ƀòn dô dơ̆, gen rê wơl hơ sàl. Bol khai lơh behơ̆ tòm prau ngai.

¹⁵ Tòm ngai poh bol khai guh bơh rìng àng, mơ lòt behơ̆ gùt dar ƀòn poh dơ̆, mìng tòm ngai hơ̆ bol khai lòt gùt dar ƀòn poh dơ̆.

¹⁶ Tòm dar lòt dơ̆ poh, tòm tŭ ală cau gơnoar ơn phan duh khoai neh uh kơlwòk, gen Jôsue ai jơnau sồr làng bol lah: “Driau dờng tĕ! Bơh Yàng Jehôwa neh ai ƀòn bol mê in.

¹⁷ Ƀòn dờng bal mơ jơh ală phan tòm hơ̆ pal phi ơn Yàng Jehôwa in nàng tơnroh jơh. Mìng lòi dô nă Rahap la cau ùr dri bal mơ jơh ală cau ơm mơ khai tòm hìu khai dê geh kis, tài bơh khai neh pồn ală cau geh sồr lòt mơ bol he neh sồr lòt.

¹⁸ Mơya đah mơ bol mê, ơm ngài tĕ bơh di ală phan pal tơnroh do, dilah hàm kòñ mơ bol mê ai ală phan ơn is nàng tơnroh hơ̆, gen bol mê rơp lơh sàl Israel dê pal kong bơta tơnroh mơ cèng bơta bòl glar hơđang gơ.

¹⁹ Mơya jơh ală priă, màh mơ jơh ală phan ngui lơh mơ kòng mơ lòs rơp ơn is lơh gơs sàng goh Yàng Jehôwa in, mơ tơmut jơh phan hơ̆ tòm đam jàr Yàng Jehôwa dê.”

²⁰ Behơ̆, làng bol driau dờng, mơ ntas sap ală kơlwòk neh uh; Tòm tŭ làng bol kơno ntas kơlwòk gen bol khai driau dô sap dờng ngan, mơ dơrñang ƀòn tơrlah lề jơh; behơ̆ kòp nă brồ mut song di đap mơ tòmpìt ai ƀòn.

²¹ Bol khai ơn jơh ală phan tòm ƀòn dờng bơta tơnroh in, ai đào tơnchơt jơh cau klau mơ cau ùr, cau kơnòm mơ cau kra, kơnrồ, belàt mơ alàng.

²² Jôsue đơs mơ bàr nă cau sền òm lơgar lah: “Mut tĕ tòm hìu cau ùr dri, mơ lam khai lik bal mơ jơh ală cau ơm mơ khai, jat be jơnau bol mê neh srat să ho nền mơ khai.”

²³ Behơ̆ bàr nă cau pơnu neh lòt sền òm lơgar mut tòm hìu mơ lam Rahap lik bal mơ mè bèp oh mi mơ jơh ală cau bal mơ khai. Bol khai lam jơh ală cau tòm hìu nhă Rahap mơ ơn bol khai hơ bơdìh sàl Israel dê.

²⁴ Gen bol khai chu jơh ƀòn dờng bal mơ jơh ală phan tòm hơ̆; mìng priă, màh mơ ală phan ngui lơh mơ kòng mơ lòs gen bol khai ơn tòm đam jàr hìu Yàng Jehôwa dê.

²⁵ Mơya Rahap la cau ùr dri bal mơ hìu nhă khai dê, mơ jơh ală cau bal mơ khai, gen Jôsue lòi kis, hìu nhă khai dê gam ơm digùl Israel jơl tus ngai do; tài bơh khai neh pồn ală cau geh sồr lòt mơ Jôsue neh sồr lòt sền òm ƀòn Jerikô.

²⁶ Gen Jôsue đơs jơnau srat sơntơm lah: “Cau lơi bơt bơtào wơl ƀòn dờng Jerikô do gen rơp kòl srat sơntơm di đap Yàng Jehôwa. Kòn tơnhoa khai dê pal chơt, tŭ khai bơt ală mơnàng gơ dê; kòn put khai pal chơt, tŭ khai bơtào ală mpồng ƀòn gơ dê.”

²⁷ Behơ̆ Yàng Jehôwa ơm bal mơ Jôsue, mơ khai geh tiơng pơnro tòm làm lơgar.