Jôsue 3 - Sră Goh 2018

Làng bol Israel tiă hiòng Jordan

¹ Rìng àng drim, Jôsue guh bal mơ jơh làng bol Israel lik bơh Sitim mơ lòt tus hơ hiòng Jordan, bol khai bơtào sàl tềng hơ̆ lài mơ tŭ tiă hiòng.

² Tơnơ̆ mơ pe ngai, ală cau at bồ lòt làm tiah sàl ơm,

³ mơ ai jơnau sồr làng bol lah: “Tòm tŭ bol mê gŏ ală cau gơnoar ơn phan duh khoai bal mơ ală cau Lebi tùng Đài Bơta Ho Bal Jehôwa Yàng Tom Trồ bol mê dê, gen bol mê pal tă sàl bol mê dê mơ lòt jat gơ,

⁴ nàng bol mê in git gùng pal lòt, bơh bol mê òhềt lòt gùng do bơh lài. Mơya digùl bol mê mơ Đài Bơta Ho Bal pal gơs dô pah ngài pơgap sin rhiang met; bañ lòt rềp ir di gơ.”

⁵ Gen Jôsue đơs mơ làng bol lah: “Lơh tĕ să tòm bol mê in sàng goh, bơh ngai hìng Yàng Jehôwa rơp lơh ală bơta crih crài digùl bol mê.”

⁶ Jôsue đơs mơ ală cau gơnoar ơn phan duh khoai lah: “Tùng tĕ Đài Bơta Ho Bal lòt lài mơ làng bol.” Behơ̆, bol khai tùng Đài Bơta Ho Bal mơ lòt lài mơ làng bol.

⁷ Mơ Yàng Jehôwa đơs mơ Jôsue lah: “Ngai do Añ rơp sơntòm lơh mê in geh sền dờng màng di đap jơh Israel, nàng bol khai in git lah Añ ơm bal mơ mê kung be Añ neh ơm bal mơ Môise sơl.

⁸ Mê la cau pal sồr ală cau gơnoar ơn phan duh khoai tùng Đài Bơta Ho Bal lah: ‘Tòm tŭ bol mê tus di gah hiòng Jordan, gen pal ơm ntào tĕ tòm hiòng hơ̆.’”

⁹ Gen Jôsue đơs mơ làng bol Israel lah: “Tus tĕ rềp tềng do mơ iat jơnau Jehôwa Yàng Tom Trồ bol mê dê.

¹⁰ Bơh bơta do bol mê rơp git Yàng Tom Trồ la Bơtau kis gam sùm sùm ơm digùl bol mê, mơ ngan la Kơnràñ rơp ting bơtrơh bơh di đap bol mê làng bol Kanaan, làng bol Hetit, làng bol Hebit, làng bol Pherijit, làng bol Girgasit, làng bol Amôrit mơ làng bol Jebusit:

¹¹ Đài Bơta Ho Bal Yàng Jehôwa dê la Bơtau at bồ jơh dunnia rơp lòt lài mơ bol mê tòm hiòng Jordan.

¹² Behơ̆ tŭ do sac rwah tĕ jơt bàr nă cau bơh ală jơi bơtiàn Israel dê, kòp jơi bơtiàn dô nă.

¹³ Tòm tŭ ală cau gơnoar ơn phan duh khoai tùng Đài Bơta Ho bal Yàng Jehôwa dê la Yàng jơh dunnia dê, ơn mpàng jơng bol khai dê tòm dà hiòng Jordan gen dà tòm hiòng hòr bơh tồ rơp kòl cah bàr đah, mơ gơ ơm dơh wơl lơh gơs kung be dô nơm gơnru.”

¹⁴ Behơ̆ tòm tŭ làng bol lik bơh ală sàl bol khai dê nàng tiă hiòng Jordan, gen ală cau gơnoar ơn phan duh khoai tùng Đài Bơta Ho Bal mơ lòt di đap làng bol.

¹⁵ Tŭ hơ̆, dà Jordan tih dờng bam jơh bàr gah hiòng jơh tòm kơnhai toès. Mơya tòm tŭ ală cau gơnoar ơn phan duh khoai tùng Đài Bơta Ho Bal tus di hiòng Jordan mơ tòm tŭ mpàng jơng bol khai dê jă di gah dà,

¹⁶ gen dà bơh tồ gơ ơm dơh wơl ò hòr tai; gơlơh gơs kung be dô nơm gơnru ngài tus di Adam la ƀòn dờng ơm di gah Jarethan; tòm tŭ dà hòr hơ dàlềng Arabah la Dàlềng Chơt, gen gơkòl soat jơh. Behơ̆ gen làng bol lòt gan tòm toh di đap ƀòn Jerikô.

¹⁷ Ală cau gơnoar ơn phan duh khoai tùng Đài Bơta Ho Bal Yàng Jehôwa dê ntào kơ̆ hơđang ù rañ rsơh digùl hiòng Jordan, jơl tus tŭ jơh làng bol Israel lòt gan hơđang ù rañ rsơh jơl tus di tŭ jơh làng bol neh tiă hiòng Jordan sir rau.