Jôsue 23 - Sră Goh 2018

Jơnau tơngac Jôsue dê mơ ală cau kwang at bồ

¹ Tơnơ̆ mơ jŏ tơngai rau, tòm tŭ Yàng Jehôwa neh ai Israel in ơm rlô lơngap lơngai, bơh di jơh ală cau sò tơm ơm gùt dar bol khai, mơ Jôsue neh kra jòng sơnam,

² gen Jôsue hòi pơjum jơh Israel, jơh ală cau kwang kra mơ ală cau kwang at bồ, ală cau kwang cahrña mơ ală cau kwang ling bol khai dê mơ đơs mơ bol khai lah: “Tŭ do añ să neh kra sơnam neh jòng rau;

³ mơ să tòm bol mê neh gŏ jơh ală bơta Jehôwa Yàng Tom Trồ bol mê dê neh lơh di ală làng bol do tài bơh bol mê; hơ̆ la Jehôwa Yàng Tom Trồ bol mê dê neh tòmlơh bol mê in.

⁴ Añ neh jào bol mê in pơnah sre brê jơi bơtiàn bol mê in jơh ală lơgar gam wơl, bal mơ ală lơgar añ neh tòmpìt ai bơh di hiòng Jordan tus hơ Dàlềng Dờng đah mattơngai mut.

⁵ Să tòm Jehôwa Yàng Tom Trồ bol mê dê rơp chồl tơlik bol khai bơh di đap bol mê, mơ bơtrơh bol khai bơh di đap mat bol mê; mơ bol mê rơp dòp lơgar bol khai dê lơh gơs phan tòm jat be Jehôwa Yàng Tom Trồ bol mê dê neh ho mơ bol mê.

⁶ Gen tàng kơ̆ nùs tĕ sền sơwì mơ dòn bơr lơh jat jơh ală bơta neh cih tòm Sră Bơta Boh lam Môise dê, bañ wèt đah ma hala đah kiau.

⁷ Bañ tòmbơcă bal mơ ală làng bol gam wơl ơm digùl bol mê, bañ kơlôi tus di ală yàng bol khai dê hala ai sơnđan ală yàng hơ̆ mơ srat să tòmho. Bol mê bañ duh broă bol gơ hala cùn khoai di đap bol gơ;

⁸ mơya bol mê pal đềt mềr mơ Jehôwa Yàng Tom Trồ bol mê dê kung be bol mê neh lơh tus di ngai do.

⁹ Bơh Yàng Jehôwa neh ting bơtrơh bơh di đap bol mê ală làng bol dờng mơ pràn kơldang, ò gơs cau lơi rgơi ntào jai di đap bol mê jơl tus ngai do.

¹⁰ Dô nă tòm bol mê ting bơtrơh dô rbô nă, tài bơh Jehôwa Yàng Tom Trồ bol mê dê tòmlơh bol mê in tòm toh be jơnau Kơnràñ neh ho pơgon mơ bol mê.

¹¹ Gen tàng, kơrhia tĕ nàng kòñ gơboh di Jehôwa Yàng Tom Trồ bol mê dê.

¹² Mơya dilah bol mê wèt wơl mơ lơh gơtòmsòr bal mơ ală làng bol do gam kis mơ ơm digùl bol mê, mơ dilah bol mê lap klau tòmbau ùr mơ bol khai mơ lơh gơs dô bă bal mơ bol khai,

¹³ gen bol mê rơp git nền lah Jehôwa Yàng Tom Trồ bol mê dê rơp ò tai ting bơtrơh ală làng bol do bơh di đap bol mê; mơya bol khai rơp kung be dă pơt mơ bơtơng dang kup bol mê, kung be gai pù di ngkòi bol mê, mơ kung be lò tòm gar mat bol mê, jơl tus di tŭ bol mê gơkòl tơnroh bơh di lơgar hàng mơnĕ do mơ Jehôwa Yàng Tom Trồ bol mê dê neh ai bol mê in.

¹⁴ Tŭ do añ rơp lòt gùng mơ jơh dunnia pal lòt. Bol mê git tòm nùs tòm hwềng bol mê dê, tòm jơh ală jơnau ho pơgon niam mơ Jehôwa Yàng Tom Trồ bol mê dê neh ai bol mê in, ò gơs dô jơnau lơi ò gơlik tòm toh. Kòp jơnau ho pơgon neh gơlik di ngan bol mê in, ò gơs jơnau lơi ò gơlik tòm toh.

¹⁵ Mơya kung be kòp jơnau ho pơgon niam Jehôwa Yàng Tom Trồ bol mê dê neh gơlik di ngan bol mê in, gen Yàng Jehôwa kung rơp tơndùh hơđang bol mê jơh ală bơta iơh mơ Kơnràñ neh đơs pơhìn bol mê, jơl tus di tŭ Kơnràñ neh tơnroh bol mê bơh di lơgar niam do mơ Jehôwa Yàng Tom Trồ bol mê dê neh ai bol mê in.

¹⁶ Dilah bol mê lơh tìs mơ bơta ho bal Jehôwa Yàng Tom Trồ bol mê dê mơ Kơnràñ neh ai jơnau gơnoar sồr bol mê in, mơ lòt duh broă ală yàng ndai mơ cùn khoai di đap bol gơ, gen bơta gơjrañ dờng Yàng Jehôwa dê rơp gơhào khuh di bol mê, mơ bol mê rơp gơkòl tơnroh mhar bơh di lơgar niam mơnĕ mơ Kơnràñ neh ai bol mê in.”