Jôsue 20 - Sră Goh 2018

Ală ƀòn kìng crŭ

¹ Yàng Jehôwa đơs mơ Jôsue lah:

² “Sồr tĕ làng bol Israel lơh nền sac rwah ală ƀòn kìng crŭ jat be Añ neh kơnòm di Môise sồr mê,

³ nàng dilah gơs cau lơi gơtup gơtơl tơnchơt cau ò di bơh nùs khai kòñ, gen cau hơ̆ rgơi ntoat dô ơm tềng hơ̆ mơ geh sền gàr klàs bơh di cau sal tê mhàm dê.

⁴ Tòm tŭ khai ntoat dô tus hơ dô nơm tòm ală ƀòn hơ̆, khai ntào di mpồng ƀòn mơ yal wơl bơta neh gơlik gơs hơ̆ ală cau kwang kra at bồ ƀòn hơ̆ in. Gen ală cau kwang kra hơ̆ rơp cèng khai mut tòm ƀòn, mơ rơp ai khai in dô bă tiah nàng kis digùl bol khai.

⁵ Dilah cau sal tê mhàm dê ting jat khai, gen ală cau kwang kra bañ jào cau tơnchơt cau hơ̆ tài bơh khai neh tơnchơt cau gơp ƀòn khai, ò di la bơh khai kòñ tơnchơt, mơ bơh lài kung ò gơs bơta gơjrañ mañ di cau hơ̆.

⁶ Khai pal ơm tòm ƀòn hơ̆ jơl tus di tŭ kong cahrña di đap mpồl jơnum, mơ jơl tus di tŭ chơt cau gơnoar dờng lam bồ ơn phan duh khoai tòm tŭ hơ̆. Tơnơ̆ mơ hơ̆, gen cau hơ̆ rơp rê wơl hơ hìu tòm khai dê tòm ƀòn mơ khai lơh gơlik bơta hơ̆.”

⁷ Behơ̆, làng bol Israel ơn is ƀòn Kades tòm Galile tòm tiah mơnơm Neptali, Sicem tòm tiah mơnơm Epraim, mơ Kiriat Arba (hơ̆ la Hebrôn) tòm ù tiah kơh mơnơm Juda.

⁸ Đah mattơngai lik hiòng Jordan ƀòn Jerikô dê, bol khai lơh nền sac rwah ƀòn Bejer tòm ƀlàng ngềt ngơt tòm tiah jơnhoa gơrê bal mơ jơi bơtiàn Ruben; ƀòn Ramôs tòm Galaat tòm jơi bơtiàn Gat mơ Gôlan tòm Basan gơrê mơ jơi bơtiàn Manase.

⁹ Hơ̆ la ală ƀòn lơh nền sac rwah jơh ală làng bol Israel in, bal mơ ală cau nac ơm ing digùl bol khai, nàng tòm tŭ gơs cau lơi gơtup gơtơl tơnchơt cau gen khai rgơi dô ơm tềng hơ̆, tồ klàs di cau sal tê mhàm dê, lài mơ tŭ khai kong cahrña di đap mpồl jơnum.