Jôsue 16 - Sră Goh 2018

Pơnah sre brê Epraim mơ Manase dê

¹ Pơnah sre brê tòmpà jơi bơtiàn Jôsep in gơ lòt bơh hiòng Jordan rềp di Jerikô, đah mattơngai lik ală dà Jerikô dê, guh bơh Jerikô mut tòm ƀlàng ngềt ngơt tus hơ tiah lơgar kơh mơnơm Betel dê.

² Bơh Betel lòt hơ Lus, lòt tơn hơ Atarôt ù tiah làng bol Arkit dê;

³ bơh tềng hơ̆ gơ mù đah mattơngai mut tus hơ ù tiah làng bol Japlet, tus di kơnhwàl đah đơm Bet Hôrôn, gen lòt tus hơ Gejer, mơ lồi di dàlềng.

⁴ Behơ̆ jơi bơtiàn Jôsep la Manase mơ Epraim dòp geh sre brê bol khai dê.

⁵ Ù tiah Epraim di jat kòp mpồl jơi bơtiàn bol khai dê be do: Nhàr sre brê bol khai dê gơ lòt bơh Atarôt Adar đah mattơngai lik tus hơ Bet Hôrôn Đah Đang,

⁶ mơ nhàr gơ lòt tơn tus hơ dàlềng. Bơh Mikmethat đah đang, nhàr đah mattơngai lik tus hơ Thaanat Silô, mơ lòt gan tus hơ Janôah đah mattơngai lik.

⁷ Gen gơ mù bơh Janôah tus hơ Atarôt mơ Naarah, tìp Jerikô mơ lồi di hiòng Jordan.

⁸ Bơh Tappuah nhàr lơgar gơ lòt đah mattơngai mut tus hơ croh dà Kanah, mơ lồi di dàlềng. Hơ̆ la sre brê jơi bơtiàn Epraim dê jat be kòp mpồl hìu nhă bol khai dê.

⁹ Bal mơ ală ƀòn dờng la pơnah neh lòi is jơi bơtiàn Epraim in ơm digùl sre brê jơi bơtiàn Manase dê, jơh ală ƀòn dờng bal mơ ală ƀòn dềt gơ dê.

¹⁰ Bol khai ò ting bơtrơh làng bol Kanaan ơm tòm Gejer: gen tàng làng bol Kanaan gam ơm digùl làng bol Epraim jơl tus ngai do; mơya bol khai pal kong duh broă bòl glar.