Jôsue 14 - Sră Goh 2018

Tòmpà ù tiah đah mattơngai mut hiòng Jordan

¹ Do la sre brê mơ làng bol Israel neh dòp geh tòm lơgar Kanaan mơ Eleajar cau gơnoar ơn phan duh khoai, Jôsue kòn klau Nun, bal mơ ală cau kwang at bồ ală mpồl hìu nhă tòm jơi bơtiàn Israel dê neh tòmpà bol khai in.

² Sre brê bol khai dê neh geh tă khà jat be Yàng Jehôwa neh sồr Môise ai sin jơi bơtiàn mơ nggùl in.

³ Bơh Môise neh ai bàr jơi bơtiàn mơ nggùl in sre brê đah ne hiòng Jordan; mơya gơwèt mơ cau Lebi gen Môise ò ai sre brê bol khai in.

⁴ Bơh jơi bơtiàn Jôsep gơs bàr jơi bơtiàn la Manase mơ Epraim; mơ cau Lebi ò geh pơnah sre brê tòm lơgar, mìng geh ală ƀòn dờng nàng ơm, bal mơ ƀlàng ñhơt ală mpồl belàt mơ phan poan jơng bol khai dê.

⁵ Behơ̆ làng bol Israel tòmpà lơgar jat be jơnau Yàng Jehôwa neh sồr Môise.

Kalep dòp geh Hebrôn

⁶ Tŭ hơ̆ cau Juda tus hơ Jôsue tòm Gilgal, mơ Kalep kòn klau Jephune la cau Kenit, đơs mơ khai lah: “Ồng git ñchi jơnau Yàng Jehôwa neh đơs mơ Môise la cau Yàng Tom Trồ dê tòm Kades Barnea bơh añ mơ ồng.

⁷ Añ neh poan jơt nam tòm tŭ Môise cau duh broă Yàng Jehôwa dê sồr añ lòt bơh Kades Barnea nàng sền òm lơgar. Añ neh cèng khai in dô jơnau yal broă niam song ngan.

⁸ Mơya tòm mpồl añ jê la ală cau neh guh bal mơ añ neh lơh làng bol in gơplơ̆ nùs; bulah behơ̆, añ lòt jat Jehôwa Yàng Tom Trồ añ jê dô bă jơh nùs.

⁹ Tòm ngai hơ̆ Môise srat să mơ ho nền lah: ‘Ngan, ù tiah jơng mê neh jă rơp la sre brê mê dê bal mơ kòn sau mê dê gam sùm sùm, tài bơh mê neh jơh nùs dòn song jat Jehôwa Yàng Tom Trồ añ jê.’

¹⁰ Behơ̆ tŭ do, be ồng neh gŏ, Yàng Jehôwa neh sền gàr bơta kis añ jê, be jơnau Kơnràñ neh đơs, neh poan jơt pram nam bơh di tŭ Yàng Jehôwa neh đơs jơnau do mơ Môise, tòm tŭ Israel lòt tòm ƀlàng ngềt ngơt; mơ tềng do, ngai do añ neh phàm jơt pram nam.

¹¹ Ngai do añ gam pràn kơldang kung be tòm ngai Môise neh sồr añ lòt, bơta pràn añ gơs tŭ do la kung be bơta pràn añ neh gơs tŭ hơ̆, nàng lòt tòmlơh, mơ nàng lòt mơ rê wơl.

¹² Behơ̆, ai tĕ añ in tiah kơh mơnơm do mơ Yàng Jehôwa neh ho mơ añ tòm ngai hơ̆; bơh ồng neh kơno tòm ngai hơ̆ mbe cau Anakim neh ơm tềng hơ̆ mơ ală ƀòn dờng kơ̆ cê bol khai dê, hơ̆ digơlan Yàng Jehôwa neh ơm bal mơ añ, mơ añ rơp bơtrơh tơlik bol khai, be Yàng Jehôwa neh đơs.”

¹³ Gen Jôsue ai lơngai khai in, mơ ai tiah Hebrôn Kalep kòn klau Jephune in, lơh gơs sre brê.

¹⁴ Behơ̆ Hebrôn gơlik gơs sre brê Kalep kòn klau Jephune cau Kenit dê bơh di ngai hơ̆, tài bơh khai neh jơh nùs jat Jehôwa Yàng Tom Trồ Israel dê.

¹⁵ Lài òr cau sơnđan Hebrôn la Kiriat Arba; Arba do la cau dờng màng rlau jơh tòm làng bol Anakim. Behơ̆ lơgar ơm rlô bơh bơta kơlìn gơtoă.