Jôsue 13 - Sră Goh 2018

Bơta tòmpà lơgar Kanaan ( 13:1 – 24:33 ) Ală kơnhwàl lơgar òhềt tòmpìt

¹ Tòm tŭ Jôsue neh kra gen Yàng Jehôwa đơs mơ khai lah: “Mê neh să kra sơnam jòng mơ gam oă ù tiah pal tòmpìt lơh gơs sre brê.

² Do la ù tiah gam òhềt tòmpìt ai: jơh dô kơnhwàl lơgar làng bol Philistin mơ làng bol Gesurit.

³ Bơh hiòng Sihor đah mattơngai lik lơgar Ejiptơ tus di nhàr đah đang Ekrôn dê, jơh ù tiah hơ̆ la gơrê bal mơ làng bol Kanaan (gơs pram nă bơtau at bồ làng bol Philistin dê, hơ̆ la bơtau Gaja, Asdôt, Askalôn, Gat, mơ Ekrôn la ù tiah làng bol Abim dê),

⁴ đah đơm jơh lơgar làng bol Kanaan dê, mơ Mearah gơrê bal mơ làng bol Sidôn tus hơ Aphek tus hơ nhàr làng bol Amôr dê,

⁵ mơ lơgar làng bol Gebalit, mơ jơh Liban tus hơ đah mattơngai lik, bơh Baal Gat ơm hơđơm mơnơm Hermôn tus di Lebô Hamat,

⁶ jơh ală làng bol ơm tòm tiah lơgar kơh mơnơm bơh Liban tus hơ Misrephôt Maim, bal mơ jơh làng bol Sidôn. Să tòm Añ rơp ting bơtrơh bol khai bơh di đap làng bol Israel; mơ mê tòmpà tĕ ù tiah do làng bol Israel in lơh gơs sre brê jat be Añ neh sồr mê.

⁷ Behơ̆ tŭ do tòmpà tĕ ù tiah do sin jơi bơtiàn in mơ nggùl jơi bơtiàn Manase in nàng lơh gơs sre brê.”

Tòmpà ù tiah đah mattơngai lik hiòng Jordan

⁸ Cau Ruben, cau Gat mơ nggùl jơi bơtiàn Manase dê neh dòp sre brê mơ Môise tòmpà đah mattơngai lik hiòng Jordan jat be Môise cau duh broă Yàng Jehôwa dê neh ai bol khai in.

⁹ Ù tiah hơ̆ gơ lòt bơh Arôer di gah thòng Arnôn, bơh ƀòn dờng hơ̆ ơm digùl thòng, bal mơ jơh tiah kơh mơnơm Medeba tus hơ Dibôn;

¹⁰ mơ jơh ală ƀòn dờng bơtau làng bol Amôr la Sihôn, khai at bồ bơh Hesbôn tus hơ nhàr lơgar làng bol Amôrit dê;

¹¹ mơ Galaat, mơ kơnhwàl làng bol Gesur, mơ làng bol Maakat dê, mơ jơh mơnơm Hermôn, mơ jơh Basan jơl tus hơ Salekah;

¹² hơ̆ la làm jơh lơgar bơtau Ok dê tòm Basan, khai at bồ tòm Astarôt mơ tòm Edrei, dô nă khai la cau lồi dut gam wơl bơh làng bol Rephaim dê. Ală làng bol do Môise neh lơh alah mơ bơtrơh tơlik bol khai.

¹³ Mơya làng bol Israel òhềt bơtrơh làng bol Gesur mơ làng bol Maakat; gen tàng cau Gesur mơ cau Maakat gam ơm digùl cau Israel jơl tus di ngai do.

¹⁴ Gơwèt mơ jơi bơtiàn Lebi gen Môise ò ai sre brê bol khai in; ală phan pơdơng chu duh khoai mơ ồs ơn Jehôwa Yàng Tom Trồ Israel in la sre brê bol khai dê, be Kơnràñ neh đơs mơ bol khai.

Kơnhwàl lơgar cau Ruben dê

¹⁵ Môise neh tòmpà sre brê jơi bơtiàn Ruben in jat kòp mpồl hìu nhă bol khai dê.

¹⁶ Ù tiah bơh Arôer ơm di gah thòng Arnôn, mơ bơh ƀòn dờng hơ̆ ơm digùl thòng bal mơ jơh kơh mơnơm Medeba dê;

¹⁷ bal mơ Hesbôn mơ jơh ală ƀòn dờng gơ ơm tòm tiah kơh mơnơm, tơrgòm bal mơ Dibôn, Bamôt Baal, Bet Baal Meôn,

¹⁸ Jahas, Kedemôt, Mephaat,

¹⁹ Kiriathaim, Sipmah, Jeret Sahar ơm hơđang dòr thòng dê,

²⁰ Bet Pheor, ală tiah mù kơh Pisga, Bet Jesimôt,

²¹ Jơh ală ƀòn dờng tòm tiah kơh mơnơm mơ jơh lơgar bơtau Sihôn la bơtau làng bol Amôr at bồ tòm Hesbôn. Môise neh lơh alah khai bal mơ ală cau at bồ Midian, Ebi, Rekem, Jur, Hur, mơ Reba la ală bơtau lơh gơs dô bă bal mơ Sihôn.

²² Bal mơ ală cau neh kòl làng bol Israel tơnchơt tòm tŭ tòmlơh, gơs Balaam, kòn klau Beô, khai la cau juh proh.

²³ Nhàr ù tiah cau Ruben dê la hiòng Jordan mơ tiah rò gah hiòng. Hơ̆ la sre brê jơi bơtiàn Ruben dê jat hìu nhă bol khai dê bal mơ ală ƀòn dờng mơ ƀòn dềt.

²⁴ Môise neh tòmpà sre brê jơi bơtiàn Gat in jat kòp mpồl hìu nhă bol khai dê.

²⁵ Ù tiah bol khai dê la Jajer, mơ jơh ală ƀòn dờng Galaat, mơ nggùl lơgar làng bol Ammôn jơl tus hơ Arôer hơ đah mattơngai Rabah,

²⁶ mơ bơh Hesbôn tus hơ Ramat Mispa mơ Betônim, mơ bơh Mahanaim tus hơ kơnhwàl lơgar Debir dê;

²⁷ mơ tòm thòng Bet Haram, Bet Nimrah, Sukôt, Japhôn bal mơ tiah gam wơl tòm lơgar bơtau Sihôn tòm Hesbôn dê, hiòng Jordan mơ tiah rò gah hiòng, ngài tus tơn hơ tiah liah lồi dut dàlềng Kineret dê, đah mattơngai lik hiòng Jordan dê.

²⁸ Ală ƀòn dờng do bal mơ ală ƀòn dềt bol gơ dê la sre brê jơi bơtiàn Gat dê, jat kòp mpồl hìu nhă bol khai dê.

Kơnhwàl lơgar nggùl jơi bơtiàn Manase dê

²⁹ Môise neh tòmpà sre brê nggùl jơi bơtiàn Manase in; gơ neh geh jào nggùl jơi bơtiàn kòn sau Manase in jat kòp mpồl hìu nhă bol khai dê.

³⁰ Ù tiah bol khai dê bơh Mahanaim mơ làm jơh Basan, làm jơh lơgar bơtau Ok cau Basan dê, jơh ală tiah bơt ƀòn làng bol Jair dê tòm Basan, prau jơt nơm ƀòn dờng,

³¹ nggùl tiah Galaat mơ Astarôt, mơ Edrei, la ƀòn bơtau Ok tòm Basan. Hơ̆ la ù tiah neh jào cau Makir la kòn klau Manase dê jat kòp mpồl hìu nhă bol khai dê, mơ nggùl cau Makir dê.

³² Hơ̆ la sre brê mơ Môise neh tòmpà tòm tŭ khai ơm tòm ƀlàng Môap, đah ne hiòng Jordan, đah mattơngai lik Jerikô dê.

³³ Mơya gơwèt mơ jơi bơtiàn Lebi gen Môise ò ai sre brê lơi; bơh Jehôwa Yàng Tom Trồ Israel dê la sre brê bol khai dê, jat be Kơnràñ neh ho mơ bol khai.