Jôsue 11 - Sră Goh 2018

Jôsue tòmlơh pha rlau mơ ală cau bơtau đah đang

¹ Tòm tŭ Jabin la bơtau Hajor kơno bơh bơta do, gen khai pơyoa jơnau tus hơ Jôbap la bơtau Madôn dê, hơ ală bơtau Simrôn mơ Aksap dê,

² mơ tus hơ ală bơtau ơm đah đang lơgar kơh mơnơm, tòm Arabah đah đơm Kineret, ơm di jơng mơnơm đah mattơngai mut mơ ơm tòm Naphôt Dôr đah mattơngai mut,

³ tus hơ làng bol Kanaan ơm đah mattơngai lik mơ đah mattơngai mut, tus hơ ală làng bol Amôrit, Hetit, Pherijit mơ Jebusit ơm tòm lơgar kơh mơnơm, hơ làng bol Hebit ơm di jơng mơnơm Hermôn tòm kơnhwàl lơgar Mispa.

⁴ Bol khai lik lòt bal mơ jơh ală mpồl ling dờng bol khai dê, khà gal ngan be bràs di gah dàlềng, bal mơ oă ngan ơseh mơ rơndeh lòs tòmlơh.

⁵ Jơh ală bơtau do pơjum dô bă bal jơh ală mpồl ling bol khai dê mơ lơh sàl bal di gah dà Merôm, nàng tòmlơh mơ Israel.

⁶ Yàng Jehôwa đơs mơ Jôsue lah: “Bañ rngòt di bol khai bơh di jơ do ngai hìng, Añ rơp jào phi jơh bol khai tòm tê Israel dê nàng tơnchơt; mê rơp koh kơjòn ală ơseh bol khai dê, mơ chu ală rơndeh lòs tòmlơh bol khai dê tòm ồs.”

⁷ Gen Jôsue mơ jơh dô mpồl ling khai dê nisơna tus hơ bol khai di gah dà Merôm mơ brồ lơh bol khai.

⁸ Mơ Yàng Jehôwa jào phi bol khai tòm tê Israel. Israel lơh bol hơ̆ mơ ting jat bol khai tus di lồi gùng lòt hơ Sidôn Dờng, mơ Misrephôt Maim, mơ hơ thòng Mispa tòm đah mattơngai lik, bol khai tơnchơt jơh ò lòi dô nă lơi gam kis.

⁹ Jôsue lơh di bol khai jat be jơnau Yàng Tom Trồ neh sồr khai lơh; khai koh kơjòn ală ơseh bol hơ̆ dê mơ chu ală rơndeh lòs tòmlơh bol khai dê tòm ồs.

¹⁰ Tŭ hơ̆ Jôsue rê wơl tòmpìt ai ƀòn Hajor mơ ai đào tơnchơt bơtau gơ dê; Bơh lài Hajor la bồ hơđang jơh ală lơgar bơtau ne.

¹¹ Bol khai ai đào tơnchơt jơh ală cau ơm tòm hơ̆, ò lòi dô nơm phan tă nhơm lơi gam kis, mơ khai chu ƀòn Hajor mơ ồs.

¹² Mơ jơh ală ƀòn dờng ală bơtau hơ̆ dê, bal mơ ală cau bơtau bol gơ dê. Jôsue tòmpìt ai ƀòn, ngui đào tơnchơt jơh jat be Môise la cau duh broă Yàng Jehôwa dê neh sồr.

¹³ Mơya cau Israel ò chu ƀòn dờng lơi ơm hơđang ală mơnơm, mìng Hajor lơm; Jôsue neh chu ƀòn hơ̆.

¹⁴ Ală phan tòmpìt geh bal mơ jơh ală phan poan jơng ală ƀòn hơ̆ di cau Israel lơh gơs phà kup bol khai dê; mơya jơh ală làng bol, gen bol khai tơnchơt mơ đào, ò lòi dô nơm phan tă nhơm lơi gam kis.

¹⁵ Be Yàng Jehôwa neh sồr Môise la cau duh broă Kơnràñ dê, gen Môise kung neh sồr Jôsue behơ̆ sơl, mơ Jôsue neh lơh jat jơh; tòm jơh ală jơnau sồr mơ Yàng Jehôwa neh sồr Môise, gen Jôsue ò sang lòi dô jơnau lơi.

¹⁶ Behơ̆ Jôsue tòmpìt ai jơh lơgar hơ̆, lơgar kơh mơnơm, tiah Negep, jơh ù tiah Gôsen, ală tiah jơng mơnơm, Arabah mơ tiah lơgar kơh mơnơm Israel dê mơ ală tiah liah gơ dê,

¹⁷ bơh mơnơm Halak guh hơ đah Seir, tus hơ Baal Gat tòm thòng Liban di jơng mơnơm Hermôn. Khai kup jơh ală bơtau bol gơ dê pòng lơh mơ tơnchơt jơh bol khai.

¹⁸ Jôsue tòmlơh mơ ală bơtau hơ̆ tòm jŏ ngai.

¹⁹ Ò gơs ƀòn lơi lơh bơta tòmho ring lơngai mơ cau Israel, mìng cau Hibit, la cau ơm tòm Gabaôn. Jơh ală tiah hơ̆ neh tòmpìt geh tòm bơta tòmlơh.

²⁰ Bơh Yàng Jehôwa neh lơh bol khai in kơldang nùs, nàng bol khai tus tòmdră mơ Israel tòm bơta lơh kơlìn, tồ bol khai pal kong tơnroh jơh, mơ ò rgơi dòp bơta nđàc; mơya pal tơnroh jơh jat be Yàng Jehôwa neh sồr Môise.

²¹ Tòm tŭ hơ̆ Jôsue lòt tơnroh cau Anak ơm tiah lơgar kơh mơnơm, bơh Hebrôn, Debir, mơ Anap, bơh jơh ală tiah kơh mơnơm Juda dê, mơ bơh jơh ală tiah kơh mơnơm Israel dê. Jôsue tơnroh bol khai jơh hir bal mơ ală ƀòn dờng bol khai dê.

²² Ò gơs dô nă cau Anak lơi gam tòm lơgar cau Israel dê, mìng gam tòm Gaja, tòm Gat mơ tòm Asdôt.

²³ Behơ̆ Jôsue tòmpìt ai jơh lơgar jat be jơh ală jơnau Yàng Jehôwa neh đơs mơ Môise, mơ ai lơgar hơ̆ Israel in lơh gơs sre brê jat be bơta tă khà ală jơi bơtiàn bol khai dê. Mơ lơgar ơm rlô bơh bơta kơlìn.