Jôna 2 - Sră Goh 2018

Jơnau hòi dan Jôna dê

¹ Mơya Yàng Jehôwa rcang gơs dô nơm ka dờng nàng loan Jôna; mơ Jôna ơm tòm kơndul ka pe ngai pe mang.

² Bơh tòm kơndul ka Jôna neh hòi dan mơ Jehôwa Yàng Tom Trồ khai dê.

³ Khai đơs lah: “Tòm bơta rung rài añ jê, añ hòi dan mơ Yàng Jehôwa, Mơ Kơnràñ neh ho wơl añ in. Bơh tòm kơndul lơgar làng ƀồc dê, añ hòi dan mơ Yàng, mơ Kơnràñ neh kơno jơnau añ jê.

⁴ Kơnràñ neh sơrbì añ tòm tiah jrô, mut tòm nùs ală dàlềng dê, mơ dà tih ngŏ gùt dar añ; jơh ală ryà dà mơ dà har Kơnràñ dê sơrlèt rlau hơđang añ.

⁵ Gen añ neh đơs lah: ‘Añ neh kòl sơrbì ngài bơh di đap mat Kơnràñ; Mbe añ rgơi tơnggòr sền tai hơ Hìu Duh Khoai Sàng Goh Kơnràñ dê taih?’

⁶ Dà til wơl hơđang añ; tiah jrô gơrwàng gùt dar añ, ală bùi war gùt dar bồ añ

⁷ tus di ryas ală mơnơm dê. Ù tiah neh til krơ̆ hơđang añ jơl sùm sùm. Mơya, ơ Jehôwa Yàng Tom Trồ añ jê, Kơnràñ neh cèng tơngguh bơta kis añ bơh di trồm jrô.

⁸ Gơlơh be bơta kis añ jê neh gơ mù jrô, gen añ kah wơl Yàng Jehôwa, mơ jơnau hòi dan añ jê neh guh tus hơ Kơnràñ, tòm Hìu Duh Khoai Sàng Goh Kơnràñ dê.

⁹ Ală cau duh khoai ală yàng rùp ràk ò kwơ, sang lòi bơta dòn song song ngan bol khai dê.

¹⁰ Mơya añ bal mơ jơnau ưnngài lơh gơs phan ơn duh khoai Kơnràñ in. Añ rơp tơm wơl bơta añ neh ho pơgon. Bơta dong tă gơrê bal mơ Yàng Jehôwa!”

¹¹ Gen Yàng Jehôwa đơs mơ ka mơ gơ neh hă Jôna hơđang ù rañ rsơh.