Jôel 3 - Sră Goh 2018

Bơta cahrña ală lơgar

¹ “Behơ̆ gen, tòm ală ngai hơ̆ mơ tòm tŭ hơ̆, Añ rơp cèng brê wơl ală cau gơkòl kup cèng Juda mơ Jerusalem dê,

² Añ rơp pơjum bal jơh ală làng bol, mơ cèng bol khai mù tòm thòng Jehôsaphat, Añ rơp cahrña bol khai tềng hơ̆, sơwì làng bol Añ jê mơ sre brê Añ jê cau Israel, tài bơh bol khai neh lơh nrah nring làng bol Israel digùl ală lơgar. Bol khai neh tòmpà ù tiah Añ jê,

³ mơ tă khà di làng bol Añ jê mơ neh tòmgơl ală kòn klau nàng ai ală cau ùr dri; bol khai neh tac ală kòn ùr mơ blơi alak nàng ñô.

⁴ Ơ Tirơ mơ Sidôn, mơ jơh ală kơnhwàl lơgar Philistin dê, ñchi bơta bol mê tơm wơl Añ in taih? Bol mê kòñ sal wơl di Añ bơh ală broă Añ neh lơh ơ? Dilah bol mê sal wơl di Añ, Añ rơp sơrbac sơrbang mơ mhar tuh wơl hơđang bồ bol mê ală bơta bol mê neh lơh.

⁵ Bơh bol mê neh ai priă mơ ai màh Añ jê, neh cèng phan kas màng Añ jê tơmut tòm ală hìu bơmồng bol mê dê.

⁶ Bơh bol mê neh tac làng bol Juda mơ Jerusalem di ală cau Grek, mơ ntròn bol khai ngài bơh di nhàr lơgar tòm bol khai dê.

⁷ Mơya Añ rơp tơngguh bol khai bơh di tiah bol mê neh tac bol khai, mơ Añ rơp tuh wơl hơđang bồ bol mê dê ală bơta bol mê neh lơh.

⁸ Añ rơp tac ală kòn klau mơ ală kòn ùr bol mê dê ală cau Juda in, mơ ală cau Juda rơp tac bol khai cau Seba in, la làng bol ơm tòm tiah ngài ngan.” Yàng Jehôwa neh đơs behơ̆.

Bơta cahrña tòm thòng Jehôsaphat

⁹ Yal tơnggit tĕ bơta do digùl ală làng bol: Rcang tĕ bơta kơlìn! Chồl bơtrut tĕ ală ling jak tòmlơh! Lòi tĕ jơh ală cau ling tus rềp mơ tòmlơh!

¹⁰ Ai tĕ sề ngal bol mê dê nàng tiar đào, ai tĕ mơ̆ bol mê dê nàng tiar tà. Lòi tĕ cau lơbơn lơño đơs lah: “Añ la dô nă cau jak tòmlơh!”

¹¹ Tus tĕ mhar, jơh ală làng bol gùt dar, mơ pơjum bal tĕ tềng hơ̆. Khoai Yàng Jehôwa, dan cèng tus ală cau ling tòmlơh Kơnràñ dê!

¹² Lòi tĕ ală làng bol ñă ntào, lòi tĕ bol khai lòt tus tòm thòng Jehôsaphat, bơh tềng hơ̆ Añ rơp nggui nàng cahrña jơh ală làng bol ơm gùt dar.

¹³ Ơn tĕ mơ̆, bơh kơnhai toès neh tus. Tus tĕ pat plai ño, bơh mpal pat tơrnòm neh bềng, mơ ală thùng dờng neh bềng, bơh bơta iơh bơsak bol khai dê dờng ngan.

¹⁴ Oă ngan làng bol, oă ngan làng bol tòm thòng bơta lơh nền! Bơh ngai Yàng Jehôwa neh tus rềp tòm thòng bơta lơh nền.

¹⁵ Mattơngai mơ mat kơnhai rơp gơlik klam jơngo, ală sơmañ ruc wơl bơta àng gơ dê.

¹⁶ Yàng Jehôwa rơp ơluh ơhùm bơh Siôn; mơ lơh gơlik ntas sap Kơnràñ dê bơh Jerusalem; plai ù mơ ală tap trồ gơlơnggơr. Mơya Yàng Jehôwa la tiah kìng crŭ làng bol Kơnràñ dê, la theng kơ̆ cê làng bol Israel in.

Bơta lơngai lơngò làng bol Yàng Tom Trồ dê

¹⁷ Behơ̆, bol mê rơp git Añ la Jehôwa Yàng Tom Trồ bol mê dê, ơm tòm Siôn, mơnơm sàng goh Añ jê. Jerusalem rơp gơlik gơs sàng goh, làng bol rơp ò gơs tŭ lơi tòmpìt gơ tai.

¹⁸ Tòm ngai hơ̆, ală mơnơm rơp gơhòr tơrnòm lơngồt, mơ ală dòr rơp gơcat dà toh; jơh ală croh Juda dê rơp gơhòr dà. Dô nơm croh dà rơp hòr lik bơh di hìu Yàng Jehôwa dê mơ tuh làm tòm Thòng Sitim.

¹⁹ Mơya Ejiptơ rơp gơlik gơs tiah sang lòi ngềt ngơt, Edôm rơp gơlik gơs ƀlàng ngềt ngơt srau gòi, tài bơh bol khai lơh bơta iơh bơsak gơwèt hơ làng bol Juda mơ lơh gơtuh mhàm ò gơs glài tòm ù tiah hơ̆.

²⁰ Mơya Juda rơp gơs cau ơm gam sùm sùm mơ Jerusalem rơp gam tus jơl jơh ală rài.

²¹ Añ rơp sal wơl mhàm bol khai dê, mơ Añ rơp ò jùt glài iơh bơsak bol khai dê. Bơh Yàng Jehôwa ơm sùm tòm Siôn!