Jôel 2 - Sră Goh 2018

Tềl sơnio ngai Yàng Jehôwa dê tus rềp

¹ Uh tĕ kơlwòk tòm Siôn; ntas jơnau yal tơnggit hơđang mơnơm sàng goh Añ jê. Lòi jơh làng bol tòm lơgar rơm să, bơh ngai Yàng Jehôwa dê mòr tus, ngai hơ̆ neh tus rềp rau.

² Dô ngai klam jơngo, mơ ngềt ngơt, dô ngai bềng mhwal mơ jơngo cik. Be bơta jơngo jù cik gòm hơđang ală mơnơm, dô mpồl ling dờng mơ pràn kơldang lòt tus; bơta behơ̆ bơh rài yau òhềt tŭ lơi gơs, mơ kung rơp ò tŭ lơi gơs behơ̆ tòm rài tơnơ̆ rơp tus sơl.

³ Ồs sa loan di đap bol khai, đah ngkòi bol khai gơs lơmpiat ồs chu pơrguc. Di đap bol khai ù tiah kung be suơn Eden, đah ngkòi bol khai dô nơm ƀlàng ngềt ngơt srau gòi, ò gơs phan lơi klàs bơh gơ.

Srah nting sa tơnroh

⁴ Bol gơ gơs rùp să kung be ală ơseh; mơ kung be mpồl ling hào ơseh tòmlơh.

⁵ Bol gơ ntoat be rơndeh ơseh sơnđoh hơđang ală bồ mơnơm, gơs sap be ntas ồs sa rhe, kung be mpồl ling pràn kơldang brồ tus tòm tiah tòmlơh.

⁶ Di đap bol gơ làng bol dơrcul rngòt, muh mat jơh kòp nă gơlik pàl.

⁷ Bol gơ brồ tus hơđap kung be ală cau ling tòmlơh: hào hơđang ală dơrñang kung be ală cau ling jak, kòp nă ntoat song jat gùng he, ò tŭ lơi tìs bơh gùng.

⁸ Bol gơ ò tòmchồl di gơp, kòp nơm lòt song hơđap. Bol gơ sơrlèt rlau di ală phan tòmlơh, mơ ò sang lòi mpồl he dê.

⁹ Bol gơ brồ tus hơđang ƀòn dờng, ntoat hơđang ală dơrñang, bol gơhào mut tòm ală hìu, bol gơ mut bơh di mpồng dềt kung be ală cau kơñau.

¹⁰ Ù gơlơnggơr di đap bol gơ, ală tap trồ wañ lơnggơh, mattơngai mơ mat kơnhai gơlik klam jơngo, ală sơmañ ò àng tai.

¹¹ Yàng Jehôwa lơh gơlik sap Kơnràñ dê di đap mpồl ling Kơnràñ dê, mpồl ling Kơnràñ dê la gal ngan ò rgơi kòp, mơ ală cau lơh jat jơnau sồr Kơnràñ dê ò rgơi kòp. Ngan, ngai Yàng Jehôwa dê la dờng ngan mơ kìr rngòt ngan, Ñcau rgơi kong jai taih?

Hòi jà làng bol gơjrañ sang glài

¹² Yàng Jehôwa đơs: “Tŭ do, jơh nùs tĕ rê wơl hơ Añ, ơt sa, ñìm rac mơ moat jrùng.

¹³ Crè tĕ nùs bol mê, bañ crè ào bol mê dê. Rê wơl tĕ hơ Jehôwa Yàng Tom Trồ bol mê dê; bơh Kơnràñ la kòñ nđàc mơ nđàc sơngit, òbat gơjrañ mơ bềng bơta kòñ gơboh kơ̆ dơn, tơnruc nùs ò đùh bơta rung rài.

¹⁴ Ñcau rgơi git lah Kơnràñ rơp ò pơrlac mơ tơnruc nùs, mơ lòi dô bơta lơngai di ngkòi Kơnràñ, nàng bol mê ơn dô nơm phan ơn duh khoai mơ kòi mbo mơ ală phan ơn hùc, Jehôwa Yàng Tom Trồ bol mê in, taih?”

¹⁵ Uh tĕ kơlwòk tòm Siôn, yal tơnggit tĕ bơta ơt sa sàng goh, hòi jà tĕ dô bơta pơjum dờng màng.

¹⁶ Pơjum tĕ làng bol, ơn is tĕ mpồl jơnum; jà tĕ ală cau kwang kra pơjum bal, pơjum tĕ ală kòn dềt, la ală kòn gam pô toh. Lòi cau bơrtơu pa lik bơh di ơdŭ khai dê, mơ cau ƀan pa lik bơh di ơdŭ bic khai dê.

¹⁷ Ală cau gơnoar ơn phan duh khoai, la ală cau duh broă di đap Yàng Jehôwa, ñìm rac digùl mpồng hìu duh khoai mơ cơnòng duh khoai, mơ đơs lah: “Ơ Yàng Jehôwa, dan pơlai tĕ làng bol Kơnràñ dê, dan bañ lòi sre brê Kơnràñ dê kong cau sền òsơp, mơ kong ală lơgar ndai dơñŏ tơnhial. Ñchi bơh tài bol khai rgơi đơs digùl ală làng bol lah: ‘Ntềng đah Yàng Tom Trồ bol khai dê taih?’”

Bơta toh glài mơ jơnau ho pơgon ( 2:18 – 3:21 ) Jơnau ho bơh bơta bơt bơtào wơl

¹⁸ Gen Yàng Jehôwa gơlik bơta ƀoah pơrñat bơh lơgar Kơnràñ dê; Kơnràñ ai nùs nđàc sơngit di làng bol Kơnràñ dê.

¹⁹ Yàng Jehôwa rơp ho wơl mơ bol khai lah: “Do, Añ rơp ai bol mê in: kòi mbo, tơrnòm pa, mơ mơñà, tơl nàng bol mê in geh hòm lai wil tơl; mơ Añ ò tai lơh bol mê in gơlik gơs dô jơnau cau dơñŏ tơnhial digùl ală làng bol.

²⁰ Añ rơp lơh mpồl ling tus bơh đah đang pleh ngài bơh di bol mê, bơtrơh bol khai tus tòm tiah ro rañ ò rgơi tùc tam, bơh hơđap bol khai mut tòm dàlềng đah mattơngai lik, mơ đah ngkòi mut tòm dàlềng đah mattơngai mut. Ƀô ồm bol khai dê gơ par mơ ƀô ngir bol khai dê gơguh hơđang.” Ngan, Kơnràñ neh lơh ală broă dờng.

²¹ Ơ ù tiah, bañ rngòt; chò hòp mơ hòn chò tĕ. Bơh Yàng Jehôwa neh lơh ală broă dờng.

²² Ơ ală jơi phan poan jơng tòm ƀlàng, bañ rngòt; bơh ală ƀlàng ñhơt tòm brê neh gơlik tơlir, ală chi gơlik plai, chi ƀal mơ tòm ño gơlik cồng nha niam.

²³ Ơ làng bol Siôn, hòn chò mơ chò hòp tĕ tòm Jehôwa Yàng Tom Trồ bol mê dê; bơh Kơnràñ neh ai bol mê in mìu gòñ bồ sơnam bol mê in, Kơnràñ tuh mìu lìu làc bol mê in, mìu bồ sơnam mơ lồi sơnam, jat bơta kơ̆ dơn Kơnràñ dê, tơndùh bol mê in be lài.

²⁴ Ală làn kòi rơp bềng lìu kòi, ală yang dờng rơp bềng lìu tơrnòm mơ mơñà.

²⁵ Añ rơp tơm wơl bol mê in bơh ală sơnam neh kong srah nting sa roh, srah nting dờng, srah nting dềt, srah nting ndai la mpồl ling dờng mơ Añ neh sồr tus digùl bol mê.

²⁶ Bol mê rơp sa tòm bơta tơngkah tơngkañ mơ geh hòm lai, mơ bol mê rơp jòng ro sơnđan Jehôwa Yàng Tom Trồ bol mê dê, La Bơtau neh lơh ală bơta crih crài bol mê in; Làng bol Añ jê rơp ò gơs tŭ lơi kong ƀàssìl tai.

²⁷ Gen bol mê rơp git lah Añ ơm digùl Israel, Mơ git Añ la Jehôwa Yàng Tom Trồ bol mê dê, mơ ò gơs bơtau lơi ndai tai rlau mơ Añ; làng bol Añ jê rơp ò gơs tŭ lơi kong ƀàssìl tai.

Jơnau ho ai Yàng Hwềng Goh

²⁸ Tơnơ̆ mơ hơ̆, Añ rơp tuh Hwềng Añ hơđang jơh ală poac să. Kòn klau mơ kòn ùr bol mê dê rơp đơs hwơr, Ală cau kra bol mê dê rơp gŏ bơta mpau, ală cau pơnu bol mê rơp gŏ bơta gơtơnggŏ.

²⁹ Tòm ală ngai hơ̆, Añ kung rơp tuh Hwềng Añ hơđang ală cau duh broă Añ jê, cau klau mơ cau ùr.

³⁰ Añ rơp lơh tềl sơnio ală bơta crih crài hơđang ală tap trồ mơ hơđang plai ù, hơ̆ la mhàm, ồs, mơ ală jrong ñhŭ.

³¹ Mattơngai rơp gơlik klam jơngo, mat kơnhai gơlik gơs mhàm, lài mơ tŭ tus ngai dờng mơ rngòt rngơt Yàng Jehôwa dê.

³² Gen cau lơi hòi dan di sơnđan Yàng Jehôwa rơp geh dong klàs; bơh hơđang mơnơm Siôn mơ tòm Jerusalem rơp gơs ală cau geh dong tă, jat be jơnau Yàng Jehôwa neh đơs: mơ digùl ală cau gam wơl, bol khai la ală cau rơp geh Yàng Jehôwa hòi.