Jeremi 9 - Sră Goh 2018

Jơnau yoam Jeremi dê

¹ Ôih! Kơp kòñ bồ añ la dô nơm croh dà, Mat añ la dô nơm tồ dà cat dà mat! Nàng añ in ñìm sùm mang mơ ngai Bơh làng bol añ jê gơkòl tơnchơt.

² Ôih! Kơp kòñ añ gơs dô nơm hìu ơpah bic ing tòm ƀlàng bràs! Nàng añ sang lòi làng bol añ Mơ lòt ngài bơh bol khai; Bơh tơl nă bol khai la ală cau rềs àr, Dô mpồl ală cau blac pơrlồm.

³ “Bol khai bơt lơmpiat bol khai be àtak, Bol khai hòn dờng tòm lơgar bơh bơta blac pơrlồm. Ò di bơh jơnau song; Bol khai ntoat tơngguh bơh bơta iơh do tus bơta iơh ndai, Mơ bol khai ò đal git Añ,” Yàng Jehôwa đơs behơ̆.

⁴ Kơrhia tĕ bơh cau gơp ƀòn he, Bañ dòn kơnòm di dô nă cau lơi tòm oh mi he; Bơh kòp nă oh mi la cau pơrlồm, Mơ kòp nă cau gơp ƀòn lòt gùt dar be cau yă blac.

⁵ Bol khai jơh tơl nă pơrlồm cau gơp ƀòn he, mơ ò gơs dô nă cau lơi đơs jơnau song. Bol khai bơto lơmpiat bol khai đơs blac, Pơnđơl pràn lơh bơta iơh, mơ kalke nàng gơjrañ sang glài.

⁶ Yàng Jehôwa đơs: “Bơta rồn bơklơn bơtơl bơta rồn bơklơn; Blac pơrlồm bơtơl blac pơrlồm! Behơ̆ tàng bol khai ò bài đal git Añ.”

⁷ Gen tàng Yàng Jehôwa Gơnap Gơnoar đơs be do: “Añ rơp tiar mơ lòng bol khai; Ñchi Añ pal lơh tai gơwèt mơ tồi glài làng bol Añ jê taih?

⁸ Lơmpiat bol khai la kam bih khih, Đơs tơlik jơnau blac chừt bơh bơr. Bol khai jơh tơl nă đơs jơnau niam mơ cau gơp ƀòn he, Mơya tòm nùs bol khai bơyai rcang pơt dô nơm dă.”

⁹ Yàng Jehôwa đơs: “Añ rơp ò lơh glài bol khai bơh ală bơta hơ̆ ơ? mơ Añ rơp ò sal tê hơđang dô nơm lơgar behơ̆ ơ?”

¹⁰ Añ rơp ñìm rac pơt wòl bơh ală mơnơm, mơ ñìm rac ròc moat jrùng bơh ƀlàng ñhơt ƀlàng ngềt ngơt dê, Tài bơh gơ neh kong sang lòi srau gòi, tian gơs ò gơs cau lơi lòt gan, mơ ò gam kơno sap kơnrồ, Sềm trồ bal mơ phan poan jơng neh dô lik jơh.

¹¹ “Añ rơp lơh Jerusalem in gơlik gơs dô gơnru tơrlah tơrlơm, Trồm ơm so rhau dê; Mơ lơh ală ƀòn dờng Juda dê gơlik gơs tiah lòi srau, ò gơs cau ơm.”

¹² Cau lơi gơs tơl bơta jak chài nàng wă wơng ală bơta do? Mơ bơr Yàng Jehôwa đơs mơ ñcau, nàng bol khai rgơi yal tơnggit? Ñchi bơh tài lơgar do kong tơnroh kòl sang lòi kung be ƀlàng ngềt ngơt, tian gơs ò gơs cau lòt gan taih?

¹³ Yàng Jehôwa đơs lah: “Hơ̆ la tài bơh bol khai sang lòi bơta boh lam Añ jê, mơ Añ neh ơn di đap bol khai; mơ neh ò dòn bơr Añ, mơ ò lơh lòt tòm toh.

¹⁴ Mơya bol khai kơldang bồ lòt jat nùs is bol khai dê, jat ală yàng Baal mơ ồng pàng bol khai neh bơto bol khai.”

¹⁵ Behơ̆ gen tàng, Yàng Jehôwa Gơnap Gơnoar, Yàng Tom Trồ Israel dê, đơs be do: “Añ rơp ai làng bol do sa chi bơtang, mơ hùc dà gơs bih khih.

¹⁶ Añ rơp rsìh bol khai digùl ală làng bol mơ bol khai mơ ồng pàng bol khai dê òhềt git; Añ rơp sồr đào ting jat, jơl tus di tŭ neh tơnroh jơh bol khai.”

Làng bol ñìm rac bơh bơta cahrña

¹⁷ Yàng Jehôwa Gơnap Gơnoar đơs be do: “Sơwì tĕ mơ hòi ală cau ùr ñìm ƀồc tus, Sồr tĕ ală cau ùr chài rgơi tus.

¹⁸ Lòi bol khai mhar ñìm ƀồc bol he in, Nàng mat bol he gơhòr dà mat, Sơmbir mat bol he hòr bềng dà mat!

¹⁹ Bơh dô jơnau ñìm rac geh kơno bơh Siôn lah: ‘Mbe bol he kong roh rui! Bol he jơh hir ƀàssìl ƀàsso! Tài bơh bol he pal sang lòi lơgar; tài bơh bol khai neh phà tơrlah ală tiah ơm bol he dê!’”

²⁰ Ơ ală cau ùr, iat tĕ jơnau Yàng Jehôwa, Lòi tĕ tồr bol ai dòp jơnau bơr Kơnràñ đơs. Bơto tĕ ală kòn ùr bol ai in dô bơta ñìm rac; Kòp nă bơto tĕ cau gơp ƀòn he rac ròc!

²¹ Bơh bơta chơt neh tus di mpồng dềt bol he dê, gơ neh mut tòm ală gơlang bol he dê, Tơnchơt ală kòn dềt tòm ală gùng, Mơ cau pơnu ơruh digùl hìu drà.

²² Đơs tĕ: “Yàng Jehôwa đơs be do: ‘Ƀồc cau chơt rơp gơpừ Kung be phan pơnđồm tòm ƀlàng sre, Mơ be sơnđùng kòi neh rung bơh ngkòi cau toès; mơ ò gơs cau lơi dòñ bol gơ wơl!’”

²³ Yàng Jehôwa đơs be do: “Cau jak bañ jòng să bơh bơta jak chài bol khai dê; Cau pràn bañ jòng să bơh bơta pràn bol khai dê; Cau pas bañ jòng să bơh bơta pas bol khai dê.

²⁴ Mơya cau lơi jòng să la jòng să tòm bơta do, hơ̆ la bol khai wă wơng mơ đal git Añ la Yàng Jehôwa, Añ lơh broă mơ bơta kòñ gơboh kơ̆ dơn, Song ngan, mơ song ring hơđang plai ù; Bơh Añ kòñ gơboh ală bơta hơ̆.” Yàng Jehôwa đơs behơ̆.

²⁵ Yàng Jehôwa đơs: “Nền cê ngan, ngai rơp tus, tòm tŭ Añ rơp lơh glài kòp nă cau geh siat gơltau đah bơdìh:

²⁶ hơ̆ la Ejiptơ, Juda, Edôm, kòn sau Ammôn, Môap, mơ jơh ală cau koah sŏ di gah tồr mơ ơm tòm ƀlàng bràs. Bơh jơh ală làng bol do ò kong siat gơltau, mơ jơh hìu Israel neh ò siat gơltau tòm nùs.”