Jeremi 8 - Sră Goh 2018

Bơta jơngo lè làng bol dê

¹ Yàng Jehôwa đơs: “Tòm rài hơ̆, ƀồc ală cau bơtau Juda dê, ntìng ƀồc ală cau kwang at bồ, ntìng ƀồc ală cau gơnoar ơn phan duh khoai, ntìng ƀồc ală cau gơnoar hwơr, mơ ntìng ƀồc ală làng bol Jerusalem dê cau rơp cèng tơlik bơh bơtô ƀồc bol khai dê.

² Cau rơp pràng ală ntìng ƀồc hơ̆ hơđơm mattơngai, mat kơnhai, mơ ală sơmañ hơđang trồ, hơ̆ la ală phan mơ bol khai kòñ gơboh, duh broă; la phan bol khai lòt jat, jòi jat mơ duh khoai. Gơ rơp ò geh tơrgòm wơl hala tơp bồr, gơ rơp kung be è hơđang ù.

³ Bơta chơt geh kòñ rlau mơ bơta kis gơwèt mơ ală cau gam wơl bơh bơta iơh bơsak tòm jơh ală tiah Añ neh bơtrơh bol khai.” Yàng Jehôwa Gơnap Gơnoar đơs behơ̆.

⁴ “Behơ̆ mê pal đơs mơ bol khai lah: Yàng Jehôwa đơs be do: ‘Tòm tŭ cau gơplơ̆, bol khai ò ñă ntào wơl ơ? Dilah bol khai lòt neh lòt tìs, bol khai ngan ò rê wơl ơ?

⁵ Behơ̆ ñchi bơh tài làng bol kư̆ dô ngài? Tòm bơta kư̆ tìs wơl sùm sùm ơ? Bol khai sơmbat prap bơta blac chừt, Bol khai ò bài rê wơl.

⁶ Añ neh ai tồr mơ iat; Mơya bol khai ò đơs bơta song ngan, ò gơs cau lơi gơjrañ sang glài bơta iơh Mơ đơs lah: “Ñchi añ neh lơh taih?” Jơh tơl nă bol khai lòt jat gùng is, Kung be ơseh brồ tơm tòm tiah tòmlơh.

⁷ Bulah klàng kò ơm tòm tiah pah gòi, Git is tŭ tơngai gơ dê; Sềm ntòp, sềm pơrbèt, klàng ka, git đal tŭ tơngai tus bol gơ dê. Mơya làng bol Añ gen ò git, Bơta lơh nền Yàng Jehôwa dê!

⁸ Mbe bol mê rgơi đơs lah: “Bol he la àng jak, mơ bơta boh lam Yàng Jehôwa ơm bal mơ bol hi,” Mơya, gai cih ma blac ală cau gơnoar cih dê Neh lơh bơta boh lam hơ̆ gơlik bơta đơs blac!

⁹ Ală cau jak chài rơp gơkòl ƀàssìl, bol khai rơp gơdô nùs, mơ gơkòl kup cèng. Bơh di tŭ bol khai neh sang lòi jơnau Yàng Jehôwa dê; ñchi bơta jak chài gam ơm tòm bol khai taih?

¹⁰ Gen tàng, Añ rơp jào bau ùr bol khai dê cau ndai in, Mìr sre bol khai dê cau phà tòmpìt in; Tài bơh, bơh cau dềt rlau jơh tus cau dờng rlau jơh, jơh tơl nă hàm hà cồng nha ò song ring; Bơh cau gơnoar hwơr jơl tus cau gơnoar ơn phan duh khoai, jơh tơl nă lơh lòt ma blac lơm.

¹¹ Bol khai pùt tềl sồt làng bol Añ jê dô bă ơlă ơlai, Đơs lah: “Lơngap lơngai, lơngap lơngai!” Mơya ò gơs bơta lơngap lơngai dô êt lơi.

¹² Bol khai neh lơh broă ƀàssìl ngan, bol khai tìs bơta cù kìr, mơya bol khai ò git ƀàssìl ƀàsso bol khai ò gơlơh dum mat sơl. Behơ̆ gen tàng, bol khai rơp gơpừ bal mơ ală cau gơtup pừ. Tus di ngai Añ lơh glài bol khai, bol khai rơp kong tuh tơlup.’” Yàng Jehôwa đơs behơ̆.

¹³ Yàng Jehôwa đơs: “Tòm tŭ Añ kòñ tơrgòm bol khai wơl. Ò gam plai ño hơđang chi ño; Ò gam plai ƀal hơđang chi ƀal; Tian gơs ală nha kung rơp ro jrùh; Mơ ală bơta Añ neh ai bol khai in, rơp kòl tă tơlik jơh bơh bol khai!”

¹⁴ Ñchi bơh tài bol he gam nggui taih? Pơjum tĕ bal mơ gơp, bol he mut lă tòm ală ƀòn kơ̆ cê, mơ kong roh rui tềng hơ̆! Bơh Jehôwa Yàng Tom Trồ bol he dê neh lơh nền bol he in kong roh rui, neh ai bol he in hùc dà bih khih, Bơh bol he neh tìs glài tòmdră mơ Yàng Jehôwa.

¹⁵ Bol he kơp kòñ bơta lơngap lơngai, Mơya jòi bàn bơta ò niam; Kơp gơn tŭ tơngai sơmbòi, Mơya bơta rngòt rngơt tus.

¹⁶ Ntas sap ơseh hòi neh kơno bơh Dan; kơno sap ơseh tòmlơh ơhih, làm jơh ù tiah lơnggơr; Bơh bol khai neh tus, sa loan ù mơ ală phan gơlik bơh ù, sa loan ƀòn mơ jơh làng bol ơm tòm gơ.

¹⁷ “Sền ne, Añ sồr bơs tus digùl bol mê, ò gơs cau lơi rgơi juh proh gơ; Bol gơ rơp kap bol mê.” Yàng Jehôwa đơs behơ̆.

Cau gơnoar hwơr ñìm rac bơh làng bol

¹⁸ Bơta hòn chò añ jê neh roh, bơta moat jrùng jê sồt ơm hơđang añ! Nùs añ kòp jê!

¹⁹ Iat tĕ! Jơnau driau nggà làng bol nđàc sơngit añ jê, bơh ală tiah ngài ngan tòm lơgar, lah: “Yàng Jehôwa ò gam ơm tòm Siôn ơ? Bơtau khai dê ò gam ơm mơ khai ơ?” “Ñchi bơh tài bol khai bơrcek Añ gơjrañ, mơ rùp pac sềr bol khai dê Mơ rùp ràk làng bơdìh dê taih?”

²⁰ “Kơnhai toès neh rlau, kơnhai prang neh lồi, Mơ bol hi òhềt geh dong klàs!”

²¹ Bơh bơta jê sồt làng bol añ jê, añ kung jê sồt; Añ moat jrùng jê sồt mơ rngòt rngơt sơmbat kup añ.

²² Tòm Galaat ò gơs kơlhô ơ? Ò gơs cau gơnoar sơnơm ơm tềng hơ̆ ơ? Behơ̆, ñchi bơh tài bơta kòp jê làng bol añ jê ò geh sơmbòi taih?